Hatuikulipi a adhika nongodhi yopeke mondholongo

OMUFEKELWA moshipotha shoFishrot James Hatuikulipi otaku hokololwa a adhika nongodhi yopeke mondjeedhililo yoWindhoek Correctional Facility, mEtiyali, naashoka osha kolekwa komukuluntu gwondholongo ndjoka, omupevikomufala Veikko Armas.

Nonande ongaaka, Armas, okwa popi kutya keshi kutya ongodhi ndjoka yoSamsung oye ende ngiini yi thika momake gaHatuikulipi, ashike omakonakono oge li metifa.

Okwa gwedha po kutya omolwongodhi ndjoka a adhika nayo, Hauikulipi ota ka holoka miihokolola yomaihumbatonayi giilonga inaa yi pitikwa mondholongo sho a pititha ongodhi.

“Uuna omakonakono ga manwa, ota ka ningilwa iihokolola yomaihumbatonayi,” osho a popi ngaaka.

Shika osho oshikando oshititatu Hatuikulipi ta adhika nongodhi mondholongo okuza nkene a tulilwe konima yekumba muNovemba 2019.

Petameko lyomvula ya zi koHatuikulipi osho wo minista omukulu guuyuuki Sacky Shanghala, okwa li ya adhika noongodhi mondholongo.

Mo2020, Hatuikulipi nomupambele Pius Mwatelulo – ngoka naye omufekelwa gwoFishrot e li mongali – okwa li ya adhika noongodhi.

Oveta yOondholongo inayi pitika ongodhi yi falwe mondholongo komuntu ngoka a tulwa mondjeedhililo paveta.

Komufala gwoondholongo moshilongo, Raphael Hamutenya, okwa lombwele onzonkundaneki ndjika omvula ya zi ko kutya oya koneke aanandholongo oyendji haya pititha iingangamithi noongodhi noku yi fala moondjeedhililo nolundji ohaye shi ningi, ye dhi ihitika.

Hamunyela okwa popi kutya konyala kehe esiku mwa hadhwa moondholongo omu na okwaadhika oongodhi.

Okwa li a lombwele iikundaneki kutya mezulonkalo lyondholongo yaVenduka okwa li mwa adhika oongodhi dhi li po1 000.

Hamunyela okwa li a gandja oshiholelwa shoka ya ndhindhilike shomunandholongo ngoka a hulile moshipangelo nokumona etando sha landula sho a li i itula ongodhi niingangamithi kendjandja lyokonima.

“Omunandholongo ngoka okwa mono etando sho i itula ongodhi yopeke noopela dhiingangamithi mendjandja lyokonima. Onkene ongodhi okwa li ye mu thitike shoka she eta opo kaavule okuya mepya uule womasiku gaali,” osho Hamunyela a lombwele iikunandeki ngaaka omvula ya zi ko.

Okwa li a gwedha po kutya otaya fekele kutya omunandholongo ngoka okwa li i itula iinima mbyoka pethimbo a li a falwa koshipangelo pwa piti iiwike itatu.

Hamunyela okwa popi kutya omathimbo gamwe aakwanezimo yaanandholongo oyo haya kwathele mokugandja nokupititha oongodhi niinima yilwe yi ye mondholongo okupitila ngaashi miikuki, oombimbeli nasho tuu.

“Ohaya tete mo omapandja [moombimbeli] nokuholeka iinima mbyoka inaa yi pitikwa, nohaye yi etele aanandholongo ongomagano. Olundji ito dhimbulula po sha ngele omu na shilwe sha tulwa mo,” osho a popi ngaaka.

Hatuikulipi okwa talika ko ongomudhaninkandangala omunene gwompangela yegandjo lyoombumbo moshikondo shoohi shoka shi shiwike nawa nedhina Fishrot moka oshimaliwa shoomiliyona odhindji kwa li sha gandjwa kaanapolitika naanangeshefa mboka ya pambathana nenge ookuume, opo ya gandje omikanda dhokuyula oohi kehangano lyokoIceland.

Yalwe yomaafekelwa mboka ye li mongali ya tegelela iihokolola moshipotha shoFishrot omwa kwatelwa minista omukulu gwoohi noonzo dhomefuta Bernhard Esau, oshitenya she Tamson Hatuikulipi, omukuluntuwiliki omukulu gwo-Fishcor Mike Nghipunya, Otniel Shuudifonya, Phillipus Mwapopi osho wo Nigel van Wyk.

Omufekelwa omukwawo, Ricardo Gustavo, okwa li a mangululwa mo mondholongo koboloha pehulilo lyomvula ya zi ko.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.