Katjiriova oye amushanga gwalyaanasha mo DTA

MOSHIGONGI shawo oshinene sha ningilwa mElyambala mOngwediva mOshana mehuliloshiwike lya zi ko, aanyasha yomewawa lyaanyasha mo DTA oya hogolola, Benson Katjiriova gwokoKhomas oye a ninge amushanga gwawo omukuluntu pehala lya, Lesley Tjirjange ngoka a ti kutya ina hala we okuthikama ongomuhogololwa mehala ndika.

Aanyasha oya hogolola wo, Elvis Japuhua gwokoshitopolwa sha Kunene oye a ninge amushanga omutiyali gwewawa lyaanyasha yoDTA. Ewawa ndika okuza ngashiingeyi, otali kala li na omunashipundi, naanyasha mbaka oya hogolola, Agatus Antanga gwomOshakati mOshana oye a ninge omunashipundi.Antanga okwa li nale amushanga gwomauyelele niinyanyangidhwa moDTA. Moshigongi shomehuliloshiwike lya zi ko, Antanga noshowo Rich Richard, oya li wo aahogololwa pehala lyuuhamushanga, ashike oya dhengwa mo ku Katjiriova.Oshigongi osha hogolola wo Linda Isack gwoko Karas a ninge omunashipundi gwOpevi gwEwawa lyaanyasha ya DTA. Armstrong Muhinda gwoko Katima Mulilo koshitopolwa sha Caprivi okwa hogololwa a ninge amushanga gwomauyelele niinyanyangidhwa, Jefta Imene gwokOshana ta hogololwa a ninge amushanga gwiikwapondje, na Vaka Kamutuueza ta ningwa Amushanga gwElongo omanga Kukerua Tjiimbi gwokoKunene a hogololwa a ninge amushanga gwUukalinawa, ye Felicia Mutinga ta hogololwa a ninge amushanga gwuukashikekookantu nonkalonawa yaanona. Loide Iipinge a za kOmusati noshowo, Ngupandova Mbahimwa na Mike Mburura oya hogololwa iilyo ya gwedhwa po.Oshigongi shika oshinene shaanyasha yoDTA moshilongo ashihe, osha li sha kalwa nokupopithwa kOmupresidende gwOpevi gwo DTA omusamane, Fillemon Moongo noshowo ku amushangandjayi gwo DTA, Mike Venani. Omwa li wo aapopi yalwe yomokati kaanyasha moka mboka ya tsu aanaysha omukumo ya pule komeho miilonga yawo omoluudemokoli wa Namibia mboka wu na okukwatelwa po ngashi tashi vulika.Omusamane Moongo, ngoka a pandula aanyasha yo DTA sho ya gongala nawa ngeyi, ye ya okukundathana iinima yawo na nkene ye na okukala nokweenditha nawa ongundu yawo yo DTA. Omusamane Moongo ta ti kutya oDTA naanyasha yayo, otaya pula komeho noyendji otaya ndjoina ongundu ndjoka. Ta ti mboka ya kala taya ti kutya ODTA otayi ende tayi si po, oye na okushi mona komeho kutya ooDTA kayi na esiku nayi se po. Shoka shi li po okupula komeho nokweenda tayi koko ya thinda mokuninga iilyo oyindji kumwe naayambidhidhi yawo. Moongo ta ti oDTA, kehe esiku, otayi ende tayi ningi oonkondo na kayi na nande esiku limwe yi ka shune monima. Ta indile aanyasha yoDTA mbaka ya simaneke aaleli yawo aakuluntu nokudhimbulukwa mboka ya tetekela nale ngashi ooKlemens Kapuwo, Omusita Kornelius Ndjoba nooyakwawo oyendji. Omusamane Venani naye okwa pandula aanyasha yo DTA sho ya gongala nawa, na unene tuu sho yi itula mo mongundu yawo. Te ya dhimbulukitha kutya muuyuni oshigwana kashi na aanyasha kashi na mpoka tashi yi, onkee okukala po kwawo mo DTA oku shi yelitha kutya oDTA oya kola notayi pula komeho lela mokukaleka uudemokoli moNamibia wa kola.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.