Israel Mwandingi oku wete eethiwa nenge a dhimbiwa

OMUKWASHIGWANA ngoka a yahelwe pethimbo lyokangendjo kuusiku muumbangalantu woshilongo pethimbo lyuukoloni ota hupu nuudhigu pethimbo ndika.Israel Mwandingi [45] ngoka a li a yahwa, mu Juli 1987 pOngwediva okwa li eehamekwa komagulu , nonando ngashingeyi onkalo ye oyili hwepo. Pethimbo lyoshiningwanima shoka kuume ke komukadhona okwa li a hulithile moshiponga shoka.

Mwandingi okwa ti ye gumwe gwaamboka ya monithwa iihuna miita yemanguluko oku na wo okutalika ongo nakulwa omukulu mekondjelomanguluko. Mwandingi okwa lombwele o The Namibian kutya okwa li a thaneka oku ninga ondohotola yuunamiti ngele ando okwa li inaa mona oshiponga shoka, ndele molwasho ina vula we okutsikila ostandanda ontimulongo poseko yopombanda ya Shakati..Mwanding okwa hokololele oThe Namibian kutya oshiponga shoka sha dhipaga kuume ke komukadhona, Laina Taapopi, oshe mu thigile a lala mombete uule womimvo ndatu sho a li itaa vulu okulongitha omagulu ge. Konima sho a zi moshipangelo okwa kala ha longitha okatemba uule ishewe womimvo ndatu.Pethimbo lyoshiningwanima shoka Mwandingi okwa li ena omimvo 21, noholo ndjoka ye mu yaha oya ehameke esipa lye lyombunda noshowo ehukamugongo.Oholo ndjoka oya li ya kuthwamo sho a tandelwe moshipangelo sha Windhoek Central omumvo ngoka.Oshiningwanima shika osha li onkundana onene moThe Namibian 1987. Sho Mwandingi a mono epandja lyomapandja giifo iikulu mu Desemba omumvogu noshowo mu January nuumvo, ehokololo ndyoka olyiinyengitha omwenyo gwe, kutya ngaaka okwa tokola eli hokolole ishewe. Okwa ti sho a mono efano lye naandyoka lya Laina Taapopi, shika oshiinyengitha omutima gwe , mokudhiladhila oshiningwanima shoka , nankene she mu kanithile oompito. Okwa tokola oku hokolola ehokololo lye ishewe opo aantu ya tseye kutya oko eli ena omwenyo natango.Mwandingi iha longo pethimbo ndika na oku na aanona aashona ye li yatano.Pethimbo oshiningwanima shoka sha ningilwe , nakusa Laina Taapopi okwa li ena omimvo 17 nokwa li omunasikola po Dawid Bezuidenhout moKhomasdal. Okwa li mefudho lyosikola sho ye na Mwandingi yuumbwa kaakwiita yokatongo ya South Africa.Mwandingi okwa kala mOshakati pegumbo lya yina okuza tuu nkene oshiningwanima shoka sha ningilwe. Oku li woo omumwayina gona gwa Lazarus Gazza Shiimi.Mwandingi okwa ti okwa hala epangelo li kwathele woo aantu mboka ya monithwa iihuna kiita meni lyoshilongo ngaashi ye, ndele ha ku tala aakondjelimanguluko mboka ya li kombanda oyo ayeke. Pahokololo lyomumvo 1987 aakwiita yokatongo ya South Africa oya ti oye yuumbu koongula dhe siku 9 lya Juli 1987, sho mbaka aniwa inaa ya iyutha kelondodho lyaakwiita mboka. Ndele Mwandingi ye ota ti oshinima osha ningilwe komatango getitatu potundi 18h00 manga mbaka yaali ya li taya zi kopaati.Mwandingi okwa ti pethimbo ndyoka yo oya li ya dhiladhila kutya omautho gokangendjo kuusiku ka ga li geli miilonga mOngwediva, Ondangwa nOshakati.Oshiningwanima shika osha li sha geeyeke aakalimo yomOngwediva mboka ya li ya indile opo aakwiita ya South Africa ya zemo muumbangalantu, noshowo ya li yiindile opo okangendjo kuusiku ka kuthwepo, ko okatokolitho 435 kiigwana yahangana ka tulwe miilonga.