Meekulu Febe ota ti okwa yekwa epya lye ku Emilia

MEEKULU Febe Sakaria (72) gwomomukunda Omafo mondoolopa ya Helao Nafidi mOukwanyama mOshitopolwa sha Hangwena ota ti kutya okwa yekwa epya negumbo lye ku meme Emilia Ngaamwa, omukulukadhi kwali gwa mumwayina nakusa Andreas Sakaria ngoka a manene oondjenda dhe momumvo 2003.

Meekulu Febe ota ti kutya epya negumbo ndyoka a kuthwa ku meme Emilia Nghaamwa, olya kokolwa po kuhe Hailaula Sakaria ngoka a hulitha momumvo 1974. Ota ti okuza sho tate gwawo a hulitha ngawo, egumbo olya pewa omumwayinamati Hosea Sakaria ngoka wo naye a mana oondjenda dhe momumvo1996. Febe ta tsikile ko ta ti okuza mpoka egumbo nepya lyawo ndyoka olya pewa po ishewe omumwayinamati Andreas Sakaria ngoka a li omunangeshefa pOmafo mpoka, ashike okwa kala kOmbaye hoka a li e na ko omukulukadhi Elize Ndemutele, ye kegumbo ta kala ko e na ko meme Emilia Nghaamwa, ngoka a kala unene ha longo Ositola yawo pOmafo mpoka. Pokati mpoka Andreas na ye okwa mana oondjenda momumvo 2003, ye omukulukadhi gwe meme Elize naye te mu landula momumvo 2004. Okuza mpoka, meekulu Febe ta ti, ezimo lyawo olya ningi etokolo kutya oye na ye megumbo lya tate gwawo konima yeso lya Andreas ngeyi. Meekulu Febe, ngoka a kala unene ombwiti kOvenduka, ta ti okwa futu wo nokuli OoN$600 ku mwene gwomukunda gwawo tate Elias Erastus nokwa pewa wo nokakalata. Ashike nee manga e li po okuuvite aniwa taku tiwa ishewe kutya egumbo olya meme Emilia Nghaamwa. Meekulu Febe ota ti oshinima okwe shi fala kOmalenga gUukwanyama, ngoka ga tokola epya li tendwe pokati. Ye (Febe) ta pewa ko oshitopolwa shimwe shepya, kombinga yokuuninginino, ye Emilia, ngoka a kala omukulukadhi gwa nakusa Andreas, ta kala megumbo noshitopolwa shepya shoka sha hupa ko. Meekulu Febe, ota ti kutya etokolo ndyoka ke li uvitile ombili, oshoka Emilia ka li a hokanwa aniwa paveta ku Andreras opo a vule okupewa egumbo nepya ndyoka. Okwa yi sigo okoministeli yOmapangelo gOpaitopolwa, Omagumbo nEhumithokomeho lyIitopolwa yokomikunda nosho tuu kUuministeli wOmavi nokElelo lya Helao Nafidi. Pokati mpoka Uuministeli wOmapangelo gOpaitopolwa, owa shanga Ombapila ndjoka tayi ti kutya Febe na Emilia naya kale ashike ngashi sha tokolwa kElelo lyoshilongo, kehe gumwe mehala lye. Uuministeli tau ti kutya ehala moka ye li kali shi lyawo, olyElelo lya Helao Nafidi ndyoka konima yokathimbo tali ke ya mpoka nokutopola epya lyawo ndjoka mOoplota ngashi osho hashi ningwa mOondoolopa dhoomuni. Meme Emilia okwa li a tameka ta landitha po Oopolota dhimwe mepya lye moka, ashike naye okwa lombwelwa kElelo lya Helao Nafidi kutya na sitope okulanditha Ooplota mepya lye moka. Elelo tali ti kutya olyo li na uuthemba wokulanditha ooplota mehala moka, konima ngele emeto olye ya thiki nawanawa.Meme Emilia Nghaamwa kombinga ye okwa lombwela The Namibian kutya ye okwa kala omukulukadhi gwa nakusa Andreas nawanawa pamuthigululwakalo noye na uunona utatu. Ta ti nashi nee omusamame gwe Andreas a hulitha ngawo na nyamunkwawo Elize, ye oku na uuthemba wokukala megumbo lyomusamane gwe moka, ngashi naanaa sha uthwa paveta yOmalelo gOpamuthigululwakalo. Ta ti ye ita zi mo megumbo moka, sigo Elelo lya Helao Nafidi tali ya li ya mete noku ya pa mpoka taya kala mepya lyawo moka. Emilia ta ti, suuwala ye Febe na kale ashike kehala lye hoka, a tegelele naye Elelo lya Helao Nafidi li ye li mu mete noli mu pe mpoka ta kala mepya lye moka.Helao Nafidi ota ti kutya epya tali popiwa oli li mehala lye nokwa tega ashike e ye a mete po ngele ethimbo lya thiki. Ta ti sho nee taka meta po, meekulu Febe ngele okwa hala okukala mpoka e li, ota metelwa ehala lye li li meni lyOohekta ndhoka dhi na okukalwa nadho komuntu ngoka a hala okukala mondoolopa. Elelo tali ti na meme Emilia oshowo.Nande ongawo, meekulu Febe Sakaria ota ti kashi li pauyuki, epya alihe oli na okuninga po lye manga Elelo lya Helao Nafidi inali ya oku li meta, ashike meme Emilia naye ota ti kutya ye ita zi mo mepya lyomusamane gwe Andreas, oshoka olye paveta yElelo lyOpamuthigululwakalo.Omasiku hamale sho omukalimo gumwe meni lyoongamba dhoshilando shika okwa li woo a nyenyeta ta ti aniwa ota kuthwa evi ye kelelo lyopamuthigululwakalo lyUukwanyama. Nguka okwa li a landula oshinima she okuza kewiliko lyopevi sigo olyopombanda.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.