Hatse nande twa tsitsimika aalongi ya ye mekanka

PETHIMBO ta popitha iilyo yoRDP poshituthivalo shoomvula ntano shongundu ndjoka mOngwediva molyomakaya ga zi ko, amushanga gwOmauyelele nIinyanyangidhwa Jeremia Nambinga okwa ti shoka sha popilwe kOministeli yOmapangelo gOpaitopolwa, Omagumbo nEhumithokomeho lyIitopolwa yokomikunda Jerry Ekandjo omasiku ga zi ko kutya oompilameno, odho dha tsitsimike aalongisikola ya ninge ekanka, kashi shi shoshili na Swapo ota yi kongo ashike omaipopilo sho ya nyengwa okulela nokupa aaniilonga iimaliwa yili hwepo.
Nambinga ota ti, aalongisikola aantu ya longwa, ye noondunge na kaye shi aakwatwa keti nande. Ano, hayo yokulombwelwa shoka ye na okuninga naashoka kaye na okuninga.

Onkee RDP ke na mo sha nande mekanka lyaalongi ngashi Ekandjo a ti.Nambinga okwa ti wo kutya Ekandjo okwa ti RDP ke na we aayambidhidhi noku li pokusa. ‘ Ekandjo ota popi ngiini ngawo. Kombinga yimwe ota ti, RDP okwa hongolola aalongisikola. A hala kutya aalongi sikola nani oya RDP. Ye kombinga yimwe ta ti ishewe RDP ke na aalanduli. Ngele nani, okwa lombwela aalongi ya ninge ekanka ndele taye shi itaale, ndishi nani oosho aayambidhidhi yo RDP,’ Nambinga ta ti ngawo nokugwedha po ta ti Swapo nEpangelo lye oya faila okulonga muuwanawa woshigwana sha Namibia. Oya faila okulonga muuwanawa waaniilonga moNamibia, na onkee aaniilonga taya uhala taya ningi omakanka , taya pula iimaliwa. Taya pula ya gwedhelwe iimaliwa molwashoka oye shi wete kuyo yene nkene oontumba noontumba oyo ayeke taya li nawa mepangelo lya Namibia, omanga oyendi taya mono iihuna.Nambinga ota ti kutya oRDP yawo ndjoka, ya gwanitha ngashiingeyi omimvo ntano okuza sho ya totelwe omumvo 2007, oya lundulula nokuholola oshindji shoka sha li sha futama, nosha kala hashi longithwa koSwapo, ano kaawiliki yamweyamwe moSwapo opo ya kale taya li nawa manga oshigwana tashi mono iihuna. Ta ti sho ya tota po oRDP, oye yi tota po sho ya kala tayi ipula onakuyiwa yoshigwana kutya oya uka naanaa peni na otayi ka kala ngiini.Ta ti oya kala tayi ipula onkalo yankundipala yuuhaku, yelongo noshowo yokwaaniilonga mokati koshigwana kohi yepangelo lyoSwapo. Nambinga ta ti uuhaku moNamibia owa thikama patatu. Pu na waayamba naaleli, unene mboka yoSwapo noshowo mboka waaniilonga nowaathigona. Nambinga ta ti mboka waayamba naaleli, ou li lela nawa, ashike mboka waaniilonga inawiihwapo nande omanga oshigwana oshindji oshithigona tashi uhala tashi mono iihuna piipangelo mpoka. Tashi uhala shi li momikweyo sho itashi pangwa nawa .Kombinga yEhongo, Nambinga ota ti ndika oli li mevundakano, nomolwasho naalongi yoyene ye shi dhimbulula nokuninga ekanka ngawo. Nambinga ota ti kutya nonando haku popiwa kutya elongo lyopetameko ihali futwa, hasho nande, oshoka aavali onkee taya pulwa ya futile elongo lyaanona yawo mooprima nomooseko moka, sigo okiiputudhilo yopombanda.Ta ti wo kutya oshinima shuunona hau pitithwa wo inau pita kwali, kasha li mondjila notashi vulika sha kuthwa po konima sho RDP ye shi popi mo.Nambinga ta ti, Namibia oshilongo oshiyamba, shi na oonzo odhindji dhopaliko ndhoka dha pumbwa okulongwa mo nokuhumitha komeho oshilongo naantu yamo, ashike elongo lyoshigwana itali ende nawa, kumonike ooindjinia dhokolela nosho tuu dhi longe mo eliko lya Namibia li kwathele oshigwana nokuyambula po oshilongo. Ta ti, moshilongo omu na iimaliwa, ashike nee otayi liwa po koohandimwe.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.