Natu idhidhimikilathaneni nawa papolotika

ONGAYE Kornelius Mbangula, oshilyo shOngundumutima moRDP, Omugandji gwuuyelele pambelewa okuzilila kongundu yOpapolotika yoRDP mOshitopolwa sha Shana, nda hala okuyelitha oshinima shika moshigwana.

Otandi yelitha osheendo shetanga lyonyothi onduudhe RDP tashi monika tashi inyenge mOshitopolwa Oshana. Ope na Aasimanekwa Ookaansela yamwe mOshitopolwa sha Shana ya limbililwa kokwiinyenga kwaantu mbaka. Aasimanekwa, aantu mbaka taya monika tayi inyenge mpaka naampeyaka mOshitopolwa, kaye shi nande aayoni yombili nelandulathano, Aantu ye na oshinakugwanithwa naavuliki. Oyo wo aakwatheli (aayambidhidhi) yiilonga yOokaansela nEpangelo alihe mehumokomeho lyoshilongo papolotika. Taya landitha omadhilaadhilo gOngundu yawo yo RDP kAanamibia yakwawo. Taya kongo Ookastoma. Iipindi omomeho. Oshaanawa ihaku ti landa. Osheelo shegumbo osha eta ombwa. Li pitwa li na ontu, li endwa li na omukala. Aantu mbaka ohaye shi ningi pazimino lyooyene yomikunda nOpolisi. Aantu mbaka aana yeni, aamwanyoko, ootate noomeme yeni, omazimo geni nAanamibia yakweni.Omukadhona ta kongwa komumati, oha tindi nge ina hala. Nge okwa hala oha zimine. Omumati ku shi nee omukadhona ngoka e ku hala naangoka ine ku hala ngele ino popya naye. Omukadhona nge ina hala, ita kugu onkugo nande, ongedhidhiliko ngeno kutya omumati ngoka ine mu hala. Nokuli, o he mu simaneke unene, shaashi okukala wu holike komuntu oshaanawa shi vulithe okutondika komuntu. Oondima dhomepya iho kapendula puushiinda, oho limi to tala onku yoye. RDP naye osho ta ningi. Yakwetu inamu mona tatu sinki (galagula) metiti. Tse ishewe katu na okuthiminika omuntu aayee, okehalo lyomuntu mwene. Owela wetu inau enda nokakwi monyala. Iikonga yomahogololo otayi adha tu li mondjila twa thinda komeho, ngashi ngaa tashi ningwa.Yakwetu yOswapo naya kale nombili. Oshike ano haya uvu uudhigu nge tse yoRDP tatu longo tse katu uva uudhigu nge taya longo.Ookansela yamwe otaya lundile ooyene yomikunda nomalenga kutya aniwa inaya hala oRDP.