Kaansela gwoSwapo a hala AR a gunwe

KAANSELA gwongundu Swapo mOkahandja, Steve Biko Booys, okwa hala elelo lyoSwapo li ikaleke kokule nolutuhwahwameki lwelunduluko, AR, ta ti olutu nduka ongundu yopolitika ya hala okutuka onguka – ngaashi omukulugwonale a popile ta ti tashi li ekunde omekunde shi li.

Uunambo, kaansela Booys okwa koleke konzonkundana ndjika kutya okwa kwata etumwala ka e te li tumine kiikundaneki yoohungi dhoshinanena nokoWhatsapp.

“Sigo uunake ookamalanda mbaka, nenge omwa ti oolye walye, taya pitikwa ya tsikile nokunwa po ongundu yetu, oshiukithilo shetu ngashi shu uthwa kekotampango?

Ookamalanda, aaleli, ondi wete ethimbo olya thikana mu hulithe po okulela membwalangandjo,” Booys ta popi mokavidio. Okwa ti aaleli yoSwapo oya mwenena AR, itaye yi katukile onkatu. Booys okwa gwedha po kutya AR ota nu po nokutaaguluka ekotampango lyoSwapo, ta ti shoka oshi li etukano enene kiilyo yongundu Swapo.

“Okwa yelitha kutya okwa tokola a katuke onkatu ye mwene, pawuthemba we ongoshilyo shoSwapo ngashi e wu pewa kekotampango lyongundu opo a tye sha koshinima shoka u uvite kutya osha pumbwa okupotokononwa ihe itayi potokononwa.

Kaansela Booys okwe eleke AR nongundu yomppilameno yo-RDP, nokwa pula kutya ngele nani aaleli yo-RDP oya li haku tiwa oye li moondjito ya tega ya ze mo nge ethimbo lya thiki, omolwashike yo-AR itaya ithanwa ngaaka.

Booys okwa ti AR ongundu yopapolitika yi li mongundu onkwayo yopapolitika (Swapo), shoka shi li ompinge nekotampango lyongundu, ndyoka lyu utha iilyo yongundu kayi kale iilyo yongundu yilwe.

Omuleli gwo-AR, Job Amupanda, ngoka naye a mona okavidio hoka, okwa ti ndhoka dha popiwa kuBooys inadhi talika ko dhi na oshilonga.

Amupanda okwa yelitha kutya AR ke shi ongundu yopapolitika ngashi Booys ta ti, molwashoka inayi shangithwa kolutuwiliki lwomahogololo moshilongo. Nando okanona ke li mondondo 5 oke shi shi kutya opo ongundu yi kale yopapolitika, oyi na okukala ya shangithwa kolutuwiliki lwomahogololo moshilongo,” Amupanda ta tompo.

Amupanda okwa gwedha po wo kutya ke na ko nasha naandhoka dha popiwa kuBooys, ta ti odha fa ashike dhoka dha popilwe kukaansela gwokoSwakopmund Juuso Kambueshe, ngoka a li e mu halele ompolo sho a yambelwa ondondo yuukomufala molaatawiliki yaanyasha menenevi Africa.

Amupanda okwa ti ookansela yamwe oya yalula iilonga yolutuhwahwameki lwawo manga Booys i ipyakidhila ashike niinima kayi na oshilonga.

Amushangandjayi gwoSwapo, omusamane Nangolo Mbumba okwa tseyithile onzonkundana ndjika kutya Booys naye omuleli gwoSwapo, ongakaansela melelo lyoshitopolwa, onkene ke na okuyala aaleli yakwawo ombedhi kutya itaya ningi po sha sho omautho gekotampango lyongundu taga taagulukwa. Mbumba okwa ti oshi li nawa sho Booys a holola omaiyuvo geihe ngele okwa li a hala ku katukwe onkatu, okwa li e na okulandula omilandu dhoka dha tulwa po kongundu.

Mbumba okwa yelitha kutya elelo lyongundu olya yeleka nale kutya omayihumbato geni gu uka nogeni ga puka, ta ti manga yamwe ye shi uvile ko, yalwe oya li taya ti eleelo lyoSwapo otali kambadhala oku ya tidhaatidha mo mongundu.

Amushangandjayi gwo~Swapo ta gwedha po kutya kehe ngoka ta kambadhala okushundula ekotampango lyoSwapo ota katukilwaonkatu.

“Inashi talika ko kutya otwa fa to odhoka omuntu gwontumba. Natu tamekeni okusimaneka oompango dhoka twa tuleni po,” Mbumba ta ti.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.