Iipambu yondhila ya Yemeni yi itsuwa mefuta lya Tanzania

MAFIA – Opolisi ya Tanzania oya mona oshipambu shondhila ya Yemeni ndjoka ya gu mo nokwiidhenga mefuta lya India okuza mu Comoros oshiwike sha zi ko, katalekonawa gumwe osho a lombwele oshitumikundaneki sha Reuters ngaaka.

Komufala gwoshitopolwa sha Mafia mu Tanzania, Manzie Mangochei okwa ti momidhimba 13 dhoka dha monika kuyele oshiwike shika, hatatu dhomudho odha kuthwa mo mefuta. Okadhidhiliko okashona ka shangwa ‘Deutsche Airbus GmBH’oka li wo ka adhika miipambu mbika, ya adhika okuza pokantuntu ka Mafia ke li ookilo 5000 okuza mpoka ondhila ya gwile.Aalumentu ye li yaali oya li ya kutha mo oshipambu oshinene shi li epulata omanga yamwe ya kutha mo omudhimba dha gonyenwa mooplastika. Metiyali lyoshiwike shika, Epangelo lya Tanzania olya li lya popi kutya omidhimba tashiu vulika dhaantu mboka ya si moshiponga shika, odha kala dha fugalala kombanda yomeya , pamwe niipambu yondhila ndjika.Omuntu ashike gumwe a hupu moshiponga shika na nguka okakashona OkaComoran koomvula 14, Bahai Bakari, hoka okuhupa kwako taku kumitha molwashoka ka ke shi okuyoga nawa. Aantu ayehe mboka ya li mondhila ndjika oya li ye li 153. Ondhila ya Yemen yo Airbus A3-300 oya gu mo mEtiyali tayi idhenge mefuta lya India, sho aniwa ya li ya adhike kombepo odhigu. He ya yokakadhona haka, okwa ti kutya okamonakadhona ke ka ke shi okuyoya na oka li ka ashike ka hakela kiipambu yondhila ndjika, sigo ka kuthwa mo mefuta.Aantu yamwe ye li 151 ya li mondhila ndjika, okuniwe eitaalo kutya oya sa. Ominista yOmakwatathano ya France, Alain Joyondet okwa ti okakadhona haka oka lombwelwa kutya yina ke weteke na oshiningwanitha shika ota ka kambadhala oku shi uvika.Mondhila ndjika omwa li wo aniwa aakwashigwana ya Canada, Comoros, Ethiopia, Indonesia, Morocco, Aapalestina, Aafilipeina nAayemeni.Ndjoka ondhila ontiyali yo Airbus tayi gumo nokugwila mefuta omwedhi nguka. Ondila yo Airbus A330-400 ya Air France oya li ya gumwe e tayi idhenge mefuta Atlantic, nokufaalela oomwenyo dhaantu 228 momasiku 1 ga June. Olopota yomakonakono gokutala kutya oshiponga shika osha etwa ku shika, okwa tegelelwa yi pitithwe nena.Okampani ya Airbus oya ti kutya otayi ka tuma oshipana yaakonakoni ku Comoros. Ondhila ndjika oya li aniwa ya longwa momumvo 1990 na oya kala nokulongithwa kAayemenia okuza momumbo 1999.Ooindjina dhayo odha longwa kOkampani ya Pratt na Whitney, Okampani hayi longo iinima yopautekonolondji yAamerika. -Nampa-Reuters