Natu tsikeni nokukuna omiti, Iita a ti

PETHIMBO ta popitha oshigwana, unene tuu aanasikola posikola Ombuga Combined School mesiku lyokudhimbulukwa etsiko negameno lyiihwa nomiti muuyuni, lya dhanenwa posikola yaMbuga mpoka mUukwambi moshitopolwa sha Shana mEtitano lyoshiwike sha zi ko, Amushanga ta kalelele mUuministeli wUunamapya, Omeya nIihwa , Joseph Iita, okwa indile oshigwana shi kune nokutsika omiti opo ku keelelwe embugapalo ko wo ku gamwene uuntshitwe womiti nomidhingoloko dhi kale dha ziza nawa dhuudha iihwa nomiti.

Iita ta ti, oshilongo shampa shi na iihwa nomiti dha ziza nawa nena nonkalo yaantu niinamwenyo yilwe otayi kala nawa. Taya fudha nawa. Ye li momidhingoloko dhuudha ohapi.Esiku ndika lyekuno netsiko lyiihwa nuumvo olya dhanenwa nokudhimbulukilwa posikola nee ndjoka yOmbuga moshikandjohogololo sha Katana moshitopolwa sha Shana, molwashoka ndjika oyo ye ya tango nuumvo methigathano lyokutsika omiti pomanongelo muumbangalantu waNamibia, ano mOshana, Omusati, Oshikoto nOhangwena. Tayi mono ekopi lyesindano lyeugathano noshowo onzapo niilongitho yopaunamapya, ngaashi uutololi, iihalaka, oombuto, omatanga gokudhana noshowo yilwe yopaunamapya. Kehe moshitopolwa namo omwa li ngaa oosikola ndhoka dha sindana paitopolwa nodha monene wo oondjambi dhesindano. Moshana omwa li wo oosikola mbali ndhoka dha landula ndjoka ya Mbuga mesindano ndika dho odho Ompandakani Combined School naandjoka yopaumwene ya Maaritz Devenish mOngwediva ndhika odha pewa wo omapapa gadho gesindano, sho dhe ya pehala etiyali netitatu.Total Namibia oye omuyambidhidhi omunene gwEsiku ndika lya Arbor Day, ngele tashi ya komathigathanopo goosikola metsiko lyomiti nonuumvo okwa gandja ooN$90,000 opo ku yambidhidhwe oosikola ndhoka dhe shi enditha nawa. Omusamane Iita okwa indile nee koshigwana ashihe sha Namibia, unene tuu muumbangalantu woshilongo shi kale sha simaneka omiti, ano iihwa nokukuna noshowo okutsika omiti oshilongo ashihe opo omudhingoloko gwa Namibia gu vule okukala gwoopala naamboka ye li mo ya kale yuuvite uugumbo sho ye li mombepo ombwanawa yuunsthitwe ngawo.Iita ota ti omiti oshinima sha simana molwemona lyoshilongo oshoka ohadhi vulu okulongithwa miinima oyindji lela, itayi pu kutumbulwa, onkee etsiko nekalekepo lyadho olya simana noonkondo koshilongo nokoshigwana sha mo. Iita ta indile koshigwana natango ta ti, sho ngaa wa ka po omuti gumwe ngoye oto kunu po nenge to tsike po gumwe.Ta tumbula woo kutya aAfrika oya fa kaye shi nawa ookuume kiihwa niiti, molwashoka ohaku tiwa kutya momiti kehe dhi li 28 dha kewa po mo Afrika ohaku tsikwa ashike gumwe. Ta ti hasho shi na okukala ngawo.’ Tu tsikeni omiti dhi longithwe miinima oyindji’, oyo Otema yonuumvo ndjoka yesiku lya Arbor mUuyuni nomuti ngoka gwa hogololwa gu tsikwe ogo ngoka gwomakegwa gwedhina Acacia , yamwe ota ye gwiithana omuthiya, omwoonde ,uumutshu/kamutaka nosho tuu. Okwa ti miitopolwa moka mu na iihwa, nenge omakuti, ohamu lokwa nawa nosha pumbwa nee Namibia a kale e na iihwa opo a kale ha lokwa nawa noshigwana, unene tuu shoka oshilimimapya, shi kale hashi mono omvula ya gwana nopamukalo ngoka shi imonene wo nee iipalutha ya gwana, ngashi osho naanaa sha halika kepangelo okupitila moshikondo she.Iita, ngoka a ti kutya pethimbo ndika moshilongo omu na nale omahala gomakuti ge li 32 ngoka ga gamenwa, ta pandula noonkondo Ehangano lyOmahooli ndika lyedhina Total Namibia sho li itula mo mokuyambidhidha etsiko lyomiti moNamibia, unene tuu pomanongelo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.