Kashikola a yanda omapulo goshikumungu shuulingilingi mEtanga lyEgameno

OMUPEVIMINISTA gwIikwameni, Omatembu nEgameno, Daniel Kashikola, oshiwike sha zi ko okwa li a tindi okuyamukula kutya omolwashike ngoka a li omukuluntu goshimpungu shIimaliwa mehangano lyedhina August 26 Textile and Garment, Paulus Moshana osho wo omukulukadhi gwe Ester Shimwandi inaaya tulwa miipandeko natango.

Omuleli gongundu yo-Popular Democratic Movement (PDM) McHenry Venaani mOmutumba goPashigwana mEtine lya zi ko okwa li a pula Kashikola kutya Moshana naShimwandi otaya ka tulwa uunake miipandako sho taya tamanekelwa uulingilingi weyako lyoshimaliwa shoomiliyona N$25,7 mo-August 26 Textile and Garment.

August 26 Textile and Garment, ofabulika yokuhondja ya yama kepangelo ndjoka yi li kohi yelelo lyuuministeli wEtanga lyEgameno.

“Onda hala okutseya okuza kungweye ongomupeviminista, uunake to ka kwatitha po aantu mboka taya fekelwa eyako lyoomiliyona N$25,7 okuza mehangano lyo-August 26 Textile and Garment? Molwaashoka ngele otashi ya kuufuthi, epangelo ndika ohali yambidhidha aafuthi,” osho Venaani a popi ngaaka.

Keyamukulo Kashikola okwa li owala i indile Venaani a shange omapulo ge opo “tu gandje omayamukulo ge li nawa”.

Omwedhi gwa zi ko onzokundaneki ndjika oya li ya kundaneke kutya Moshana naShimwandi, ota ya tamanekwa okukala ya kengelela oshimaliwa shi li poomiliyona N$14 mehangano ndyoka lyEtanga lyEgameno.

Otaku hokololwa kutya oshimaliwa shoka, Moshana nomukulukadhi oya li ye shi longitha okulanda omagumbo moondolopa ngaashi mOvenduka, mOmbaye nomOmuthiya osho wo okulanda iihauto iheyali nembakumbaku.

Shimwandi otaku hokololwa kutya oye a li ha longo nomayalulo giimaliwa mombelewa yomusamane gwe omanga ye li mehangano lyo-August 26 Textile and Garment.

Okwa li a lundululwa mo mombelewa ndjoka yomayalulo goshimaliwa, ashike lwanima okwa li a thigi po ehangano ndyoka muFebuluali omvula ya zi ko.

Oshimaliwa shoka tashi tamanekelwa aahokanathani mboka oshi li oshitopolwa shoomiliyona N$100 ndhoka dha yakwa mehangano ndyoka.

Omwedhi gwa zi ko omutamanekindjayi Martha Imalwa okwa li a koleke kutya okwa patululila aahokanathani mboka oshipotha, shi li kohi yoveta tayi kondjitha iimbuluma ya longekidhwa – mompangu yopombanda yaVenduka – moka Moshana ta tamanekelwa uukengelelidhi, uufuthi, ekotokelo lyopashimaliwa osho wo okukala ihaa futu oompale dhepangelo.

Okwa li a gwedha po kutya keshi kutya omolwashike Moshana inaa tulwa natango miipandeko kopolisi, molwaashoka oshipotha shoka ta tamanekelwa oshinene.

Ondjayi yetanga lyopolisi Sebastian Ndeitunga osho wo omukuluntu gomakonaakono giimbuluma moshilongo, komufala Moritz Norres !Naruseb oya li ya tindi okuyelitha kutya omolwashike aahokanathi mboka inaaya tulwa natango miipandeko.

Omukuluntuwiliki gwehangano ndyoka lyo-August 26 Holdings , George Kaxuxwena, muFebuluali numvo okwa li a dhangele Ndeitunga ta pula kutya omolwashike Moshana nomukulukadhi inaaya kwatwa po natango omanga ya longa oshikoya oshinene shuufuthi, moka Kaxuxwena a popi kutya oya yaka oshimaliwa shoomiliyona N$25,7.

Ashike Ndeitunga sigo okeluwa ndika ontumwafo ndjoka ineyi yamukula.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.