Elelodoolopa laKatima Mulilo la pewa eemiliyona N$100 domayambulepo

Oministili yomayambulepo eedoolopa noitopolwa yokomikunda oya yandja oshimaliwa shi fike peemiliyona N$100 kewiliko lodoopa yaKatima Mulilo opo shi longifwe mokuyandja omeva nolusheno komalukanda a yooloka.

Oshinima eshi okwa li sha shiivifwa kuminista womayambulepo eedoolopa noitopolwa yokomikunda James Sankwasa pefimbo noshongalele sheenghundafana oko oikumungu ya pamba eyambukepo lodoolopa noikumungu oyo tai linyenge modoolopa kwa li ya kundafanwa Etivali.

Okwa ti omalukanda oo taa ka kumwa koshinima eshi omwa kwatelwa Nova, Macaravani West noDiary Coumpound. Ehangano e li tali ka longa oilonga ei ola teelelika li ulikwe mEtitano.

Elelo lodoolopa yaBukalo nalo ola mona eemiliyona di li N$35 domayakulo ngaashi omeva, olusheno, omalambo nominino donyata, oundjuwo nosho yo eepate.

“Ngee opu na omunhu ta popi kutya kapu na omeva nolusheno, omunhu oo ota popi oinima yonale. Eemiliyona N$100 ode di apa,” Sankwasa osho a ti ngaho.

Okwa indila ovakalimo va longele kumwe, unene ovo tava ka kumwa ketembu, ta ti kutya eli etameko ashike leenghendabala dokuyambula po odoolopa noshitopolwahoololo.

Minista natango okwa longifa okamhito aka a holole kutya olopota yomavalulo oilonga yewiliko lodoolopa yaKatima Mulilo sha landula ekufomoilonga leekamusela dodoolopa oi na lela ouyelele kutya opwa kala pu na ewiliko la puka noulingilingi.

Olopota oya holola kutya eengeshefa dimwe oda dopa okufuta omeva nolusheno, tai holola oinima ihapu ya puka kombinga yeetendela nelongifo loRedForce Debt Management kapu na nande efiku kwa li li na okondalaka yopambelewa lewiliko lodoolopa yaKatima Mulilo.

“Ndee owa hala okulombwela nge kutya okwa li ndi na okumwena ongominista ndee handi efa eekamusela di twikile?” osho a pula ngaho, ta londwele kutya nande eekamusela odo tadi ka hoololwa paife otashi dulika di ningilwe oshinima sha faafana ngee otadi longo papuko.

Ovakalimo ova pula olopota i yandjwe moshiwana nonghatu yomeendelelo i katukilwe RedForce.

Omupopiliko wewiliko lodoolopa, Chrispin Muyomba, okwa ti olopota ye lixwa po itai ka yandjwa koshiwana.

Okwa yandja omatomeno omalimbililo kombinga yoiholekwa, ta ti ngee oya pitifwa otashi dulika shi ye omakonakono oo e li metifa moshipala. – Nampa

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.