Egumbo lyaNangombe Iipinge lya pya po

KUKU Nangombe Paulina Iipinge gwoomvula omilongo omugoyi nahamano (96) gwomomukunda Olunghono popepi nIipandayamiti mUukwambi mOshitopolwa sha Musati okwa thigwa pomutenya sho egumbo lye lya pipo ombinga yimwe ndjoka oyo ya kala yi na oshilonga megumbo lye moka, sha ningilwe omutenya gwOlyomakaya ga zi ko.

Otaku tiwa oshiponga shika shomulilo, otashi vulika sha etwa kukamwe komuutekulu we, hoka ka dhana nomulilo.Kuku Paulina Iipinge nguka megumbo oku li mo nomumwayina, Nelago Iipinge gwoomvula (93), ngoka ke wete ko, ano omuposi, noshowo nomonakadhona Shekupe Ndinelago Ashipala nuutekulu we, Iipinge, Jason Alfons gwoomvula omulongonambali (12), Augustinus Kahenge gwoomvula ne (4) na Siscko Shikongo gwoomvula mbali (2). Kakele ka Ndinelago, ayehe omo ya adhika megumbo sho lya yeke omulilo ngawo nokupya po mOlyomakaya moka.Kuku Paulina Iipinge, ngoka ta pandula Kalunga sho inamu pila omuntu, ano sho inaya pila mo, ota ti ondjugo yawo yokulala noshowo ondunda yawo yompungulilo nayimwe yokugondja, adhihe odha pya po thiluthilu. Ta ti eliko lyawo alihe, ngashi iilya mbyoka ya li mondunda yokupungula, omausila gomahangu noshowo wepungu, oombete, omakumbatha, oonguyo dhawo nodhaanona, oongaku, iimaliwa yawo yopenzela, omaemele, iiyaha, oombiga dhawo dhelowa, iimbale yokukwatela, oomwaanga niindjendje ye noshowo iipako yilwe, ayihe oya pila mo.’Iikutu mbika twa adhika nayo, ano mbika twa zala ngeyi, oyo ashike twa hupa ko nayo. Katu na sha. Ayihe oya pila momulilo ngoka kumwe niiti yolukutu lwegumbo lyetu, ngashi to yi tala ngawo, ayihe oya pya po. Twa thigwa lela pomutenya komulilo nguka notu li twa pumbwa ekwatho enene kaasihenda muuyuni,’ kuku Paulina Iipinge ta ti ngawo noku indila nee koshigwana shi mu kwathele moluhepo lwawo nduka, lwe ya adha methimbo lyuukulupe wawo lelalela. Unene tuu omumwayina kuku Nelago ngoka ke wete ko noshowo uutekulu we mboka wa thigwa nawo kau na po sha we. ‘ Aakulupe yetu mboka oye na elago lela, sho inaya pila mo megumbo lyawo moka, oshoka, tse yopuushiinda, unene tuu ngaye, sho twa mono omulilo nokumatuka, otwa adha aakulupe ya kaatumba ashike mokatala kawo kokugondja megumbo nuutekulu wawo, dho oondunda ndhoka dhi li pooha dha ko dha yeka omulilo.Unene tuu, Nelago ngoka kee na oshipala, ngeno otwa adha a pila mo nge katwa li twa tondoka nokweendelela nziya tu ya kuthe mo megumbo,’ meme Peneyambeko Hashili, omushiinda shawo ngoka e ya po pegumbo tango noku li panuna, e ya hupithe ngawo ta ti ngawo. Kuku Paulina Iipinge noshowo omwana Shekupe Ndinelago Ashipala, otaya pandula Kalunga sho e ya hupitha momulilo nguka, oshowo aashiinda, unene tuu, Peneyambeko Hashili, mboka ya tondoka noku ya hupitha komulilo ngoka nokuhupitha wo oshitopolwa shimwe shegumbo shaapye po nasho wo thiluthilu komulilo ngoka.’Yakwetu otwa dhengwa pevi noonkondo komulilo ngoka. Otwa pumbwa ekwatho enene okuzilila moshigwana. Tatu indile kElelo lyetu lya Musati noshowo kEhangano lyOmushigakano Omutiligane nokaasihenda ayehe ye tu kwathele moluhepo lwetu nduka, twa etelwa komulilo nguka,’ kuku Paulina Iipinge ta ti ngawo nokulombwela The Namibian kutya oshiponga shika oye shi lopota nale kumwene gwomukunda gwawo noshowo kElelo lyawo lya Musati.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.