Iipotha 75 yokatoo nomayugo goshimaliwa ya ndhindhilikwa mOshana

Sakaria okwa popi kutya muule woomwedhi dha tumbulwa pombanda, aakwashigwana oya patulula iipotha 75 yomayugo, nokatoo.

Okwa popi kutya kumwe, oshimaliwa shooN$526 000 osha yugwa aantu muJuni, oshimaliwa shooN$359 000 osha yugwa aakwashigwana muJuli, omanga momwedhi gwa Auguste omwa ndhindhilikwa iipotha yaantu ya yugwa oshimaliwa shi li pooN$294 000.

Otaku hokololwa kutya aakwashigwana oya yugwa nenge ya kengelelwa iimaliwa yawo mbyoka pamikalo dha yooloka ngaashi pomashina gokuhila oshimaliwa [ATM], pakudhengelwa ongodhi kaantu mboka taye ya dhenge mokatoo opo ya tume iimaliwa yawo, osho wo okuyugwa oshimaliwa kookalyamupombo mboka haye ya landula uuna ya hili oshimaliwa sha kola meni lyombaanga.

Otaku hokololwa kutya ookalyamupombo yopangodhi ohaya vulu wo okudhengela aakwashigwana noku ya fundjaleka ya gandje uuyelele wawo woombaanga opo ya tulilwe ko oshimaliwa ya sindana, ashike lwanima ohaya haluka oshimaliwa shawo sha ndjondjwa ko.

Iiningwanima mbyoka, komanda okwa popi kutya oya ningilwa moondolopa ngaashi yaShakati, yaNgwediva osho wo yaNdangwa.

Omolwomakemo gaakwashigwana nonkalo yiipotha ya vuka yaantu taya kanitha iipotha yawo pamikalo dhokatoo nokuyugwa, Sakaria pethimbo lyoonkundathana noThe Namibian mOmaandaha, okwa popi kutya oshiwike sha zi ko okwa ningi oshigongi naakuluntu yoombaanga, mOshakati.

Okwa popi kutya sigo oompaka aafekelwa ye li po11 oya tulwa miipandeko mekwatathano niiningwanima mbyoka yomayugo giimaliwa.

Sakaria okwa popi kutya muJuli omwa lopotwa iipotha 26, muAuguste omwa patululwa iipotha 22, omanga omwedhi gwa zi ko omwa patululwa iipotha 26, osho wo omwedhi nguka shimwe, naayihe mbyoka oyi na sha nomayugo pamikalo dha yooloka ndhoka dha tumbulwa pombanda.

Shoka oshe eta iipotha mbyoka kumwe yi kale 75 muule woomwedhi ndatu dha piti. Nonande iipotha mbyoka oyi na sha nomayugo gaakwashigwana okuza poombaanga, pomashina gokuhila oshimaliwa, osho wo paukengeleledhi wokatoo kopangodhi, kapu na nande omuniilonga gwomombaanga a tulwa miipandeko e na olunyala miipotha mbyoka.

Sakaria okwa popi okwa popi kutya aanandholongo oyo unene haya dhengele aantu noku ya fundjaleka kutya otaya landitha iimuna nenge oofaalama.

“Oyendji yomuyo ohaye shi ningi ye li moondholongo. Uuna ya ndjondjele oongodhi mondholongo ohaye dhi longitha nomalalakano ngoka. Shoka osho nee she etitha opo tu kale aluhe hatu hadha moondholongo. Aantu mboka ye li moondholongo ohaya kala ye na uunongo wa yooloka, ohaya ningi omathaneko, oye na owino yomakwatathano gopaungomba, ohaya vulu okupopya omalaka ga yooloka . . . oye na omakotokelo gokupopya oshimbulu uuna ya hala okulanditha omuntu oshinima sha pamba uunafaalama paifundja, nuuna ye ku dhengele otashi vulika wi ipule kutya oto popi nomutiligane molwashoka oye na oshimbulu sha nuka po,” osho a popi ngaaka.

