Hauwanga a tokolelwa a fute eemiliyona N$50

Omunangeshefa Benjamin Hauwanga, omukulukadi waye nehangano lavo ove na okufuta oshimaliwa shi fike peemiliyona N$50 koNedbank Namibia, elombwelo lomhangu yopombada yaVenduka osho la ti ngaho Etitano.

Kombinga yetokolo la ningwa komupanguli ta vatele Deon Obbes, Nedbank Namibia okwa findana po oshipofa shokufutwa eemiliyona di li N$50 kuHauwanga, omukulukadi waye, Mirjam Hauwanga nehangano ledina BH Properties.

Omaliko atatu ihaa tembulwa, e li mOvenduka nokOshikango, nao paife otaa dulu okulandifwa po opo ku monike oshimaliwa eshi shi fute eengunga daHauwanga dombaanga, konima Obbes a mona kutya omaliko otaa dulu okulandifwa po.

Obbes natango okwa yandja elombwelo kutya oishoshela yeepelesenda 14.8 kodula, tai valulwa okudja momafiku 21 Oktoba 2022, nai futwe fiyo oimaliwa ei ya futwa aishe.

Epangulo eli li li ominge naHauwanga okwa li la yandjwa konima yomafiku avali eshi kwa li a pewa efimano kepangelo laAngola koshitukulwa shaCunene molwekufombinga laye meyambukepo noilonga yaye iwa moAngola.

Ombaanga oya twala Hauwanga, omukulukadi waye nehangano loBH Properties CC komhangu yopombada yaVenduka muDesemba 2022.

Omhangu okwa li ya lombwelwa kutya Nedbank naHauwanga okwa li va ya meudafano lomukuli muJanuali 2021.

Omunambelewa mukulu woNedbank oo a yandja oumbangi momhangu ponhele yombaanga okwa ti, ombaanga tete oya pa Hauwanga omukuli woshimaliwa shi fike peemiliyona N$5 muSeptemba 2018, nomwaalu ou owa ka wedelwa fiyo opeemiliyona N$15 omwedi oo tuu oo, Obbes osho a ti ngaho mepangulo laye.

MuMarsa 2019, Hauwanga natango okwa ninga eindilo lomukuli u wedelwe fiyo opeemiliyona N$30, taku landula eindilo lomukuli natango u wedelwe fiyo opeemiliyona N$45 muJuli 2019.

Pondodo ei Hauwanga okwa li a itavela kutya omukuli ou weemiliyona N$45 otau i kedina longeshefa i li kOshikango, oyo kwa li vati pefimbo opo i na ongushu yeemiliyona N$180.

Hauwanga natango okwa ninga vali eindilo lomukuli waye u wedelwe okudja peemiliyona N$45 fiyo opeemiliyona N$49, muFebuluali 2020, Obbes osho a ti ngaho.

Mo2021, ombaanga oya pula omikanda okudja kuHauwanga, mwa kwatelwa omikanda doshimaliwa deengeshefa ndee tai mu lombwele kutya ngee ine shi ninga omukuli otau ningululwa. Ombaanga oya ti omikanda kakwa li nande da yandjwa.

Ombaanga natango oye mu lombwela muNovemba naDesemba 2021 kombinga yoishoshela oyo i na okuwedwa komukuli, mangha oishoshela oyo kwa li i na okufutwa inai futwa muDesemba 2021.

MuNovemba 2022, ombaanga okwa li ya tumina Hauwanga omukanda tai pula a fute oimaliwa oyo ya shaala ko, oyo momafiku 21 Oktoba kwa li ya fikama peemiliyona N$50.

Obbes mepangulo laye okwa popya kutya ombaanga okwa li tai dulu okupula Hauwanga a fute keshe efimbo ngee okwa dopa okuwanifa po eudafano lavo.

Obbes okwa ti ombangi oyo ya yandja oumbangi ponhele yombaanga oya ti, Hauwanga okwa dopa okuwanifa po eudafanao lavo nombaanga lokufuta oishoshela yomukuli ndee osho osho sha fininika ombaanga i ningulule oshinima eshi.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.