OKOMMISSI yOondjambi nomauwanawa gamwe gaanambelewa yopashigwana [POB] oya ti oondjambi dhaanambelewa mbaka odhi li pevi okuyeleka niilonga mbyoka yo yena okulonga.Okommissi ndjika oya ti oondjambi ndhoka ina dhi gwanena omuthika gwiinakugwanithwa mbyoka aawiliki mboka yena okugwanithapo meyakulo lyaaNamibia onkene odha pumbwa okuyeluthwapo lumwe konyala pondjele yopokati yoopersenda 31.
Endjekepo lyoondjambi ndika otali ka kuthapo konyala oodola oomiliona 45, 8 moshiketha shiifendela. Okommissi ndjika oya tula puuyelele omathaneko ngaka konima sho yo ya li ya gandja omushangwahokololo gwayo kOmuperesidende, Hifikepunye Pohamba omwedhi gwayi. Pohamba oye ta ka tokola kutya oondjambi dhaanambelewa mbaka yopapolitika otaya ka gwedhelwa nooperesenda dhili ngapi. Omwaalu gwaanambelewa mboka ogwa thikama paantu yeli 239 ya kwatelamo Omuprima Minista noshowo omuwiliki gwongundu yompilameno yopambelewa. Ngele Omuperesidende Pohamba okwa tokola kutya omathaneko ngaka otaga tulwa miilonga ngaashi geli nena omulekeneno gwondjambi yaanambelewa mboka, otagu ka londa okuza poodola oomiliona 22,9 mpoka gwathikama ngashingeyi noku ya poodola oomiliona 68,7. Pethimbo ndika ondjambi yokomumvo yominista Onkuluntu oyo ayike ya pitilila konyala oodola omiliona yimwe. Omanga Omuperesidende ngoka ondjambi ye ihaa yi uthwa kokommissi ndjika otaku hokololwa ha kwata ondjambi mwakwatelwa omauwanawa galwe yoodola oomiliona 2,1.Pamathaneko gokommissi yoondjambi dhaakwanepangelo, ndjika, aanambelewa ayehe ota ya ka kwata konyala ondjambi yili lwopomiliona yimwe yoodola omanga inaaku kuthwa iifendela. Aanambelewa ngaashi Ominista Onkuluntu, omupopi megumbo lyopashigwana, omunashipundi shegumbo etiyali lyopashigwana, nomugandjimayele kombinga yegameno, okabinete akehe, omuwiliki ndjayi gwokommissi yomathaneko gopashigwana, amushanga gwokabinete, ahende ndjayi, omuyaluli ndjayi, omuwiliki gwomatanga gopolisi, gaakwiita, noshowo gondholongo ayehe otaya ka mona oondjambi dhi thike pamwe. Ngele omathaneko oga tulwa miilonga ondjambi yOminista Onkuluntu ayihe yihe otayi londo okuza poodola omiliona yimwe 1,06 komumvo okuya pomiliona 1,47, naandika otashi ti egwedhelo lyooperesenda 38,7. Omanga ondjambi yomuwiliki gwongundu yompilameno pambelewa ayiheyihe ota yi ka londa okuza poodola 597 453 okuya poodola omayovi 966 812 komumvo. Aanambelewa mboka taya ka mona egwedhelo enene ngele omathaneko ngaka oga ziminwa ku Pohamba ongaashi omuyaluli ndjayi gwomambo gepangelo, ngoka ngashingeyi ha kwata ondjambi ayihe yihe yoodola omayovi omathele 765 861, na ota ka kwata oodola omiliona 1,4 shika osha kalelapo eyopombanda nooperesenda 83.Omunashipundi gwokommissi yoondjambi ndhika Omupanguli Peresidende, Petrus Damaseb pethimbo a tula puuyelele omathaneko ngaka moVenduka okwa ti otashi vulika ngaka ga talike gafa omawinayi, ndele shika oshili ngaaka molwashoka epangelo olya kala inaa li hala oku opaleka oondjambi dhaakwanepangelo yopombanda uule womimvo dha piti. Damaseb okwa tsikile ati ina pa ningwa oonkambadhala neitulemo oku gwedhela oondjambi dhaanambelewa mbaka shiikwatelela kengushuluko lyoshimaliwa noshowo konkalo yopamahupilo. Onkene aakwanepangelo oya kala taya kwata oondjambi dhili pevi okuyeleka naawiliki yopoondondo dhafaathana nodhayo moshikondo shopaumwene. Damaseb okwa ti iimaliwa yaakwanepangelo oya kala ngiika inaayi gwedhelwa molwaashoka aawiliki oya kala nuumbanda unene oshoka oshinima shoka itashi monika nawa papolitika , onkene omagwedhelo ngoka ga ningwa oga li ashike omashona, naashika osha fala mpoka kutya mbaka oya thigalapo moondjambi kaawiliki ooyakwawo mboka yeli miikondo yopaumwene.Omolwashika Damaseb okwa ti okommissi oyi wete kutya omathaneko gayo oge li nawa nopayuki na otaga vulika kaafendeli ya Namibia.Omunashipundi gwopevi gwokommissi ndjika,nomunangeshefa omukiintu, Monica Kalondo okwa ti shoka Damaseb a popi osho shili noshili mondjila. Okwa tsikile a ti okommissi ndjoka oya longo tagu pumo mokuninga omapekapeko omanga inaa yi ninga omathaneko ngoka ya tula komeho goshigwana. Okwa ti oya landula ondjila yuumbangi ya tala iimaliwa mbyoka ha yi kwatwa kaanambelewa mboka nokutala mbyoka hayi kwatwa kuyalwe miikondo ya yooloka moshitopolwa shopaumwene. Okommissi oya thaneke kutya iilyo ayihe yokabinete nayi gwedhelwe nooperesenda 55,7 koondjambi dhawo okuza poodola omayovi 817 937 opo ondjambi yawo yi kale ngashingeyi andola ngele omathaneko oga taambiwako yi kale poodola omiliona 1, 27. Uuna ondjambi yawo ya gwedhelwa mwakwatelwa omayakulo agehe gehe oshilyo shokabinete otashi kala hashi taamba oodola omayovi 106 099 komwedhi omanga iifendela inaa yi zako.