Sakaria okwa popi kutya aakuluntu yoombaanga oya zimine kutya opu na yamwe yomaaniilonga yawo haya vulu okukala nolunyala momayugo ngoka taga ningilwa aakwashigwana, ashike pamikalo dhimwe ookalyamupombo ohaya vulu okukala momikweyo dhomombaanga ya ambela nokutala mboka taya ningi omaindilo gokukutha ko oshimaliwa sha kola.

“Ohaya kala naantu ye li momikweyo moombaanga, naantu mboka ye li momikweyo ethimbo limwe ohaya kala nokuli aakiintu, nelalakano lyawo okutala ashike nokugandja uuyelele kooyakwawo mboka ye li pondje yombaanga okupitila muutumwalaka uufupi.”

Okwa popi kutya omathimbo gamwe aagandji yuuyelele mboka hawu etitha omuntu a yugwe oshimaliwa she ohawu gandjwa okuza kaanegumbo, kaaniilonga pamwe, nenge kwaamboka ye shi kutya omuntu ngoka ota ka hila oshimaliwa.

“Omathimbo gamwe, aaniilonga pamwe ohaya kala yeshi shi, nenge uuyelele mboka wushiwike kaanamikunda kutya omuntu okwa mona oshimaliwa shopenzela, nuuna tayi kombaanga kOshakati.”

“Omathimbo gamwe, aaniilonga yomoombaanga ohaya kala ye na mo olunyala. Opwa li oshipotha moka aanona osho wo aakwanezimo ya li ye na mo olunyala. Opu na iipotha yimwe moka ookalyamupombo kwa li ya ambela omuntu moombaanga. Oshinima shoka shegandjo lyomauyelele ohashi kala pamikalo dha yooloka. Onkene itatu vulu lela okuukilila po shimwe.”

Okwa kunkilile mboka haya humbanda iimaliwa yomwaalu ogundji okuza mombaanga ya kale aluhe haya indile ekwatho opo ya thindikilwe kopolisi.

OSHIKUMUNGU

SHA-BANK WINDHOEK

Onzonkundaneki ndjika omumvo gwa zi ko oya kundaneke kombinga yaakwashigwana 64 mboka ya ningi iihakanwa yokuyugwa oshimaliwa – kumwe shi li poomiliyona N$2,8 – okupitila muukengeleledhi womombaanga yoBank Windhoek, sha kala tashi ningwa muulethimbo lyomvula noomwedhi.

Iipotha yi li po16 yomakengelelo okupitila moombanga okwa li ya lopotwa kopolisi pokati ka Apilili 2020 najuni 2021.

Ekengelelo ndyoka otaku hokololwa lya holoka sho aaniilonga yomombaanga ndjoka ya kala haya kutha uuyelele wookastoma dhombaanga, ngaashi oonomola dhomayalulo goombaanga, oondjukithi, oonomola dhokuuboba, oononomola dhuutse woshilongo osho wo oonomola dhoongodhi, noku wu gandja komunawino ngoka oye a kala kadhenga mokundjondja ko iimaliwa – ngoka ta kongwa mekwatathano nuulunga mboka.

Otaku hokololwa kutya uuyelele mboka owa kala hawu longithwa okuya momayalulo goombanga dhookastoma okupitila pamalungula nokundjondja ko iimaliwa yoonakuninga iihakanwa komayalulo goombaanga dhawo.

Omanga omathimbo gamwe, aaniilonga yomombaanga oya kala nokukotokela mboka taya pumbwa omakwatho ngaashi aakulupe mboka ya hala okuhila iimaliwa yawo nohaye ya pula oonomola dhawo dhopaholamo.

Sho onkalo ndjoka ya tameke tayi indjipala noonkondo, ombaanga yoBank Windhoek oye eta po omukalo omupe muJuni omumvo gwa zi ko, ngoka gwa kwatele mo okupula uukwatya gwa gwedhwa uuna omuntu ta longitha omayakulo gombaanga opo ashike shi kaleke po egameno.

Okugwedha kwaashoka, ombaanga okwa li wa ya dhimbulutha nokulondodha ookastoma dhawo dhi yande okugandja omauyelele gawo gopaumwene goombaanga.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.