Kandjeke ti indile omalelo goondoolopa ga lundulule

OMUYALULINDJAYI gwiiniwe nomaliko gepangelo, omusamane Junias Kandjeke okwi indile omalelo giilando niitopolwa opo ga kwate nuukeka iimaliwa go ga longithe nawa iimaliwa mbyoka ge na, opo ga vule okugwanitha po nokwiiyutha komagunothaneko ngoka ga pewa kombelewa yomuyalulindjayi.

Pethimbo ta popitha aakuthimbinga moshigongiilonga shokutopolelathana uuyelele kombinga yomayalulo gomaliko niiniwe yepangelo shoka shi li metifa moshilandopangelo shaNamibia, Kandjeke okwa ti omalelo giitopolwa itaga kala tagi ipopile kehe ethimbo kutya elongitho lyiimaliwa olya vundakana molwompumbwe yiimaliwa noonzodhopantu, molwashoka iimaliwa ihayi gwana nando. “Iizemo yomayalulo giimaliwa yomalelo goondoolopa kayi li nando nawa.

Otu na okukonga ekandulopo lyomukundu tali kalele, shi ikwatelela koonzo dhoka dhi li po nosho wo monkalo yeliko ndjoka tatu iyadha muyo,” Kandjeke ta ti, ta gwedha po kutya ina nyanyukilwa omatompelo ngoka haga gandjwa komalelo goondoolopa dha yooloka kombinga yevundakano moolopota dhiimaliwa, molwashoka aluhe ohaga gandja omatompelo kage shi oku uvika ko, nolwindji oga faathana.

Moshigongiilonga shoka sha li sha kalwa kaanambelewa yongongahangano yomalelo goondoolopa moshilongo nosho wo aakuthimbinga yalwe, Kandjeke okwa pula omalelo goondoolopa ga fatulule kutya oga thaneka okuninga po shike opo ga shunithe oongunga dhepangelo.

“Onda hala wo oku uva kutya omolwashike iimaliwa yoompale mbyoka hayi nanwa koondjambi dhaaniilonga yamuni ihayi thikithwa kombelewa yoompale moshilongo, nomolwashike oofooloma dhoofuto dhiifendela yepangelo ihadhi udhithwa nokugandjwa pethimbo,” Kandjeke ta ti.

Kandjeke okwa popi kutya omukundu gwiimaliwa ngoka gwa taalelwa komalelo goondoolopa moshilongo otagu vulu okukandulwa po ngele omambo giimaliwa gomalelo goondoolopa otaga yalulwa nawa nopethimbo.

Okwa gwedha po wo kutya omukundu nguka otagu vulu wo okukandulwa po ngele omalelo goondoolopa oga tameke okulongekidha nawa omambo gomaliko gago agehe pethimbo. Kandjeke okwa yelitha wo kutya sho a lombwelele omalelo goondoolopa kutya itaga futu sha uuna taga yalulilwa omambo gago, ano taga yalulilwa oshali, okwa li wo e ga tseyithile shu ukilila kutya iimaliwa mbyoka ya li yi na okulongithwa mokufuta omuyaluli gwomambo oyi na okulongithwa mokudhewula aanambelwa yomalelo goondoolopa, nelalakano lyokuhwepopeka elongitho lyiimaliwa neyalulo lyomambo.

Kandjeke okwa holola wo kutya ondoolopa ashike yimwe oyo ye shi ninga, noya nkondopeka aanambelewa yawo moshikumungu shika, ngashi sha hololwa kuukwatya womayalulo galyo.

“Onda hala oku mu lombwela mpaka kutya omathaneko agehe, kutya omawanawa nenge omawinayi, kombinga yiizemo yeyalulo lyomambo giiniwe inagi ikwatelela kuukwatya womuyalulindjayi, ihe ogi ikwatelela kuukwatya welelo lyondoolopa ndjoka.

Ngele omalelo goondoolopa oga hala omadhiladhilo gomuyaluli ga yela nomawanawa, nena oge na tango okupotokonona omikundu dhoka dha tothwa mo komuyalulindjayi,” Kandjeke ta popi nomuthindo.

Kandjeke okwa yelitha wo kutya okugandja omambo giimaliwa kwa laata oku li eyono enene netaaguluko lyooveta dhoshilongo notaku limbilike.

Omuyalulindjayi okwa gwedha po wo kutya omalelo goondoolopa ogendji ohaga pula ga gwedhelwe ko ethimbo lyokuthikitha omambo gago komuyalulindjayi, ta gwedha po kutya omatompelo ngoka haga gandjwa olundji oga faathana. Paye, omatompelo ngoka oga kwatela mo okwaana aanambelewa taya vulu okulongekidha nokuyalula omambo.

“Okwiindila wu gwedhelwe ko ethimbo kehe omumvo nomatompelo ga faathana kehe ethimbo otaku holola kutya omalelo goondoolopa itaga ningi nando oonkambadhala dhokuyambula po aanambelewa yago,” Kandjeke ta gwedha po.

Mokati kaakuthimbinga yomoshigongiilonga, shoka tashi hulu nena, omwa kwatela iilyo yokangundu ke na sha noolekenenga dhepangelo, oshikondo sheyambulopo lyoondoolopa niitopolwa yokomikunda, oshikondo shiimaliwa nosho wo omahanganoyaluli gopaumwene. Kandjeke okwi indile aakuthimbinga ya yooloka opo ya ninge kehe shoka taya vulu okuninga mokukwathela omalelo goondoolopa ga nawapaleke omukalo gwelongitho lyiiniwe yago.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.