OVAWILIKI ove na oshinakuwanifwa shokuulika nokuyandja ohole nefiloshisho keefiye nokwaaveshe ava ve li monghalo ya djuupala.
Eendjovo edi oda popiwa kuMayola wodoolopa yaShikuku moshitukulwa shaMusati, Mbockoma Mungandjera, pefimbo loitendele yowina ya li ya longekidilwa eefiye nounona ovakwanaluhepo mEtitano loshivike sha dja ko.
Mungandjera okwa ti ombelelwa yaye oya didilika onghalamwenyo idjuu omo mu neefiye nounona ovakwanaluhepo, ovo vehe na oikulya neenhele dokukala, vehe na efiloshisho nohole yovadali ngaashi ounona vakwao.
Mungandjera okwa ti oitendele oyo hai ningwa lumwaaluke komudo, oyo omhito yokuyandja oshuumbululwa kounona nokuva pa omaano e lili naku lili.
Okwa ti eefiye nounona ovakwanaluhepo ove li monghalo ya nyaika nova taalela omashongo shihe fi pahalo lavo vene.
Vamwe vomuvo ove li monghalo ya tya ngaha molwaashi omaumbo avo a wililwapo koHIV/Aids oyo ya vakula po ovadali vavo ovo, ovo va li tava dulu okuva pa onhele yokukala, ohole nefiloshisho va pumbwa.
Vamwe ove li monghalo yoluhepo molwaashi ovadali vavo ove li mehalakano, unene tuu ovanyasha ovo va ninga omateelelo nokumona ounona efimbo inali fika molwaashi va ya momilele inadi amenwa. Onga oshilanduli, ounona ova tulwa metonatelo looinakulu manga ooxe nooina tava i keedoolopa va ka konge oilonga.
Paemhito dimwe, ovanyasha va tya ngaha eshi tava aluka keedoolopa otave uya nounona vooxe heve shiivike.
Mungandjera okwa twikila ko ta ti, ounona vamwe ove li moluhepo shaashi ooina ihava longo nova pewa omadimo kovalumenhu veva udanekela eulu noparadisa komadayedu, ashike, ovalumenhu ovo tuu ovo, ohava faduka po meendelelo shimha ashike va lombwelwa nokutya kaadona okwa ninga eteelelo. Kaadona ta fyaala opo a file okaana oshisho oye aeke.
Kakele keteelelo, kakadona otashi dulika a pewa yo omukifi.
“Onghalo ya tya ngaha,” Mungandjera ta ti, “oya pumbwa okupalamenwa nelitulomo kufyeni atusheni. Shotete opo tu ulikile ounona ovakwanaluhepo ohole, noshitivali, tu honge ovanyasha nokuva shiivifila oshiponga shokuya momilele inadi amenwa, mwa kwatelwa HIV/Aids.”
Okwa ti ounona voukadona ova pumbwa yo okupewa ouyelele kombinga yaashi ve na okuninga opo vaha ninge omadimo efimbo inali fika, ndee ve litule mehongo ponhele yokupitika va hekelwe moulai kovalumenhu.
“Onga ovawiliki na onga oshiwana otuneni oshinakuwanifwa shokuulika nokuyandja ohole nefiloshisho kwaava ve li monghalo ya nyaika. Olo, olo elalakano loitendele ei,” osho Mungandjera a ti ngaho.
Oitendele yokomudo ohai longekidilwa eefiye nounona ovakwanaluhepo vomodoolopa yaShikuku nomikunda dopopepi.
Oitendele ohai longekida kombelewa yaMayola wodoolopa palongelokumwe noshipangelo shaShikuku neyambidido lovanangeshefa vomomudingonoko.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
