KONIMA sho a kala mondholongo yopolisi uule wehuliloshiwike lya zi ko, kansela goshikandjohogololo shaKatutura shopokati moshitopolwa shaKhomas, Ambrosius Kandjii, okwa li a mangululwa sho a li a pewa ompito yokwi ifutila mo, sha landula iipotha itatu mbyoka ta tamanekelwa.
Kandjii (49), ngoka a tulilwe miipandeko sha landula oshiningwanima shoka sha ningilwe pegumbo lye moKatutura mEtitano lya zi ko, okwa li a pewa oboloha yoo-N$3 000 sho a li a holoka mompangu yamangestrata gwaVenduka moKatutura ta tamanekelwa eyonagula lyomaliko, edhengo osho wo euliko lyomuntu nondjembo.
Ompito yokwi ifutila mo mondholongo okwa li e yi pewa sho omutamaneki gwepangelo Victoria Likius a li a tseyithile mangestrata Atutala Shikalepo kutya epangelo olya gandja ompito opo kansela a pewe oboloha yoo-N$3 000.
Oshipotha shaKandjii osha li shu undulilwa komasiku 16 ga Juni omanga taku ningwa omakonaakono ga gwedhwa po. Kansela ngoka okwa li a patululilwa oshipotha sheyonagulo lyomaliko sha landula sho a li a yonagula obonata osho wo ekende lyokomeho lyoshihauto sha ningilwa mOvenduka momasiku sho ga li 19 ga Apilili.
Okwa li natango a patululilwa oshipotha shedhengo, sho a li a dhenge omukiintu noku mu ulika ondjembo pegumbo lye moKatutura komatango mEtitano.
Otaku hokololwa kutya oshiningwanima shoka okwa li sha ningwa mEtitano sha landula sho omukiintu gumwe a li a yi kaandjawo noku mu pula uuyelele kombinga yetopolo lyiikulya mbyoka tayi hawalekwa aakwashigwana miitopolwa ya yooloka moshilongo, noonkundathana ndhoka odho dha li dhe eta oontamanana pokati kawo yaali.
Konima sho a li a mangululwa mo mondholongo mOmaandaha, Kandjii okwa li a tindi okutya ko sha kombinga yoshiningwanima shoka molwaashoka okwa ti okwa hala omakonaakono gopolisi ga ningwe melandulathano inaaga yiwa moshipala.
Okwa li a gwedha po kutya, “Aantu oya sa ondjala, noya halelela iikulya. Kashi shi oshiningwanima shi li kombinga yiikwapolitika nande – oshi li kombinga yondjala.”
Okwa li a popi kutya aakwashigwana otaya pula oshimaliwa shoo-N$750 shekwathoyambidhidho lyoCovdi-19 naamboka inaaya mona oshimaliwa shoka oye wete ando shi li momake gookansela.
Kandjii okwa li a kalelwa po kuhahende Katuu Kaura miihokolola ye mompangu.
Onzonkundaneki ndjika omwedhi nguka oya kala tayi kundaneke aanambelewa aakuluntu mepangelo taya ningilwa omakonaakono sho ya pogola ooveta nenge omalandulathano, moka kansela goshikandjohogololo shEngela moshitopolwa shaHangwena, Jason Ndakunda, a li ta ningilwa omakonaakono gokuhinga e li kohi yondhungo osho wo okuhinga nuuhasha sha landula oshiningwanima moka a li a dhenge oshihauto she moshihauto sha thikama, sha ningilwa mOshikango, moshitopolwa shaHangwena mOmaandaha goshiwike sha zi ko.
Mehuliloshiwike lyopaasa, David Muluti, ngoka oye kansela goshikandjohogololo shaKongola moshitopolwa shaZambezi, okwa li a tulwa miipandeko moshitopolwa shaZambezi sho a li a pogola oompango nomalandulathano ga tulwa po kepangelo okukondjitha etaandelo lyombuto yocoronavirus (Covid-19). Kansela ngoka pamwe nomukiintu ngoka a li naye, oya li ya tulwa miipandeko sho ya li ya adhikilila taya landitha omalovu ngoka gi indikwa pethimbo ndika lyoondjindikila.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
