Josef Amola ta ti ota kuthwa pehala lye ina futwapo pauvathano

OMUKALIMO gwomomukunda Omatando gotango popepi nOngwediva mOshana, Joseph Amola, kuuvite ombili molwashoka taku tiwa aniwa na ze po pehala lye ye inaa futwa natango.

Amola ota ti kutya okwa lombwelwa koshikondo shokutunga oondjila kutya na ze po pehala lye mpoka oshoka opwa enda ondjila ompe ndjoka tayi tungwa okuza pOmatando mpoka ya thinda kwaandjoka ya Adolfi, Onamutai, Ohalushu nOngha. Amola, ngoka ta ti kutya pehala mpoka okwa pewa po nale momumvo 2006 ku mwene gwomukunda gwawo, Johannes Mulongeni, ota ti kutya sho oshikondo shoondjila sha thaneka po etungo lyondjila ndjoka, osha tula ayehe ya gumwa, naye a kwatelwa mo, momusholondondo gwaamboka ya gumwa kondjila ndjika noye na okufutwa po pomahala gawo sho taya zi po ngeyi ya yapukile etungo lyondjila ndjika. Ashihe, Amola ta ti, osha li ngaa tashi ende nawa pauvathano noyendji oya futwa po pomahala gawo. Ashike nee, ohaluka , ta lombwelwa kaakuluntu yokampani ndjoka tayi tungu ondjila ndjoka yedhina Toy Construction, kutya ye ita futwa po pehala lye na yapukile ashike ondjila ndjoka oshali. ‘ Elombwelo lyatya ngawo olya uvitha ndje nayi unene nonda tokola kutya ite zi po pehala lyandje manga inaya futa ndje po, ngashi twa li twa uvathana nayo,’ Amola ta ti ngawo neyeme. Ta lombwele The Namibian kutya omolu okuuva nayi kwe, okwa tokola a tule iipeleki mondjila ndjoka pegumbo lye mpoka ongehololomadhilaadhilo kutya okuuvite uudhigu sho ita futwa po pehala lye mpoka ngashi ya li ya uvathana. Amola ota ti kutya oshikondo shoondjila, otashi ti kutya mboka taya tungu mpoka oyo ye na oku mu futa po. Ashike, Amola ota ti kutya sho a yi ko kwaamboka taya tungu omukuluntu gwawo okwa ti ye haye te mu futu po.’ Ngaye nee kandi na we ompito yimwe kayi shi ashike yokuthitika ondjila ndjoka lwopegumbo lyandje sigo taya futu ndje ngashi twa li twa uvathana,’ Amola ta ti ngawo. Pamakonaakono ga ningwa po ko The Namibian, oshi li ngeyi kutya Oshikondo shokutunga oondjila otashi popile Amola a futwe po pehala mpoka. Ashike nee oku na okufutwa kokampani ndjoka tayi tungu ondjila, yo tayi ka pula ko oshimaliwa shayo koshikondo shoondjila. Oshi li nee ngeyi kutya okampani otayi ka pulwa yi fute Amola yo yi ka pule ko oshimaliwa shayo koshikondo shoondjila. Ondjila ndjika ta yi tungwa ota yi kwatakanitha omikunda moshitopolwa sha Shana okuza pOkatana okupita mOmatando noshowo momikunda ndhoka dha gama Omatando kuuzilo noku tsa mondjila ndjoka ya tameka puAdolfi ya thinda kOngha.Aaniiyenditho ota ya kala okuza pOkatana taya yi nayo oku ya kOshikango.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.