Egumbo lya halakanithwa po komulilo kaagu shiwike mpoka gwa zi

MOMASIKU 10 Maalitsa 2023, esiku ndyoka kuku Erastus Nathanael (67) naanegumbo lye itaaye ke li dhimbwa we.
Ndyoka olyo esiku omulilo kaagu shiwike mpoka gwa zi kwa li gwa yangatitha po egumbo lyaandjawo, ndyoka lya li noondunda 13 dhoomwiidhi osho wo omaliko galwe gaanegumbo.

“Inatu thigwa nasha, iinima ayihe oya pya po, naashihe shoka twa li nasho osha pila mo. Oshimaliwa shetu, oodokumente, iikutu, omakumbatha, oombete osho wo iikulya, iinima ayihe mbyoka oya ya. Kandi shi nokuli kutya otandi ti we shike, Kalunga oye owala eshishi osho wo kutya otatu piti musho ngiini,” osho omukulukadhi gwa kuku Nathanael, Selma Wellem (57) a popi ngaaka.

Onzonkundaneki ndjika oya talele po egumbo lya kuku Nathanael momukunda Oshamono moshitopolwa shaHangwena mOmaandaha ga zi ko, noya adha aanegumbo ya kuutumba momuti ngoka gu li popepi negumbo. Omutoko gwiinima mbyoka ya li megumbo okwa li tagu imonikila kehe pamwe, omanga iihupe yomulilo ngaashi yoombete niinima yilwe yomegumbo ngaashi iiyaha, oosindo, iiyalaka nomatemo oya li pehalandjandja noku ulika kutya opwa li egumbo shili.

Meme Wellem okwa hokolola kutya esiku ndyoka okwa li a yi koshipangelo kEenhana, omukaakena gwookilometa 25 okuza kaandjawo. Okwa popi kutya megumbo okwa li a thigi mo oyana yatatu aakuluntu, nolwopotundi 12h00 okwa yakula ongodhi okuza kegumbo kutya egumbo lye olyi li kohi yomulilo. “Kanda li tandi vulu oku shi itayela,” osho a popi ngaaka.

Omwana Christina Nathanael (43), ngoka a li megumbo pethimbo ndyoka, okwa li nomahodhi momeho pethimbo ta nyugulile ko onzonkundaneki ndjika.

“Megumbo otwa adhika owala opo twa zi mo sho twayi tu ka longe mepya. Aluhe ohatu shilipaleke kutya inatu thiga sha shi li peziko, ishewe kapwa li nande omulilo gwa sha peziko esiku ndyoka.

“Lwopotundi 12h00 manga tuli mepya, otwa mono olwiithi talu zi megumbo, notwa matukile ko opo tu tale shoka shi li ko, ashike sho twa thiki otwa adha ondunda yimwe yomwiidhi yi li kohi yomulilo.

“Otwa kugu opo aashiinda ye ye yetu kwathele notwe shi pondola okudhima ondunda ndjoka ashike konima yokathimbo ondunda ndjoka ya li ye egama ndjoka twa dhimi nayo otwa mono ya yaka omulilo ishewe.

“Omulilo ngoka ogwa kala tagu nuka gwa landula oondunda dhomwiidhi sigo oponkatu ndjoka kaatwa li we tu na shoka tatu vulu okuninga po. Okwa li owala twa thikama nokutala sho egumbo lyaayetu tali pi.

Omulilo ngoka ogwa kana po sho oondunda adhihe dha yangata po thilu,” osho a popi ngaaka. “Katu shi we shoka tatu vulu okuninga, katu nawe iikulya, iikutu nenge omakumbatha, iinima ayihe oya halakanithwa po. Alikana, otatu indile aasamaria aanamutimahenda ye tu kwathele naashoka ye na po,” osho meme Wellem i indile ngaaka.

Ngoloneya gwoshitopolwa shaHangwena, Walde Ndevashiya opamwe nakansela gwoshikandjohogololo shEpembe, Mathew Nanghama okwa li ya talelepo egumbo ndyoka mOmaandaha noya gandja omakwatho ngaahsi giikulya, omakumbatha osho wo omatalashe. Okwa li wo yi indile aakwashigwana ya kwathele aanegumbo yegumbo ndyoka mpoka taya vulu.

“Ngaashi tushi weteni mboka, aantu mbaka oya thigwa pongalangala. Oya thigwa po owala niikutu mbyoka ya zala. Otwa tala onkalo yaashoka sha hanagulwa po komulilo noya nayipala noonkondo. “Kehe omusamaria omunamutimahenda ta vulu okukwathela pamukalo kehe, nakwathe kutya nee iikulya, iikutu, iipeleki yokutungulula egumbo lyawo nenge oombete,” osho Ndevashiya a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.