Hidipo Hamutenya ota ti po hwepo – omonamati

KONIMA sho a kala mombete yuuwehame moshipangelo shopaumwene shedhina MediPark mOngwediva konyala uule wiiwike itatu, ekuwa lya ka nale mopolitika, tatekulu Hidipo Hamutenya okwa tuminwa nanelomba lyomushindi gwepilangi koshipangelo kOwindhoek.

Sho a tokola okugandja uuyelele kombinga yonkalo yuukolele wahe – HH ngashi a tseyika nawa – Kela Hamutenya okwa ti onkalo yahe otayi galukile kuuwanawa.

“Ota ti po hwepo. Okwa tuminwa koWindhoek.”

Kela okwa gwedha po wo kutya nando ota ti po hwepo, he ke li naanaa monkalo yi li nawa, onkene itaku pitikwa manga a talelwe po.

“Oondohotola inaya hala puye pu ye aantu oyendji molwuumbanda wokupewa uuvu,” Kela ta ti.

Kela okwa koleke kutya koshipangelo shokoWindhoek he okwa tuminwa ko nondhila.

Engwangwano olya holoka koFacebook ongulohi yEtitatu sho omukuluntuwiliki gwehangano lyoNamRights, omusamane Phil yaNangolo a tseyitha kutya “gumwe gwomookadhenga miita yekondjelomanguluko ngoka edhina lye inali tumbulwa okwa hula ko.”

Muuyelele wa gwedhwa po koFacebook, Ya Nangolo okwa ti “omulumentu nenge omukiintu ngoka okwa hulithile mokakilinika ka simana, moka ependa ndika lya li lya taambelwa, konima yowili lwaampoka.”

Sho a pulwa mEtine lyoshiwike sha zi ko, Ya Nangolo okwa yamukula kutya ke na uuyelele ngele omulumentu nenge ngoka okwa sa nenge oku na omwenyo, konima sho a tuminwa nondhila koshipangelo shokoWindhoek, ta gwedha po kutya okwi inekela kutya oku na omwenyo.

Ya Nangolo okwa gwedha po wo kutya onkundana oya pitithwa kaaniilonga yuundjolowele mboka ya yi montala moka mwa kala omuvu ngoka, nasho ya dhimbulula kutya ke mo, oya dhiladhila kutya pamwe okwa hulitha.

Lwopokati mpoka, Ya Nangolo ta ti, oshe ya puuyelele mEtitatu kutya omumvu ngoka okwa kuthwa mo mokakilinika moka a tuminwa koWindhoek, ihe okwa nika uunkundi.

Ndhika Ya Nangolo okwe dhi popi mEtine lyoshiwike sha zi ko.

Omukuluntu gwoNamRight okwa popi wo kutya okwa li a tokolo a ka talele po omumvo ngoka.

Petameko lyoshiwike sha zi ko, onzonkundana ndjika oya li ye endulula shoka ya lombwelelwe kungoka a li nale omunashipundi gwomutumba gwopashigwana Theo-Ben Gurirab kutya HH ote ende ta ti po hwepo moshipangelo shaNgwediva MediPark.

Hamutenya okwa li a falwa meendelelo kOngwediva MediPark sho a kambukile pohango yomupambele gwe.

Gurirab, ngoka oye ashike a li omunapolitika a popi memanguluko kombinga yonkalo yaHamutenya, okwa li a popi kutya ngoka a li nale omupresidente gwo-RDP okwa li ta galukile kuuwanawa kashonanakashona.

Konima sho a popi kutya Hidipo okuume kawo nomupresidente Hage Geingob, Gurirab okwa ti okwe mu yuulukwa noonkondo.

Hamutenya okwa shuna moSwapo sho a ndopa okusindana po oshipundi shuupresidente wo-RDP.

Hidipo Hamutenya okwa valelwa mOdibo moshitopolwa shaHangwena momasiku 17 Juni 1939, noku na onkatulongo yo-M.A miikwapolitika.

Onkatulongo ndjoka okwe yi mono koMcGill University Montreal koCanada.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.