Inamu hepeka we aaniilonga yAangola – uuministili waaniilonga

Uuministili wAaniilonga, Iipambele yIikwafabulika nEtotepo lyIilonga owa kondema onkalo yaaniilonga yAangola mboka taya hepekwa nokuningililwa mo unene tuu monooli yoshilongo.

Aakwashigwana yaAngola olundji ohaya taaguluka oongamba pOshikango okuya moNamibia okukonga iilonga ngaashi yomomagumbo nenge yokulitha, omolwonkalo ya yaga kegonga moshilongo shawo kombinga yiilonga.

Oyendji yomaakongi yiilonga aagundjuka nolundji ohaya kala ya kwatela mo naanona mboka ye na omimvo okuza po12. Aakalimo oyendji yomonooli yoshilongo oyehole okukuta Aangola molwashoka ohaya futwa ondjambi onshona.

Ashike nande ongaaka, otaku hokololwa haya ningililwa mo kaagandji yiilonga yawo moNamibia.

Aangola mboka haya longo momagumbo nokulitha iimuna oya zi mokalungu kutya oyendji yomaagandji yiilonga yawo monooli yoshilongo ohaye ya uvanekele ondjambi yi li nawa, ashike uuna ethimbo lyokufuta lya adha, ihaya futwa ngaashi shi li pauvathano.

“Ohatu kala twa tila okuya naagandji yiilonga mboka ye li kokule noonkondo, molwashoka ohaye tukutha mpaka pOshikango noku tu fala koohambo ndhoka dhi li kokule.

“Uuna ye tu fala hoka ohaye tu thigi ko niikulya iishona, nohapu vulu okupita oomwedhi mbali nenge ndatu inaaya galukila kohambo. Uuna nee wu li kohambo hoka, ohashi kala oshidhigu okuza ko wu galukile kOshikango opo wu konge iilonga yilwe.

“Ishewe uuna aahona yetu ya galuka, ihaye tu futu iimaliwa yetu ya gwana po, nokuli ethimbo limwe otaye ku lombwele owala wu thige po iilonga ngele inatu yi hala,” osho Tito Domingo (16) a popi ngaaka.

Okwa popi kutya moNamibia okweya mo muJanuali pamwe naamwayina ye yaali aashona kuye, nelalakano lyokukonga iilonga nokwa li ya mono iilonga ayehe ya topoka.

Domingo okwa mono iilonga yokulitha momukunda gu li popepi nOkongo moshitopolwa shaHangwena.

“Okwa li nda kala ko ongame awike molwashoka aahona yandje ohaya longele kondolopa. Petameko okwa li tu uvathana ondjambi yandje yooN$700 komwedhi.

“Okwa li ya thigile ndje oshipakete shoohi noshako yepungu ndjoka ya kala po owala uule womwedhi gumwe, omwedhi gwa landula ko ogwa tameke aahona ye inaaya galukila kegumbo, niikulya okwa li ya pupo thilu, ashike nando ongaaka onkene a tsikile niilonga.

“Pehulilo lyomwedhi omutiyali aahona yandje oye ya nokufuta ndje ooN$1 000 peha lyooN$1 400,” osho Domingo a hokolola ngaaka.

Omuniilonga gulwe omuAngola, Feliciana Pinto (34), naye okwa popi kutya ohaya kengelelwa oondjambi dhawo dhokomwedhi.
“Nonande onda halelela iilonga, inandi hala okulonga pehala lyi li kokule nOshikango. Onda hala okukala popepi, molwashoka uuna wa ka mona kutya oto monithwa iihuna kiilonga nena otashi kala oshipu oku yi thiga po nowu li popepi nokushuna wu ka konge yilwe,” osho a popi ngaaka.

Omukuluntuwiliki ta kwathele gUuministili wAaniilonga, Iipambele yIikwafabulika nEtotepo lyIilonga Aune Mudjanima, okwa popi kutya aaniilonga ayehe taya longo moNamibia, kutya nee aakwiilongo, oye na okulonga monkalo yiilonga yi li nawa noyi na egameno ngaashi naanaa tashi uthwa kOveta yAaniilonga.

“Uuministili otawu kwatele po uuthikepamwe, noishewe kapu na okatongo kwi ikwatelelwa kuukwashigwana womuntu. Aaniilonga mboka ye na omanyenyeto kombinga yonkalo yawo yiilonga otaya vulu okuyapukila ombelewa yetu ndjoka yi li momudhingoloko dhawo nenge moshitopolwa opo ya kwathelwe.

“Uuna aahona ya ndopa okugwanitha po oondjambi dhaaniilonga ngaashi shi li pauvathano lyawo nena ngaaka oshaya pambambo oveta yaaniilonga.

“Uuna oshinima sholudhi ndoka sha holoka, aaniilonga oye na uuthemba wokugandja enyenyeto lyawo kuuministili. Otatu indile aaniilonga aheye, mwa kwatelwa nAangola ya longithe omayakulo ngoka hatu gandja okuza koshikondo shetu,” osho Mudjanima a popi ngaaka.