Egumbo lyaandjawo yomufekelwa gwoPhala Phala lya yakwa … aanegumbo ngashingeyi ye li muumbanda w

EGUMBO lyaandjawo ya Imanuwela David, ngoka oye gumwe gomaafekelwa meyako lyoomiliyona mofaalama yomupresitente gwaSouth Africa Cyril Ramaphosa, otaku hokololwa lya teywa oshiwike sha zi ko.

Egumbo ndyoka lyokomukunda, mwa putukila David olya kuku Mwaambange Shikunda, notali adhika momukunda Olukekete moshitopolwa shaMusati, omukaakenda ashike gwookilometa 15 okuza mOutapi.

Kuku Shikunda oye yinakulu yaDavid, ngoka taku hokololwa oye omudhaninkandangala meyako lyoshimaliwa oshindji mofaalama yaRamaphosa ndjoka tayi adhika momudhingoloko gwaLimpopo, moSouth Africa noyatseyika nawa koyendji nedhina 'Phala Phala'.

Mwene gwomukunda Olukekete, tate Simon Leevi Haitana, petameko lyoshiwike shika okwa lombwele onzonkundaneki ndjika kutya okwa tseyithilwa kombinga yeteyo lyegumbo lya kuku Shikunda, sha ningwa mEtine lya zi ko.

“Eeno, megumbo okwa li mwi iteyelwa naanegumbo okwa li yeya oku shi lopota kungame ongamwene gwomukunda. Mokati kiinima mbyoka ya yakwa po omwa kwatelwa oradio yomuzizimba,” osho omusamane Haitana a popi ngaaka.

David otaku hokololwa a putukile megumbo lya yinakulu ngoka Shikunda ashike nota vulu okutalika ko ongomuSouth Africa oshoka oku na uukwashigwana wokoshilongo shoka.

Oshiwike sha zi ko, komanda gwopolisi yaMusati, komufala Titus Shikongo okwa lombwele onzonkundaneki ndjika kutya oshiningwanima sheteyo lyegumbo lya kuku Shikunda keshi shi molwashoka ke wete sha lopotwa kopolisi.

“Oshiningwanima shoka ngiika inaye shi lopota kopolisi,” osho a popi ngaaka.

Oshitaasi shopolisi yopoongamba pOkapalelona, ndjoka yi li popepi negumbo lyaandjawo yaDavid, nayo oya popi kutya inayi lopotelwa oshiningwanima shoka.

Ashike nando ongaaka, kuume kaDavid, Erkki Shikongo, ngoka wo naye ta tamenekelwa eyako lyoshimaliwa shaRamaphosa, mOmaandaha okwa lombwele onzonkundaneki yaSouth Africa yedhina Newzroom Afrika kutya egumbo lya yinakulu yaDavid okwa li lyi iteyelwa nokuyakwa iinima oyindji mwa kwatelwa oradio yomuzizimba.

Shikongo okwa lombwele onzonkundaneki ndjika kutya, sha landula eteyo ndyoka, ngashingeyi aanegumbo yaandjawo yaDavid, mOlukekete, oye li muumbanda woonkalamwenyo dhawo.

Okwa popi kutya David, ngoka taku hokololwa a kala muumbanda kombinga yonkalamwenyo ye sha landula sho ehokolo lyeyako lyofaalama yaRamaphosa lye etwa puuyelele, ngashingeyi okwa kala moJohannesburg.

“Sho ehokololo lya pitithwa miifonkundaneki, onde mu pula [David] ngele okwa yaka oshimaliwa shaRamaphosa, ashike okwa yamukula ndje kutya ineshi ninga,” osho Shikongo a popi ngaaka.

Shikongo okwa gwedha po nokulombwela onzonkundaneki ndjoka kutya okwa tseyathana naDavid sho ya ya tsakanene naye moCape Town, ashike pethimbo ndyoka [David] okwa li nale ha hingi iihauto yondilo ngaashi oBMW osho wo omashete.

Shikongo okwa gwdha po kutya David okwa li a dhengagulwa kopolisi yaNamibia pethimbo a tulwa miipandeko momasiku 14 Juni 2020.

OWILI YOKOSHIKESHO

Pethimbo David a tulwa miityaka okwa adhika nooUS$1100 osho wo owili yoRolex yongushu yooN$ 280 000.

Shikongo okwa popi kutya opolisi oya kutha David owili ye yondilo ndjoka inee yi mona we sigo okeluwa ndika.

“Onkalo kegumbo otayi limbilike. Aantu oye li muumbanda molwashoka ookalyamupombo okwa li ya yi kaandjawo nokuyaka ko,” osho Shikongo a popi ngaaka.

Sho a kwatathanwa naye, ondjayi yetanga lyopolisi Sebastian Ndeitunga okwe ekelehi omapopyo kutya David okwa li a monithwa iihuna komiya dhashinana.

“Tse ohatu longo iilonga yetu pambelewa, ihatu dhenge ashike aantu ngaaka, nokuli okudhenga aantu oshinima shoka inaa shi pitikwa kEtopampango lyaNamibia. Oshike nee inee shi popya sho a li mompangu, kutya okwa monithwa iihuna kopolisi? Mbyoka iifundja yowala tamu lombwelwa,” osho a popi ngaaka.

Sho a pulwa ngele natango owili yaDavid oyi li ngaa natango momake gopolisi, Ndetunga okwa yamukula kutya ndhoka kadhi na uushili.

David okwa tameke okwiingaana miikundaneki sha landula sho a tulwa miipandeko kongundu yopolisi ndjoka ya li mewiliko lyaangoka a li kombanda gwopolisi yaKhomas, komufala Joseph Shikongo osho wo ngoka a li omukwatakanithi gomakonakono moshitopolwa shoka, omupevikomufala Abner Agas.

Shoka osha landula sho pethimbo ndyoka otaku hokololwa David a li a taaguluka oongamba nokawato okupitila momulonga gwaLange nokuya meni lya Namibia, koNoordoewer ashike okwa li anuwa a nyengwa kolefa yoku mu eta mondingandinga yoshilongo nenge mpoka a li u uka – oshoka pethimbo ndyoka oshilongo osha li moondjindikila dhomainyengo gaantu.

Ngoka a li omukuluntu gwoshimpungu shiimaliwa mehangano lya yama kepangelo lyedhina National Fishing Corporation (Fishcor), Paulus Ngalangi, okwa li a kwathele oku ka tala ko David koongamba noku mu fala kOvenduka.

Pethimbo ndyoka, iikundaneki okwa li ya lopota kutya David okwa li ta kongwa kopolisi [yaSouth Africa] fekelwa olunyala meyako lyoshipotha oshinene shoomiliyona N$65 moSouth Africa, ashike kapwa li nande pwa gandjwa uuyelele womuule kombinga yeyako ndyoka.

ETULO MIIPANDEKO

Lwanima, David okwa tulwa miipandeko omolwomulandu ngoka gwa li tagu dhengele opo kehe omuntu teya moshilongo i ikalekelwe omolwekondjitho lyombuto yocorona.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.