Iipala iikulu ya patelwa pondje yongundumutima yoSwapo

IIZEMO yomahogololo otayi hololola ekanyuko kepipi limwe okuya kepipi lya landula ko.

Ngaka omadhiladhilo giilyo yimwe yoSwapo mbyoka ya kuthile ombinga mokongelesa onene ndjoka ya hulu omasiku ngaka, sho iipala iipe, unene yaanyasha, yi iteyele mongundumutima yoSwapo.

Nando oongundu adhihe mbali dhoka dha li tadhi thigathana po, tadhi kondjele iipundi yuuleli moSwapo, odha li dhi na omukumo neinekelo miilyo yadho, iizemo yokongelesa oya kumitha oyendji.

Iizemo yomahogololo goSwapo oya kumitha oyendji, unene sho aakiintu ayehe yahetatu ya za mo nomawi ogendji mokati kiilyo ayihe, ya landulwa kuMarco Hausiku ngoka e ya pondondo ontimugoyi.

Yamwe yomwaamboka ya yi moonkundathana nonzonkundana ndjika manga omahogololo inaga tameka mOsoondaha ya zi ko oya li yu uvite kutya omahogololo gomupresidente otaga shuna mondambo.

Aatengeneki yeshunununomo lyomahogololo gomupresidente oya kwatela mo Filemon Panduleni, ngoka a tengenekele kutya omahogololo otaga shuna mo ngele omupresidente Hage Geingob ina mona mo omawi ge vule pomilongontano medhingoloko lyotango.

Aatumwa oyendji yokokongelesa oya li wo ya tegelela ongundumutima yi thikame po maayambidhi yoongundu adhihe mbali. Omusokoni gwiikwapolitika, omusamane Ndumba Kamwanyah, okwa li a hokolola uunambo kutya mboka ya dhengwa mo momahogololo oya dhengekeka, molwashoka opu na eyooloko enene pokati kiizemo yaasindani naamboka ya li taa kambadhala okukutha Geingob oshipundi shuuleli wongundu.

Okwa tumbula wo kutya okwa kumwa sho iizemo yongundumpitithi yoSwapo yu udha unene aayambidhidhi yomupreisdente Hage Geingob.

Oyendji yomiilyo yoSwapo mbyoka ya yile kokongelesa oya ti iizemo otayi holola kutya Swapo oku uka komeho.

Nando iitopolwa yimwe yomoshilongo oyo ashike ya li hayi kala yi na mo aakalelipo oyendji mongundumutima yoSwapo, oshikando shika iitopolwa iyali yokoKavango oya kalelwa po nawa, nomakuya ga ka nale mopolitika ogendji oga pingenwa po kaanyasha.

Nando iipala yomakuya ga ka nale otayi monika mpaka naampeyaka, mongundumpitithi yoSwapo omu udha iipala iipe yoomeme yoonkatu dhopevi mepangelo.

Mokati kawo omwa kwatelwa aapevinashipundi yomalelo goondoolopa, osho wo iilyo yegumbo etiyali lyopashigwana – egumbo lyokutalulula ooveta moshilongo.

Nando ongaaka, omusholondondo gwahugunina gwiilyo yongundumpitithi otagu ka ningwa ohwangalahwahwa, gwa thikama po momwaalu gwoomeme gu thike pogwootate.

Mokati kiipala iipe ya za kiitopolwa yokoKavango omwa kwatelwa kansela Rosa Kavara, oshilyo shewawa lyaanyasha Paula Kooper, omupevimeya gwaSwakopmund Maria Elago.

Yakwawo oya kwatela mo omunangeshefa Fenni Nanyeni, meya gwaRundu Verna Sinibo, ngoka a li nale meya gwaEenhana Ester Kavela, Nono Katjingisiua gwokoshikandjohogololo shaTjinene, omukuluntupitithi gwopakathimbo gwelelo lyoshitopolwa shaHardap Theresia Basson naLoise Garoses gwokoKavango East.

Momusholondondo omu na wo edhina lyomupevikuluntuwiliki gwewawa lyaanyasha yoSwapo Mary Masule osho wo lyomunashipundi gwelelo lyondoolopa yaLiidelitz Helaria Mukapuli.

Iilyo iipe oya pingena po iilyo iikulu, ngaashi omukuluntuwiliki gwoshikondo shiikwameni Pendukeni Iivula-Ithana, ominista onkulu Rosalia Nghidinwa, omupeviminista omukulu Petrina Haingula, osho wo omunangeshefa Martha Namundjembo-Tilahun.

Mongundumutima omwe ya wo omunashipundi gwolaata yaanyasha yopashigwana Mandela Kapere, omunangeshefa Tobie Haupindi osho wo Bonifatius Wakudumo gwokoKavango East.

Mokati kiilyo iikulu mbyoka ye endwa pomunkulo kuukwashilyo wongundumutima yoSwapo omwa kwatelwa omukuluntuwiliki gwoshikondo shiipambele yaagundjuka Jerry Ekandjo osho wo omuprima-minista omukulu Nahas Angula, mboka ya li taa kondjele oshipundi shuupresidente wongundu nomuleli gwoshilongo Geingob.

Helmut Angula, ngoka a li ta kondjele oshipundi shuupevi-presidente wongundu osho wo ominista onkulu yoshikondo shuundjolowele Richard Nchabi Kamwi naye okwa patelwa pondje yongundumutima.

Omukuluntuwiliki omukulu gwoshikondo shelongo, omusamane David Namwandi, omupevikuluntuwiliki omukulu gwoshikondo shoomina niikwankondo Henock yaKasita, ngoka a li nale omukuluntuwiliki gwoshikondo shiikwamina Isak Katali, omupevikuluntuwiliki gwoshikondo shiikwahi noonzo dhomefuta Chief Samuel Ankama, ominista onkulu yiipambele yaanyasha Kazenambo Kazenambo, ominista onkulu yoshikondo shokwaandjaganeka uuyelele Joel Kaapanda, omupevikuluntuwiliki gwoshikondo omukulu Petrus Iilonga, ominista onkulu Willem Konjore osho wo ominista yoshikondo shiipindi Immanuel Ngatjizeko nayo kaa shi we iilyo yongundumutima yoSwapo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.