Iyambo okwa li a ngungila – Omuthaneki

OMULUMENTU ngoka a li i inekelelwa oshinakugwanithwa shokuthaneka ohango yomupevipresidente omukulu Nickey Iyambo omvula ya zi ko ka li e shi kutya omuyakulwa gwe olye, sigo osho a thiki pegumbo ekulu lyomupresidente gwoshilongo lyopambelewa.

Omupevipresidente omukulu gwaNamibia, Iyambo, okwa thigi po uuyuni mbuka mOsoondaha ya zi ko konima yuuwehame wethimbo ele.

Iyambo okwa hulithile megumbo lye.

Okwa li a hokana Johanna Itewa momasiku 7 Apilili 2018, nokwa si konima sho a dhana oshituthidhimbuluko shohango ye oshikando shotango.

Christian Stiebahl, ngoka a li a hiywa opo a thaneke omathano gohangano yomupevipresidente gwotango gwaNamibia, okwa shanga kepandja lye lyokoFacebook kutya, nando ina lombwelwa ku na ethimbo lya gwana, oko a li koshiithanene hoka.

“Sigo otandi thiki pehala lyoshiithanene, kombelewa onkulu yomupresidente gwoshilongo moRobert Mugabe Avenue, kanda li nda tseya kutya aayakulwa yandje oolye. Nani onda li nda tegelela okuthaneka oshituthihango shomupevipresidente Nickey Iyambo ta hokana omukulukadhi gwe Johanna,” Stiebahl ta yelitha.

Okwa ti pethimbo ndyoka Iyambo okwa adhika opo ashike a thigi po oshilonga shuupevipresidente woshilongo konima yoomwedhi mbali.

“Esiku ndyoka olyo nda tsakanena nomulumentu a ngungila nomunyanyukwi. Yamwe otaa vulu okupopya kombinga yiilonga ye naashoka a pondola papolotika, ihe ngame otandi mu dhimbulukwa ongomulumentu gwomutima gwa talala nokwa li mombepo ombwaanawa esiku lyohango ye,” Stiebahl ta stikile.

Omukalelipo gwepangelo lyaNamibia koBotswana, Mbapewa Muvangua, okwa ti ota dhimbulukwa Iyambo nawa pethimbo a li a kwatela komeho osheendo shoka sha tuminwe shi yunge oontanda dhokuthikila AaSwapo sho ya galukile koshilongo mo1989, ta ti omwenyo gwe nagu vululukwe mombili.

Omukuluntuwiliki gwoshikondo shoNational Planning Commission, omusamane Obeth Kandjoze, okwa ti Iyambo okwa kondja, onkene ote mu laleke nombili.

Ngoka a li nale omukuluntuwiliki gwehangano lyaanangeshefa moNamibia, omusamane Tarah Shaanika, okwa ti opu na aantu yamwe ya longa shomupndo monkalamwenyo noya thiga ko ondjokonona.

“Omundohotola Nikey Iyambo okwa li gumwe gwomuyo. A gwa pevi, omunashili nokwa li shili i itula mo mokuyakula aantu. Namibia okwa kanitha omuntu gwomadhilaadhilo gomuule, onkoshi ‘ya talala’. Inda po nawa muleli gwetu,” Shaanika ta ti ngaaka. Omuleli gwonundu yompilameno pambelewa yoPopular Democratic Movement (PDM), McHenry Venaani, okwa tumu etumwalaka lyomahekeleko koTwitter, ta ti oku uvithwa nayi keso lyaNickey Iyambo.

Metumwalaka lye lyopambelewa, Venaani okwa ti eso lyomupevipresidente omukulu olyo edhidhiliko kutya Namibia okwa yugwa omuleli omwaanawa, ngoka a li e na olune noshigwana.

“Otandi dhimbulukwa omundohotola Iyambo a li omulumentu gwomateedho gomuule nomuleli a li a ngungila, kutya nee oku li moonkalo oodhigu. Natu mu lileni ihe natu tyapulani wo elweendothimbo lwe lwokombanda yevi. Natu shi taambeni ko kutya okwa titha ko onku ye,” Venaani ta ti ngaaka.

Omukuluntuwiliki gwehangano lyokuhalitha okawe kaNamibia, Namdia, Kennedy Hamutenya, metumwalaka lyomahekeleko, okwa ti Iyambo okwa li gumwe gwomaantu ito ya pewa lwaali mboka a longa nayo.

Okwa ti opu na oshikando shimwe e mu kwathelele mokuhumbata okakofa ke, hoka iha ka zi peke, sho ya zile moshilongo oshikando shimwe.

“Okwa landula omapendafule, aakokoli yoshitunda shomapendafule mboka ya tetekela nale. Otandi halele egumbo lye efudhitho,” Hamutenya ta ti ngaaka.

Ngoka ta popile ko oonakuthigwa po pethimbo ndika lyoluhodhi, Joshua Amukugo, okwa ti Iyambo ota ka fumbikwa momukokomoko gwiiwike iyali twa taalela, konima yoshituthihupulutho shopapangelo.

Pethimbo a ka popithile koshigumbo shanakusa Iyambo koEros moshilandopangelo, omupresidente Hage Geingob okwa tseyithile kutya Iyambo okwa yambelwa uufule, onkene ota fumbikwa kepangelo. Amukugo okwa ti oya thaneka ezimo li ka longekidhe oshituthihupulutho kOnayena, hoka kwa yambukile nakusa, ihe shika inashi kolekwa manga, molwashoka oya tegelela elandulathano lyepangelo.

Paye, ezimo otali popithwa kaantu ya yooloka, nomatumwalaka gomahekeleko otaga kunguluka okuza koombinga noombinga muuyuni, mwa kwatelwa ndyoka lya zi koSouth Africa osho wo koFinland.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.