Hage a palelwa ondjila

ONGUNDUMUTIMA yoSwapo oya palele Hage Geingob ondjila opo a landule Omupresidende Hifikepunje Pohamba, uuna a zi ko koshipundi.

Oshigongi shongundumutima sha gongalele ehuliloshiwike lya piti osha zimine, oompango thaneko oompe nomilandu omipe nkene taku hogololwa aaleli, noku ulika shuukilila omukanka gwokutula aaleli kiipundi mongundu.Momushangwa ngoka amushanga-Ndjai gwo Swapo, Pendukeni Iivula-Ithana a ulikile aatoolinkundana mOsoondaha, ota ku tiwa omukandidate guupresidende e na okuza mokati kaaleli yane mboka yeli komutse gwongundu, shi ikwatelela kiipundi yawo. Omusindalandu gwomomushangwa ngoka okwi itaalwa, otagu ka yanda eendululo lyomahogololo guupresidente woSwapo pethimbo lyOkongresa yomumvo-2004, mboka wa li wa kondjelwa ku Pohamba, Hidipo Hamutenya ngoka a ka tota opaati yo Rally for Democracy and Progess (RDP), noshowo kOmuprimaminista Nahas Angula. Pamushangwa nguka ngele omupresidende e li koshipundi ina vula okushuna koshipundi molwaasho ethimbo lye lyoomvula omulongo olyapwako, nena Omupevipresidende gwongundumpangeli oye e na okuninga okandidate yOpaupresidende.Ngele Geingob okwa kala natango omupevi presidende konima yOkongresa yo Swapo yomumvo-2012, nena oye taka ya momahogololo gopaupresidende gomomumvo-2014. Nongele nee Omupevipresidende gwoSwapo ita vulu, nena amushanga-Ndjai oye te mulandula, na ishewe ngele amushanga-Ndjai ita vulu, omupeha gwe oye ta landulako. Iilyo ayihe yongundumutima oya koleke omushangwa nguka, nosho ngeyi ya nkondopeke omukalo gwomahogololo gopaudemokoli mokati kaakwaSwapo ayehe Ithana a ti pethimbo ta lombwele iikundaneki.Omushangwa ogwa ndjandjukununa wo omikalo tadhi landulwa okuulika iilyo yongundumutima, Opolitburo, omahogololo paitopolwa, paikandjo, paitayi,noshowo pasection meni lyongundu tayi pangele.Omushangwa ogwa ulika wo nkene ku na okweendwa opo oshilyo shongundu shoka inaa shi longa nawa mepangelo nenge ongomuhogololwa shina okupukululwa.Ithana tati omushangwa otagu ka keelela oompata kombinga yomahogololo mongundu.Etaambeko lyomushangwa nguno olya landula, omaindilo ngoka ganingwa kewawa lyaagundjuka yoSwapo, SPYL, ko Politiburo noko ngundumutima yi gandje omusholondondo gwaa ulikwa hogololwa mboka ye na okuhogololwa piipundi ine yokomutse gwoSwapo, pOkongresa kehe. Ewawa lyaagundjuka olya ti, ina li hala ku endululwe shoka sha ningilwe pethimbo lyoKongressa ya gwedhwapo moma-2004 sho, Pohamba, Angula na Hamutenya ya li kondjithathana. SPYL okwa hala uudemokoli ta u wilikwa mpono, uwanawa wongundu owo wu na okuya tango kombanda yuuwanawa wopaumwene.Sha landula Okongresa yoSwapo ya gwedhwapo yomoma-2004 , oSwapo oya kala ya taalelwa komatopoko shono sha e ta sigo oompoka yamwe yomaaleli yongundu yazemo e taa ka tota po RDP. Pamathimbo ngano SPYL okwa ti okwa hala wo okandidate dhopaupresidende dhi ze maawiliki yane mboka ye li komutse gwongundu, opo elelo lyeende nawa. Swapo okwa tegelelwa a kale omukondji omunene mOmahogololo ga Novemba na Pohamba okwa tegelelwa a hogolulwe, kakele oku na okugandja oshipundi shuuleli woparty komupevi presidende mokati koomvula dhe ntano dhahugunina dhuupresidende waNamibia. Sho Geingob a ulikwa ongo mupevi presidende gwoSwapo mu Novemba 2007, The Namibian oya tile ye oku li omulanduli, na oku li popepi no ku kuthako uuleli woSwapo. Osha li e uliko lyuukilila, nokutya Geingob oku li popepi nokuninga omulanduli gwa Pohamba mo ku lela oshilongo. Oshigongi sholyomakaya osha li sha kalwa komutoti presidende gwongundu Sam Nujoma. Geingob okwa li a ulikwa kOminista yUuyuuki Iivula-Ithana ngoka ngashiingeyi e li Amushanga-Ndjai gwoSwapo, na oye ta vulu okuninga Omupresidende gwoSwapo uuna Geingob ina vula oku taamba ehala ndyoka pamautho omape ga tumbulwa pombanda.