‘Katu na mpoka tatu vulu okuya’… aakalimo yomokomboni moWanaheda ya thigwa pomutenya

AAKALIMO ye li 23 yomokomboni tayi adhika momudhingoloko gwaWanaheda, mEtiyali lya zi ko, oya thigwa pomutenya sho ya tidhwa mo momahala gawo.

Etidho lyaantu mboka mokomboni olya landula sho ehala ndyoka lya landwa po.

Sho onzonkundaneki ndjika ya talele po ehala lyokomboni ndjoka oshiwike sha zi ko, oya adha oondongelwa dhiinima oyindji ngaashi iikutu, iikulya, oombete niipundi osho wo yilwe ya halakana mepandaanda.

Aanona osho wo aavali yamwe oya li ya kuutumba popepi niinima mbyoka ya zi momagumbo gawo omanga taya ontele okaantenya.

Pethimbo onzonkundaneki ndjika ya thiki pookomboni ndhoka oya adha po opolisi naalumentu yatatu mboka ya pewa oshinakugwanithwa shokuteya po oombashu nokukutha mo iinima mehala ndyoka.

Aakalimo mboka ya li ya tala ko okwali ya fufayeka omanga yamwe taya popi kutya tashiya nashiye oshoka mehala ndyoka lyokomboni itaya zi mo.

Aakalimo mboka 23 ya tidhwa mokomboni oya thikama po maakuluntu ye li 14, aanona ye li 9, moka okanona okashone ke na oomwedhi ndatu.

Etitatu, aakalimo yatatu mboka ya li haya zi mokomboni moka, oya tulwa miipandeko nokupatululilwa oshipotha shi na sha neyonagulo lyoshiningilawina sha landula sho ya ndjiki oonyala mevi nokuyunga ontanda mooha dhomudhingoloko gwokomboni.

Mwene omupe, ngoka oye taku hokololwa a landa po ehala ndyoka li na okomboni, otaku hokololwa a li u umbu ondjembo mewangandjo okulondodha yamwe yomaakalimo yomokomboni mboka ya galukile pehala ndyoka kongulohi taya popi kutya itaya zi po.

Aakalimo mboka oya li wo anuwa ya makuka kutya otaya piti omweelo nokuya meni pwaana petikilo.

Omupopiliko gwopolisi yaKhomas, Silas Shipandeni okwa koleke etulo miipandeko ndyoka.

Okwa popi kutya mboka ya kwatwa po oyo Rauna kashala (23), Antonia Gabriel (17) osho wo Stephen Herman (36). Nokwa li ya holoka mompangu yamangestrata gwaVenduka moKatutura.

Oya pewa oboloha yooN$1 500 mu kehe gumwe. Oshipotha shawo oshu undulilwa komasiku 1 Septemba omanga taku ningwa omakonakono ga gwedhwa po.

Okomboni ndjoka oyi na oondunda hamano, okandjugo nokaiyogelo nokwa li wo mwa dhikwa oombashu mbali.

Gumwe gomaakalimo yomokomboni, oRauna Kashala, omwiilongi koshiputudhilo shaUnam nokwa popi kutya omolwokutidhwa mehala ndyoka, oshe eta a kale inaa shanga ekonakono lye.

“Oshinima shika kashi li pauyuuki. Katu uvite kutya okomboni oya landithwa po ngiini. Oya landithwa po shaa li paveta, ishiwe inatu shi tseyithilwa.

“Ombapila yoku tu laleka tu ze mo, inatu yi mona, otwa penduka ashike tu wete mwene omupe gwokomboni, e li nopolisi, taye tu tidha mo nale,” osho a popi ngaaka.

Omukalimo gulwe, Lahia Nehale okwa popi tati: “Onda kala mokomboni muka uule woomvula omulongo dha piti, nondi na okanona koomwedhi ndatu. Otandi yi nee ndi ka kale peni? Muule womasiku ga piti aashinda oya kala ya pandje olukalwa, ashike ngashingeyi ethimbo lyuutalala, openi tandi adha ehala lyokuza?”

Vaino Andreas okwa popi tati: “Aavali yetu oya futila nale okomboni ndjoka. Ooyene aape otaye ke tu galulila ngaa oshimaliwa shono, nenge otatu uka ashike momapandaanda? Okomboni ndjoka oya landithwa po shaa li paveta.”

OOYENE OYENDJI

Mwene omupe gwokomboni ndjoka, Tuyoleni Ninda, oshiwike sha zi ko okwa popi kutya ehala ndyoka okwe li landa po oomvula mbali dha piti, ashike kali eshi ngele nani ehala ndyoka olyaantu oyendji.

Okwa lombwele onzonkundaneki ndjika yi pule uuyelele wa gwedhwa po okuza kuhahende gwe.

Pahokololo lya zi kaakalimo yomokomboni ndjoka, Ninda oye omuntu omutitatu ngoka ta landithwa ehala ndyoka molwashoka otaku hokololwa e li landa komukiintu ngoka e li landithwa kuKennedy Kamati.

Kamati otaku hokololwa oye omutekulu gwomusamane ngoka okomboni ndjoka ya li ya shangithwa medhina lye.

Otaku hokololwa kutya molwashoka ookomboni ndhoka odhaantu oyendji, etungo olya kala lya tulwa medhina lya gumwe gomaakalimo [yomokomboni] ongomukalelipo gwawo.

Onkene uuna taya futu iifuta yomayakulo ngaashi golusheno nomeya, oya kala hayi futwa medhina lyomukaleli po ngoka.

Kuku gwaKamati otaku hokololwa oye a kala omukalelipo gwaakalimo yomokomboni naashoka otashi ti okomboni oya kala ya shangithwa medhina lye.

Sho a kwatathanwa naye, Kamati okwa yamukula tati: “Ninga owala shoka wa hala, ondi na iinima ya simana ndi na okulonga.”

Kuku Actofel Juso (77) ngoka oye gumwe gomaakalimo yotango mokomboni ndjoka, okwa yelitha ondjokonona kombinga yookomboni ndhoka, nonkene she ende sigo opompito yaakalimo mboka ya hugunine mo nokutidhwa mo, oshiwike sha zi ko.

“Mo-1985, ongaaniilonga yoontalaka mboka kwa li twa kala mokomboni onkulu moKatutura okwa li twa lalekwa mo notwa falwa komahala ga yooloka [gookomboni] momudhingoloko gwaWanaheda,” osho omukulupe a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.