Eindjipalo lyoongandu moKavango tali mana po oshigwana

Kansela okwa zi mokalungu sha landula oshiningwanima oshitalala moka kamatyona gwomimvo 13 gwomomukunda Mupapama moshikandjohogololo shaMashare – moshitopolwa shaKavango Uuzilo, a ponokelwa nokuyakulwa po kongandu.Kamatyona ngoka okwa hililwa momeya gomomulonga kongandu mEtine lya zi ko, ashike sigo onena ina monika.Mushongo Manga, ngoka hasikola posikola yedhina Sambyu Primary School, okwa ponokelwa kongandu pethimbo ya li ye ki iyoga komulonga pamwe naamwayina ye yaali.Mavara okwa popi kutya aakalimo yomomudhingoloko gwomulonga ohaya kala muudhigu oshoka kaye na nkene ya yande okuhedha popepi nokulongitha omeya gomomulonga. Kansela okwa popi kutya aakalimo ohaya hupile momeya gomomulonga unene tuu ngele otashi ya komeya gokunwa nokutelaka, okuyoga oonguwo, osho wo okuyula oohi.Mavara okwa popi kutya oshikandjohogololo she oshinene noonkondo onkene nonande ohaya pewa okashona komapendulopo okuza kepangelo, oshimaliwa shoka ihashi gwanene okufula oomboola dha gwana okukwathela oshigwana megandjo lyomeya.Okwa popi kutya oshimaliwa shoka ohashi gandjwa koshitopolwa shawo nokuza mpoka ohashi topolelwa po iikandjohogololo yawo naashoka ihashi ya gwanene.Omolwonkalo ndjoka, kansela okwa popi kutya oshihwepo aantu ya pewa omikandapitikilo dhuukongo woongandu nenge [oongandu] dhi kwatwe po nelalakano lyokukamunwa momudhingoloko ngoka gwa gamenwa itaashi tulitha oomwenyo dhaakwashigwana moshiponga. Mavara ndhoka okwe dhi popi nedhiladhilo kutya oya koneke omwaalu gwoongandu gwi indjipala noonkondo momulonga nodha pumbwa okushunithwa pevi.Ehokololo kombinga yoshiningwanima olya popi kutya Manga okwa li a kuutumba kemanya lyi li popepi nomulonga, sho a tseyithilwa nokulondodhwa kaamwayina kutya oyu uvu omainyengo taga limbilike momeya nolwanima gu uka momwiidhi lwopemanya.Ashike nando ongaaka, Manga, shoka okwe shi kutha ko ongomashendjo, ashike lwanima ongandu oye mu nukile.Oshiningwanima shoka osha lopotwa kuuministili womidhingoloko, nolukongo lwa Manga momulonga nopomudhingoloko olwa tamekwa, ashike sigo oompaka kapu na shoka sha monika po.Onkalo yaakwashigwana yokomulonga gwaKavango taya ponokelwa koongandu otayi eta omalimbililo noonkondo oshoka oomwedhi dha piti okwa kala taku kundanekwa aantu taya lika po kiilikama mbyoka.Petamemo lya Januali, momukunda Katere moshitopolwa shaKavango Uuzilo, Juliana Urungi (5) okwa ponokelwa kongandu nokulika po.Yina, Eveline Mukuve okwa hokolola kutya okwa li ya yi momeya gomomulonga nomwana opo a teke omeya.“Manga tu li pomulonga, otwa yi momeya nonda teke eyemele lyandje nonda zi mo ndi li fale komutunda. Pethimbo nda zi momeya onda thigi Juliana ti ihula molwashoka anuwa okwa li a hala okuyoga omeya,” osho Mukuve a hokolola ngaaka.Mokugaluka Mukuve okwa hokolola kutya okwa mono ongandu ya anduka ko nokuyakula po omwana.Pehulilo lya Januali, Elen Mashora Disho (14), okwa ponokelwa nokudhipagwa kongandu momukunda Thikanduko, moshikandjohogololo shaMukwe.MuMaalitsa, kamatyona gwomimvo 9 okwa ponokelwa kongandu pethimbo a li ta nu omeya gomomulonga sha ningilwa momukunda Rundjarara moshitopolwa shaKavango Uuzilo. Olutu lwe inalu monika sigo onena.MuMaalitsa natango, omudhimba gwaBen Ndumba (26) ngoka a lika nokuponokelwa kongandu ogwi itsuwika momukunda Mpungu moshitopolwa shaKavango Uuzilo sho a ponokelwa pethimbo a li ti iyogo. Pethimbo ndyoka opolisi oya popi kutya Ndumba okwa li a yi komulonga komatango opamwe nookuume ke. Ongandu ndjoka taku fekelwa ye mu dhipaga oya kala tayi tyakaleke nokupalutha aantu momudhingoloko nongashingeyi oya dhipagwa kopolisi.MuFebuliali numvo, Lufrensia Nangura Kayunde (33) okwa hupu sho i ikutha mokana kongandu momukunda Thipanana, moshikandjohogololo shaMukwe – moshitopolwa shaKavango Uuzilo.Pethimbo lyoshiningwanima, Kayunde otaku hokololwa a li a ka teka omeya, elago enene oondyoka kutya opwa li aantu popepi mboka ya kwathele oku mu kutha mo mokana kongandu.Okwa li a falwa kokapangelo ka Andara nolwanima okwa tuminwa koshipangelo shepangelo shaRundu.Oshiwike shika, omupopiliko guuministili womidhingoloko Romeo Muyunda okwa popi kutya ota ka gandja uuyelele moshigwana kombinga yaampoka pwa thikama olukongo Manga ngoka a ponokelwa kongandu oshiwike sha zi ko.Kombinga yeindilo lya kansela Mavara opo ku gandjwe omikandapitikilo dhuukongo woongandu, Muyunda okwa popi kutya uuministili owi pyakidhila nokuthaneka omulandu gwekondololo lyoongandu opo ku taliwe kutya endjipalo lyomwaalu [gwoongandu] otali yapukilwa ngiini.Okwa gwedha po kutya nonande eyonagulo nenge emonitho lyiihuna kiinamwenyo oshi li oshitopolwa shuuministili wawo, okwa popi kutya ookansela nayo oye na oshinakugwanithwa momake gawo okushilipaleka kutya oya gandja omayakulo taga pumbiwa kaakwashigwana opo ku yandwe onkalo yokuya komulonga.Okwa gwedha po wo kutya ookansela oye na oshinakugwanithwa okushilipaleka kutya oshigwana osha pewa elongo nomauyelele kombinga yoshiponga shokulongitha omeya gomomulonga.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.