‘Ihatu popile omulumentu tayi miihulo namukwawo’

KOMUFALANDJAYI gwezulonkalo lyoondholongo moNamibia, Raphael Hamunyela, mOmaandaha okwa popi kutya ngele oya gandja ookondoma moondholongo nena otashi vulu okugandja etumwalaka moshigwana kutya aanandholongo ye li mo taya yi miihulo moondholongo.

Okwa popi kutya aapambele yaanandholongo shoka itaye shi taamba ko nuupu okumbilipalela kutya aapambele yawo oye li mo taya yi miihulo.

Hamutenya okwa gwedha po kutya na meitaalo lyAakriste, ihulo yaantu yuukwashikekookantu ihayi popilwa.

“Pambepo, tse ongaaKriste, otushi kutya iihulo pokati kaalumentu oyi li ompinge neitaalo lyetu. Ihatu popile nande omulumentu tayi miihulo namukwawo,” osho a popi ngaaka.

Moonkundathana noDesert Radio kombinga yoshikumungu shokufala ookondoma moondholongo , Hamunyela okwa popi kutya ookondoma oshinima sha simana lela okukaleka po uundjolowele miiihulo, ashike okuya mihulo nomuntu guukwashikekookantu wafaathana, oshinima sha puka.

“Gamwe gomomaupyakadhi oongoka kutya aanandholongo oye wete kutya ngele otwe ya pe ookoondoma nena otwa fa tatu tseyithile oshigwana kutya aanandholongo mboka ye li moondjedhililo dhetu oye li mo taya yi miihulo. Itandi shi tindi kutya kamu na iiningwanima mbyoka yiihulo. Okuya miihulo nomuntu guukwashikekookanty wa fa woye kashi shi oshikoya ashike oshinima owala sha puka,” osho a popi ngaaka.

Komufalandjayi okwa gwedha po kutya iihulo moondholongo oshipotha lela oshinene naanambelewa olundji ohaya ningi omakonakono uuna ya yakula omatameneko giihulo pokati kaalumentu.

Okwa lombwele oDesert Radio kutya moomvula dha piti momazulonkalo goondholongo inamu lopotwa omakwatonkonga.

“Katu na iipotha yomakwatonkonga momazulonkalo goondholongo. Muule woomvula odhindji dha piti, itandi dhimbulukwa mwa ndhindhilikwa omunandholongo a kwatonkonga mukwawo,” osho a popi ngaaka.

Pokati mpoka, omunandjungu guuthemba womuntu Nicodemus ‘Mama Africa’ Aoxamub okwa kondema shoka sha popiwa kuHamunyela nokwa popi kutya konima yoomvula 32 oshilongo sha manguluka onkene aantu ya thindilwa kongudhi nokukala inaa ya pewa iipumbiwa yuuthemba wawo.

Mama Africa ngoka eshiwike nawa mokupopila omashenge moshilongo, okwa popi kutya egandjo lyookondoma moondholongo olya simana mokukaleka po uundjolowele waanandholongo yaalumentu mboka taya yi miihulo – unene tuu mekeelelo lyombuto yoHIV/AIDS.

Okwa popi kutya omaitaalo gopambepo inaga longithwa ongeipopilo lyokupatela pondje uundjolowele waanandholongo mboka taya yi miihulo moondholongo.

“Oshinima shoka ina shi tulwa mumwe neitaalo lyopambepo, oshoka uukwambepo nasho kashi shi oshiAfrika. Onkene natu dhiladhile paumwene ongAafrika opo tu keelele aantu yetu mboka ye li moondholongo kaaya kwatwe kombuto yoHIV/AIDS,”osho a popi ngaaka.

Mama Africa okwa popi kutya sigo oompaka inaku ningwa nande omapekapeko gomuule ku monike kutya uuwanawa washike tawu vulu okwe etwa po uuna aanandholongo ya kalekwa megameno okupitila miigamenitho yopamilalo.

Onkene okwi indile Hamutenya a lundulule omadhiladhilo ge nokukwatela komeho etokolo lyokugandja ookondoma kaanandholongo osho wo iipumbiwa yilwe mbyoka taya pumbwa uuna taya yi miihulo.

ENGUNDUMANO MOONDHOLONGO

Hamunyela okwe ekelehi wo omapopyo kombinga yomandiki goondholongo moshilongo gu udha noonkondo.

“Omolwomukithi gwocorona, otwa taalelwa komashongo omanene, molwashoka omandiki gomazulonkalo kaga li ga tungwa pamukalo gokukala ga pititha po omwaka pokati kaandholongo. Ashike nando ongaaka, shoka itashi vulu okutalika ko kutya omu na engundumano lya pitilila. Kamu na nande endumbakano,” osho a popi ngaaka.

Hamunyela okwa yelitha kutya ethimbo limwe aanandholonho ohaya vulu okulala pomatalashe ge li polupanda naashoka ohashi etithwa komathaaneko ga nkundipala, oshoka aanandholongo omathimbo gamwe ohaya etwa mondjeedhililo yimwe oyendji pethimbo limwe.

Okwa popi kutya, uuna yi iyadha ye li monkalo ndjoka ohaya ningi omalunduluko mbala opo ya shilipaleke kutya aananandholongo oya tuminwa koondholongo ndhoka dhi na ehala moshilongo.

“Omandiki getu gomazulonkalo kumwe agehe oge na omahala gokukala aanandholongo ya konda po5 000 ashike omwaalu ngoka tu na ihagu kondo poo4 000, onkene aluhe ohatu kala nomahala ga manguluka ga konda poo1 000. Katu ma nande endumbalo,” osho a popi ngaaka.

Hamunyela okwa lombwele oDesert Radio kutya iilwitho ya nika oshiponga ngaashi oombele, natango onkene hayi vulu okwiitsuwika manandholongo moondjeedhililo.

“Otushi kutya ohayi pitithwa nokwe etwa mo kaandholongo yetu, kaakwashigwana uuna taye ya oku ya talela po osho wo ethimbo limwe kaanambelewa yetu. Mboka owo wumwe womomashongo ngoka tu na. Iilonga ya puka, uuna aanambelewa yetu ya taamba oombumbo nokudhimbwa iinakugwanithwa yawo,” osho a popi ngaaka.

Ashike nando ongaaka, Hamunyela okwa popi kutya ohaya kambadhala mpoka taya vulu okuhadha kehe gumwe pethimbo te etwa mondjeedhililo, osho wo aanambelewa yopolisi yondholongo ohaya hadhwa uuna taya yi momudhingokolo gwondjedhililo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.