AANIIMUNA mboka ya tulululwa moofaalama dhepangelo moshitopolwa shaHardap oyi itsa omitse koongolo – egulu olya yela, niipongolo yoongombe dhawo oya napakana kehe pamwe moofaalama.
Oonkwandambi odha tameke tadhi si kondjala muKotoba, sha tamekele mofaalama yedhina Voigtsgrund, moka mwa tulwa aanafaalama yahamano kepangelo.
Omwaalu gwiimuna mbyoka tayi si kehe ogwe ende tagu lundulala esiku nesiku, nokwa tameke taku lopotwa iimuna iyali tayi si konyala esiku kehe.
Pethimbo onzonkundana ndjika ya talele po ofaalama ndjika mEtitatu lyoshiwike sha zi ko, oyi itsu miipongolo yoongombe ya napakana konyala kehe pamwe.
“Kehe esiku otwa ligamena kegulu, twa tegelela omvula yi hupithe iimuna yetu opo kayi se kenota,” Johannes Moritz Swaartbooi ta ti.
Swaartbooi okwa ti okwa kanitha ongombe yimwe nokatana muKotoba.
Omunafaalama omukwawo, Matheus Thomas, omusita gwiimuna yaandjawo kofaalama hoka, okwa ti muusita wawo omwa sa oongombe dhi li ine omwedhi nguka.
Thomas, ngoka opo ashike a adhika a sigula ongombe, ndjoka ya adhika ya gunda, okwa ti oya tegelela iihuna ngele omvula inayi puuka omathimbo.
Onkalo ndjika, Thomas ta ti, oya nayipikwa unene koshinano oshileeleka shookilometa ndatu lwaampoka, shoka shi na oku endwa kiimuna ya ngona noya zazama oku ka konga omeya.
Oku niwe wo uumbanda kutya iimuna yimwe otashi vulika yi dhamene menono sho tayi kambadhaka okudhinda omeya kombanda yomunoko, molwashoka ethakwa moka hadhi nu oli li pokupwiina.
“Otatu indile epangelo opo li tu yambidhidhe niikulya, tu hupithe iimuna yetu mbyoka yi li pokusa,” Thomas ta ti.
Willem Shipe okwa ti hekulu Martin Leonard okwa kanitha oongombe 29 ngashingeyi, dha sa kuukumba.
“Okapandi kamwe kolusiana ohaka gu N$90.
Ngashingeyi oshe tu ningila ondilo opo tu lande iikulya yiimuna.
Otatu tapata koomwenyo sho twa tala iimuna yetu tayi si oohiyali kehe esiku molwashoka uunapelo kawu po,” Shipe ta popi neyeme.
Opo ya hupithe iimuna yawo, Shipe ta ti, ngashingeyi aaniimuna ohaya ka kahula oonenge komulonga – Fish River – gu li popepi noMariental [Omalinda], opo ya paluthe iimuna yawo.
Sho onkalo yuulumbu nuukumba tayi ende tayi yaga kegonga, aanafaalama oyendji, ngashi Swartbooi, otaye ende taya kanitha omukumo, unene sho itaya vulu we okulanditha po iimuna yawo, molwashoka oondando dhiimuna odha gwa pevi noonkondo molwashoka iinamwenyo oya nkundipala.
EYAMBIDHIDHO LYEPANGELO
Aaniimuna oyendji oya yemba wo ekwatho ndyoka lya tulilwe po kepangelo omumvo gwa yi, lyokuyambidhidha aaniimuna mboka ya hala okulanditha po iimuna yawo yimwe, ongoshitopolwa shoomiliyona N$47 dhoka dha gandjelwe kepangelo omumvo gwa yi, nelalakano lyokukeelela iimuna yi faalelwe kuukumba.
Oshimaliwa shika osha longekidhilwa okukwathela aanafaalama mboka taya landitha po iimuna yawo, okufuta iiyenditho yokufala iimuna komahala gomalandithilo nenge kuutomeno nosho wo okuthitha omahala guunapelo.
Ngele omuntu ota landitha po oongombe dhe, epangelo otali mu pe N$400 mukehe ongombe, okuhulila poongombe 200.
Ngele omunafaalama ota landitha po iimuna mbyoka iishona, ngashi iikombo noonzi, epangelo otali mu pe N$80 mukehe oshimuna okuhulila piimuna 1 000.
Nando opu na eyambidhidho ndika, Swartbooi okwa ti ongaanafaalama, eyambidhidho ndika itali ya pe naanaa omukumo gwokulanditha po iimuna yawo molwashoka itaya mono mo iiyemo, oshoka oondando dhiimuna odha gwa pevi noonkondo.
“Otatu kambadhala nakehe shoka tatu vulu opo tu yi [iimuna] paluthe sigo omvula otayi tameke okuloka,” Swartbooi ta ti. Nando Swartbooi naanafaalama yalwe otaya galikana yo ya ligamena ngaa kegulu ya tegelela omvula yi loke, kapu na nando eshilipaleko ngele otaku ka kala omuloka omwaanawa nenge aawe.
