MTC a tindi elombwelo lyaCran kombinga yomaishangitho guukalata woongodhi

Ehangano enene lyomakwatathano gopangodhi lyoMTC olya popi kutya otali tsikile nokushangitha ookastoma dhawo lya kwatela mo uuyelele womuule womaukwatya gookastoma, nonande ehanganowiliki lyomakwatathano moshilongo lyedhina Communications Regulatory Authority of Namibia (Cran) olya popi kutya omahangano gomakwatathano goongodhi naga hulithe po okukutha ko uuyelele womuule womaukwatya gookastoma, pethimbo ndika lyomaishangitho guukalata woongodhi.

Okupitila momukanda gwiikundaneki mOmaandaha, omupopiliko gwoMTC, Tim Ekandjo, okwa popi kutya ehangano lyawo itali iyutha nande kelombwelo ndyoka lyaCran.

MuMaalitsa 2021, epangelo olye eta po omulandu tagu dhengele gwomashango guukalata woongodhi kohi yOveta yOmakwatathano yo2009, naashoka osha gandja elombwelo komahangano agehe gomakwatathano gopangodhi ga shilipaleke kutya kehe ngoka ta longitha okakalata kehangano lyawo okwa shangithwa nuuyelele we owu li momambo gehangano.

Minista gUuyelele nOmakwatathano goPaungomba Peya Mushelenga pethimbo ndyoka okwa popi kutya etokolo ndyoka olya ningwa opo ku shilipalekwe kutya okwa kondjithwa iimbuluma mbyoka tayi longithwa koongangala okupitila pangodhi nenge pamakwatathano gopangodhi.

Onkene Cran ngoka oye ta kondolola omahangano gomakwatathano gopangodhi moshilongo okwa li a lombwele omahangano ngoka ga tule miilonga omaishangitho guukalata wopangodhi wookastoma dhawo okutameka momumvo nguka.

Ashike konima yomaishangitho sho ga tameke opwa holoka omanyenyeto gaakwashigwana osho wo iikundeneki kombinga yomaukwatya gomuule ngoka taga pulwa omuntu komahangano gomakwatathano goongodhi opo a shangithwe.

Omukuluntuwiliki gwoCran, Emilia Nghikembua, omasiku ga zi ko okwa gandja elombwelo opo omahangano gomakwatathano goongodhi dhopeke ga hulithe po okupula omauyelele gomuule gookastoma pomaishangitho – omauyelele gomuule ongaashi okugandja omanyala osho wo okuthanekwa okatse.

Ashike nando ongaaka MTC okwa ndjika oondjala mevi, nokwa popi kutya ota tsikile.

“MTC oku uvite ko etseyitho lya gandjwa kuCran notwa hala okupopya kutya nonande otuli pamwe naCran mwaashoka, uuyelele wuukwatya womuule [womuntu] owu li oshitopolwa shomulandu gwetu gwoMTC ngoka tagu longithwa okundhindhilika uushili wookastoma sho kwa ndhindhilikwa onkalo tayi londo yiimbuluma yopamalungula mbyoka olundji hayi kala nekwatathano lyiinima yaantu ya yakwa,” osho Ekandjo a popi ngaaka.

Okwa popi kutya omulandu gwokukutha ko uukwatya womuule wookastoma otagu lalakanene okugandja egameno lya kondopekwa nokukwathela mekondjitho lyuukengeleledhi niimbuluma, osho wo okugandja onkalo ya nuka po ngele tashi ya kuuyelele wookastoma dhoMTC.

Shoka osha nuninwa okukwathela momakonakono giimbuluma mbyoka tayi longwa pamalongitho gomakwatathano goongodhi.
MTC okwa popi kutya sigo oompaka ookastoma dhawo dha konda pomiliyona odhi ishangitha nale uukalata wawo woongodhi.