OSHILYO shokomitiye onene moRally for Democracy and Progress (RDP), Martin Heita okwa kundanekwa kee shi we oshilyo shongundu ndjoka yopolotika. Inashi yela mo nee nawa ngele Heita otaka ya
moongundu dhilwe dhopolotika moshilongo ihe okwa kundanwa pu na ngaa oolopota inaadhi kolekwa ngaa nee nawa kutya otaka shuna mongundu tayi pangele, ano yoSwapo moka a zile sho kwa totelwe ndjoka yo-RDP oomvula hetatu dha piti. Heita okwa kundanekwa a kala omuyambidhidhi omunene gwomupresidende gwo-RDP, Hidipo Hamutenya nokwa li omutitano momusholondondo gwaamboka yomokomitiye onene yo-RDP yomuNovomba omumvo twa zi.
Heita okwa kundanwa naye mwene a koleka kutya otaka thiga po o-RDP, shi ikwatelela kwaandhoka a lombwelele oshikundaneki sho-Nampa ihe ina koleka ye wo ina tinda ndhoka kutya otaka shuna mo-Swapo. Heita okwa ti she mu zitha mo-RDP osho okwi itula miinima yi nasha nofamili ye nosho wo meithano lye ndyoka e na. Okwa ti shoka kutya mo-RDP okwa za mo nale okwe shi tseyithila nale ombelewa yahamushangandjayi gwo-RDP. Martin Heita okwa kala omuwiliki gwiikwankondo muuministeli woomina niikwankondo momumvo 2001 omanga nee a li inaaka ninga omutotipowiliki gwehangano lyoNorthern Electricity Distribution (Nored). Ehangano ndyoka lyo-Nored okwe li thigile po sho a li a pulapulilwe kewilikongundu lyo-Nored shi na sha nomemoranda ndjoka a gandjele moka a li inaa gandja nando esimaneko komukokolipresidende nahe yoshigwana shika, tatekulu Sam Shafiishuna Nujoma naashoka osha ningilwe nee momumvo 2004.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
