Euliko lyaantu ye li amunkele moklaba yomOvenduka

.. Ndeitunga a nyana aaunganeki yoshiningwanima shokaONDJAYI yetanga lyopolisi moshilongo, Sebastian Ndeitunga okwa nyana euliko lyaantu ye li amunkele ndyoka lya li moklaba yomOvenduka mOlyomakaya ya zi ko, nokwa popi kutya “shoka oshikoya sha pumbwa okukatukilwa onkatu meendelelo”.

Ndeitunga ndhoka okwe dhi popi mEtitatu pethimbo ta yamukula kombinga yoshituthi sheuliko lyaantu ye li amunkele shoka sha ningilwa moklaba yomOvenduka yedhina XS Lounge. Euliko ndyoka otaku hokololwa lya ningwa kaakiintu yaali, gumwe anuwa okwa yambukile koSouth Africa nomukwawo omuNamibia noya li taya ulikwa movidio komalungula pethimbo taya ulike omalutu gawo, oklaba ndjoka otaku hokololwa ya li wo yu udha pethimbo ndyoka.

Ndeitunga, ngoka mongashingeyi e li moLuanda sha Angola, okwa popi kutya oklaba ndjoka otayi ya yi shi hokolole uuna a galukile moshilongo.

“Shoka oshimbuluma sha pumbwa okukatukilwa onkatu meendelelo, naantu mboka ya li ye shi kwatela komeho oya pumbwa okukatukilwa onkatu.” osho a popi ngaaka.

Okwa popi kutya oklaba oyi na okupatululilwa oshipotha.

“Ngele natango opolisi inayi ya katukila onkatu, nena otandi ya ndi ungaunge noshiningwanima shoka shomaihumbatonayi ngame mwene uuna nda galukile moNamibia. Oshinima shoka inashi pitikwa, oya longa oshikoya. Ngoka u unganeke euliko ndyoka ota ka katukilwa onkatu,” osho a popi ngaaka.

Inspekta omukuluntu mopolisi yoshitopolwa shaKhomas, Itetila Shapaka oshiwike shika okwa popi kutya opolisi ihayi popile nande iilonga ngambyoka yomauliko gaantu ye li amunkele moshigwana, nokwa gwedha po kutya mboka ya unganeke euliko ndyoka otaya ka patululilwa oshipotha shi li kombinga yomaihumbato inaa ga opalela moshigwana.

Shapaka okwa popi kutya emangaluko omo lyi li mEkotampango lyoshilongo ashike oongele shoka tashi ningwa itaa shi yi moshipala uuthemba waantu yalwe.

Shapaka okwa gwedha po kutya opolisi okwa li ya talele po oklaba ndjoka mOmaandaha noya pewa eyamukulo kutya oshiningwanima shoka osha ningilwa shili mehala lyawo.

“Otwa popi nagumwe gomaakuluntu yoklaba ndjoka mOmaandaha nokwe tu lombwele kutya mwene gwoklaba kali mo moshilongo, ashike okwa koleke kutya oshiningwanima shoka osha ningilwa moklaba yawo.

“Oya popi kutya aakiintu mboka oya zi koSouth Africa noya li ya hiywa opo ye ye yi imbe ashike enyanyu lyawo olya pitilile sigo oponkatu ndjoka ya tameke okuhula mo iikutu yawo. Mbala konima yoshiningwanima shoka, ehala olya patwa noshiindingili shoka osha kalekwa.

Omukuluntu gwoXS Lounge, Robert Switch, ina yamukula komapulo a tuminwa konzonkundaneki ndjika opo a tye ko sha.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.