Indile mu yapulilwe omagumbo – omunangeshefa

PETHIMBO ta taamba aakwashituthi sheyambeko lyegumbo noshevalo lye sho a gwanitha omimvo 81 pegumbo lye pOshipaya mOmbalantu mOmusati mOlyomakaya geti 18 Apilili 2015,

omunangeshefa a tseyika nawa tate Johannes Andjamba okwi indile ooitaali ayehe, uunene yongeleki yaKatoolika kaRoma, ya kale haya indile omagumbo gawo ga yapulwe nokuyambekwa kaapristeli opo ga kale ga gamenwa koombepo dha nyata dhuuyuni mbuka.

Pethimbo olyo tuu ndyoka, tate Andjamba okwi indile oshigwana shi kale shi na ombepo yombili, yokwiihola, yokusimanekathana noyokudhiminathana po.

“Onda hala oku mu pandula amuhe sho mwe ya tu dhaneni pamwe oshituthi sheyambeko lyegumbo lyandje nosho wo shevalo lyandje sho nda gwanitha omimvo 81 nuumvo mu Maalitsa.

Tangi, tangi sho mweya amuhe mengungo, oopata, ooseesita, ooNACAWA , aamwandje, aatekulu yandje, aakwanezimo, nuunene tuu ookuume kandje noshigwana ashihe sho mwe ya mu dhane pamwe naname iituthi yandje mbika iyali.

Tangi wo uunene koopata, pata Simon Malei, pata omukuluntu Wellem Eita – omutekulu gwandje nosho wo pata Rufus Nekondo, naye e li omutekulu gwandje, sho mwe ya mu tu ningile emisa eyapuki nokuyambeka egumbo lyandje, ano lyetu.

Tangi uunene, natu tyapuleni esiku lyetweni nawa nonombili”, tate Andjamba a taamba ko ayehe koshituthi she, mwa kwatelwa kuume ke kopothingo omunangeshefa tate Ismael Nekwaya (tate Mbulu). Tate Andjamba okwa gwedha ko ta ti aakriste Aakatoolika, oye na omukalo gwokwiindila koopata ya yambeke noya yapule omagumbo gawo, hashi ningwa uunene pethimbo lyapaasa.

Onkee, Andjamba ta ti, aakriste naya kale haya indile aapristeli ya yambeke omagumbo gawo, ngaashi te shi ningi ngeyi.

Ta lombwele oluvalo lwe kutya okwe ya hiya onomenawina ya kale peyambeko lyegumbo lye noposhituthivalo she opo e ya lombwele sha sha simana miipathi yoshigwana.

Tate Andjamba ta ti, “Onde mu ithana ndi mu lombwele mu kale mu na ohole mokati keni, mu kale mu na edhiminathanepo.

Ngame onda kala nda gumwa kiinima oyindji, mbyoka yu uvitha ndje nayi, ashike onda tokola ndi kale nda dhimina po. Onda pumbwa wo okudhiminwapo. Onde enda moondjila dhomaupyakadhi ogendji, ndele onda dhimina po. Omahewa gandje ga NACAWA, tangi sho mwa thika. Longeni uunona ohole nedhiminathanepo”, Andjamba a ti.

Meuvitho lye, pata Rufus Nekondo okwa pandula shoka sha ningwa kutate Andjamba, ta ti Andjamba okwa dhimbulula sha sha simana monkalamwenyo yomuntu sho i ithana pamwe aanegumbo, ezimo nookuume, noku ya lombwela ya kale nombili, ye holathane nokwiidhimina po mpoka ya ningathana nayi. Nekondo okwi indile aanyasha naagundjuka ya kale nombepo yokuhola, yokusimaneka noyokukwathela aavali naakuluntu yawo manga ye li momwenyo.

Teya indile wo ya kale ye na ombepo yokutunga omagumbo ongomalukalwa nokutunga wo omafamilia omawanawa.

Konima yemisa eyapuki, oshituthi osha osha popithwa kookuume nokaakwanezimo mwa kwatelwa naanona, mboka ayehe ya pandula shoka sha ningwa po naandhoka dha powiwa kutate Andjamba. Oyi indile tate Kalunga omunankondonkondo e mu yambeke nomukulukadhi gwe, meme Lahya Gideon negumbo lye alihe.

Gumwe gwomaapopi, omumbiisofi omukulu gwongeleki yaELCIN, tatekulu omundohotola Kleopas Dumeni, okwe ya halele oonkondo, ompolo nomwenyo omule kombanda yevi.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.