OMUNANGESHEFA ina pumbwa okulalakanena omauwa opakafimbo ndele na kale alushe ta lalakanene okweeta po ongeshefa tai kalelele, tai eta exumokomesho moshilongo, tai landifa oilandifomwa yongushu notai yandje omayakulo omufika wopombada, hano ongeshefa ei tai dulu okutwikila nokuxuma komesho nokonima eshi omutoti po wayo a mana oweenda wokombadayedu.
Edi oda popiwa komunangeshefa OmuNamibia a shiivika nawa Frans Aupa Indongo pefimbo leyeululo lopambelelwa longeshefa yokulandifa oihauto yoludi loToyota mOngwediva mEtine loshivike sha dja ko.
Indongo okwa popya ta ti oku na ehafo lihe shii okuyelekwa molwepatululo loshitai-ngeshefa shoIndongo Toyota mOngwediva, osho sha tungwa palongifo loshimaliwa shi fike peedola daNamibia eemiliyuna 45 lwaapo.
Okwa ti mokupatulula Indongo Toyota mOngwediva okwa hanga limwe lomomafaneko-lalakano manene o-Frans Indongo Group.
“Osha hafifa nge unene, hamolwexumokomesho longeshefa yetu alike ndele omolwaashi exumokomesho eli la etwa moshitukulwa omo ame nda dalelwa nomo nda putukila.
Ngaashi vamwe tamu shi dimbuluka nawa, opo nda tamekela ongeshefa yoFrans Indongo poshitopolwa apa, po opo nda tamekela okudilaadila okuya mounangeshefa woshili nokulwifa oluhepo noufyoona moshitukulwa shetu,” osho Indongo a ti ngaho.
Okwa popya ta ti okwa hafa shaashi ekoko longeshefa yaye otali ulikile oshiwana nokutya, omunhu oto dulu okutota ongeshefa, toi tungu po nawa, toi tula pomufika wexumokomesho, ndee toi fiye yo pomufika wa kola notau yandje omauwa, mwa kwatelwa okweeta po eemhito doilonga moshiwana nomoshilongo nande ove ou wei tamekele ku na vali eenghono ile ku li vali momwenyo.
Okwa ti ovanhu vamwe ova hala okuuda nokutya opo ongeshefa i xume komesho yo i yandje omauwa oshike naanaa shi na okulongwa po.
Omayelele aye kovanangeshefa naava va hala okuya mounangeshefa okutya, ongeshefa oya pumbwa okukala tai eta po sha shomupondo yo nai kale nomhito yokukoka, tai landifa oilandifomwa yongushu lela, ongeshefa i na omutungilo u li nawa, hano omunangeshefa ke nokutala kovanhu ava ve li puye ndele na tale koilonga ei i nokulongwa ye na kale e na omafaneko onakwiiwa ndele haku lalakanena ashike ouwa wopakafimbo.
Omunangeshefa oku na yo okutula po omilandu da yukilila dokweendifa nokutonatela ongeshefa nokukuta ovanailonga, ovawiliki novayandjimayele va pyokoka.
“Shi nene nosha fimana, yakula eekastoma doye nawa,” osho Indongo a ti.
Okwa ti ope na vamwe tava pula nokutya omolwashike ve na okutameka eengeshefa dipe paife yo onghalo yomaxupilo kai li vali nawa.
Aupa Indongo ote va kumaida ta ti, pomafimbo mawa haalushe pe na eemhito diwa domangeshefelo.
“Omangeshefelo aa e uya po pomafimbo madjuu oo haa ka eta po shihapu ngeenge onghalo ya alukile kouwa,” osho Indongo a popya.
Okwa twikila ko ta holola eitavelo oku likolelela onga omunangeshefa.
“Komesho yaaishe, ame onda itavela mewiliko nomekwafo laKalunga Omunaenghono adishe. Onda itavela meemhito diwa dokuninga ongeshefa moNamibia. Onda itavela meekastoma domoshilongo shetu.
Onda itavela moudemokoli. Onda itavela moFrans Indongo Group. Onda itavela medina Indongo. Onda itavela nonda fimaneka edina Toyota.”
Indongo okwa pandula ekalepo laCalvyn Hamman, omupedupresidente omukulunhu wehangano loihauto yoToyota moSouth Africa, ta ti Hamman okwa kufa ombinga meenghundafana doule wefimbo lile odo da twala fiyo omeululo loshitai-ngeshefa shomOngwediva.
Aupa Indongo okwa kwashilipaleka eekastoma nokuya ongeshefa otai ka twikila nokulonga noudiinini opo i yandje oilandifomwa yongushu neyakulo la denga pombada.
Oshipopiwa shaFrans Aupa Indongo sha leshwa ponhele yaye kuHileni Indongo-Ashipala.
Oshitai-ngeshefa shoIndongo Toyota mOngwediva osho oshitano moNamibia. Oshitai-ngeshefa sha faafana osha yeululwa pambelewa mOtjiwarongo mEtitatu konguloshi.
Oitai ikwao otai hangika moWindhoek, moWalvis Bay nomOkahandja.
Peyeululo opa kalwa kengafifi linene leekastoma novawiliki vopomifika da yoolokafana, mwa kwatelwa ngoloneya woshitukulwa shaShana Clemens Kashuupulwa, ngoloneya wOshikoto Henok Kankoshi, omuwiliki welelo lopamufyuululwakalo lOukwambi Ndilimani Iipumbu, ovabiishofi va pendjelwa vaElcin Kleopas Dumeni na Josephat Shanghala novanailonga voFrans Indongo Group.
Omubiishofi Dumeni oye a yeulula ongeshefa neilikano nokwa ilikanena ovawiliki novanailonga aveshe teva halele omukumo neenghono nokuyakula oshiwana shaKalunga.
Oshitai-ngeshefa shoIndongo Toyota mOngwediva oshi li pomaloobota opomashakeneno eendjila – ondjila ei ya dja kOndangwa ya finda kOshakati nondjila ei ya dja meni lodoolopa yaNgwediva.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
