Erongo lya ndjungwandjungwa kekakamo lyevi enenene

EKAKAMO lyevi inaali inyengamo nando onale moNamibia olya shukashuka oshitopolwa shaErongo ongula yEtitano lya ziko, einyengo ndika olyu uvika wo sigo omoVenduka.

Ekakamo ndika olyo enenenene sigo oompaka okuinyenga moNamibia, pauyelele waa tseyinawa yeinyengo lyevi, olya thikameke oshiyelekitho sha Richter pondondo ntano oshikwanu hamano. Pahokololo lyomuwiliki gwoshitopolwa shina sha nevi, omundohotola Gabi Schneider, iitasi yokukonenena ekakamo lyevi muuyuni oya li yuuvu einyengo ndika, naayihe oya ulike kutya onzo yalyo oya ziilile pehala lili pokati koKhorixas nOmaruru.Ndokotola Schneider okwa ti itaasi oyindji yokulandula omakakamo gevi muuyuni oya li ya kwata ekakamo ndika. Okwi itaalwa kutya einyengo ndika olya etwa komisindatandu dhokohi yevi dhagama kuubugantuninginino waKhorixas. Ekakamo olya uvika wo mOmbaye, oSwakopmund noshowo oVenduka. Schneider okwi itaala kutya ekakamo olya tameke komitumbovi dhopEtendeka moshitopolwa shErongo.Okwa ti olyo einyengo lyevi enenene tali gumu Namibia mondjokonona.MuNamibia ekakamo lyevi lya tegelelwamo olundji olina okukala puntano koshiyelekitho shaRichter nonando einyengo lyevi lyondondo yahamano pashiyelekitho shaRichter otali vulu woo okutegelelwa. Ongula yEtitano lyaziko ekudhilo enene olya uvika mOmbundu yaKiiyala, naantu yamwe oya dhengele oThe Namibian ya uve ngele pamwe opwa li etopo lyasha.Aakalimo yomoVineta omukunda gumwe gwomoSwakop oya dhengele wo oThe Namibia taa pula ngele otwa uvu einyengo ndyoka.Aantu yalwe nayo oya dhengele oThe Namibian taapopi shoka ya uvu shono evi lyakakama.Gumwe okwa ti okwa matukile mombelewa yomuhona gwawo okupula ngele naya ze mo metungo molwaashoka etungo olya li tali kakama.Omulumentu gumwe gwomoVineta tati ekakamo olyali edhigu noonkondo.’lya li tali tilitha.’ ‘Onda li ndishi otatu guko ketungo’ Rod Braby gwehangano lyewiliko mokugamena uuntshitwe komunkulofuta ta ti.Yamwe yomaakalimo miilando yokomunkulofuta oya li ya dhiladhila kutya ngiika einyengo olya etwa komaidheulo getanga lyaakwiita mboka ya umbile oondjembo moondeina dhopokati kaMbaye naSwakop oshiwike sha zileko omanga yalwe ya dhiladhila wo kutya pamwe etopo muyimwe yomoomina dhomoshitopolwa.Aantu oya dhengele oThe Namibian oongodhi okuza koombinga adhihe ngaashi koHenties Bay noshowo koUis.Omunangeshefa gumwe moHenties Bay ekakamo lyevi okwe li yeleke ta ti osha li sha embakumbuku lyokumbambanga opate ta li ende pondje mostrata ye. Martie Duvenhage gwokamba yomavululukilo ya Brandberg okwa ti oku uvu endundumo nenge etopo lyakudhila, opo konima kehe shimwe osha tameka tashi ti shukushuku. Ta gwedha ko tati ‘osha li shafa aantu eyuvi taya matuka kombanda yetungo lyetu’.Omukiintu gumwe koUis okwa tumine oThe Namibian oe-mail ta ti okwa li natango ta kakama kuumbanda, tati okwa li ta dhildhila kutya egumbo lyawo ota li ya gwile.Okwa ti evi olya tameke ta li mbulungundja lyo tali kakama , yo iinima mbyoka ya tsilikwa pombanda mooraka tayi gwile pevi.Okwa dhiladhila kutya pamwe ondhila yagwile megumbo lyawo.Omulongi posikola ya Martin Luther pOmaruru, Ringo Hoeseb okwa ti aalongwa oya lombwelwa ya thigepo oongulu dhosikola konima ashike sho ekakamo lya tameke.Okwa ti tango opwa ningi ekakamo eshona lya landulwa kenene.Oku uva shino Hoeseb tati yo kaya li ya hala uunona wu dhengwe ketungo.Aakalimo moKhorixas naUsakos oya ti ekakamo lyevi olya kwata ethimbo, ndele nando ongawo ina pa tseyithwa egumbo nenge omuntu a mono oshiponga keinyengo ndyoka.Namibia okwa li a gumwa komakamo gevi momimvo dha piti. Momumvo 1952 ekakamo lyevi lya yelekwa pondondo ntano oshikwanu ntano koshiyelekitho shoRichter olya ndjungaandjungile oKeetmanshoop. MuApilili 2008 oshitopolwa shOmaruru osha guminwe ishewe kekuyunguto lyevi pondondo ntano pashiyelekitho shoRichter. Omanga oshitaasi shokupulakena einyengo lyevi shopoKamanjab ohashi kwata omainyengokakamo gevi omashona moshitopolwa shoka kehe mwedhi. Ombelewa yokukonenena omutungilo gwevi oya thaneka okwiindjipaleka iitaasi yokupulakena omainyengo gomuule wevi moshitopolwa shErongo opo shi vule okulandula omainyengo ngaka nokatalekonawa omundohotola Schneider tati.