EKANKA lyaaniilonga yomefuta itali hulu sigo omahangano ngoka itagi iyutha koveta yaaniilonga ga pewa omukanda tagu ga thiminike gi iyuthe koveta yaaniilonga kepangelo.
Ndhika odha tseyithilwa iikundaneki komupresidente gwehangano lyaaniilonga lyoNanlo, omusamane Evaristus Kaaronda, pamwe naakalelipo yehangano lyaaniilonga lyo-MMMC.
Kaaronda okwa ti epangelo olya longa nuuhadha sho lya dhimbulula kutya opu na omahangano moshikondo shoohi taga yonagula oveta yaaniilonga ihe inali ga lombwela nenge li ga gune ge shi hulithe po.
Okwa holola kutya omahangano haga longelwa kaaniilonga ye li mekanka otashi vulika ga tameka okugandja omikandaguno nokwi ithana aaniilonga kiihokolola.
Omunashipundi gwongongahangano yomahangano gokuyula oohi, Matti Amukwa, okwa ti oshikondo shoohi osha tameka okuuva uupyu woohandje dhekanka lyaaniilonga.
Aaniilonga ya konda 1 500 oye li mekanka, taya pula ya nawapekelwe onkalo yiilonga yo ya futwe iimaliwa yolutayima.
Omakemo gaaniilonga oga thika momakutsi gomupresidente Hage Geingob, ngoka i indile oshikumungu shonkalo yaaniilonga moshikondo shoohi yi konaakonwe.
Kaaronda okwa nyenyeta wo kutya oshikondo shoohi inashi hala okuyalula omahangano gaaniilonga ngoka taga longo muuwananwa waaniilonga noge na iilyo oyindji.
Okwa ti oya nyolela omahangano ogendji taya holola kutya oya kalela po aaniilonga oyendji yomomahangano gawo, ta ti aagandji yiilonga oya li ye na okutseyithila omahangano gaaniilonga ngoka ga yalulwa kutya aaniilonga yawo kaye shi we iilyo yomahangano ngoka.
Uuministeli wiipambele yaaniilonga nongongahangano yomahgano gokuyula oohi oya ningile omutumba mEtiyali.
Iizemo opo tayi ka tseyithwa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
