Egongalo lya Tsandi otali dhana evalo lyalyo lyoomvula ethele

EGONGALO lya Tsandi mUukwaluudhi mOshitopolwa sha Musati okuza eti 31 Juli 2009 sigo eti 2 Auguste 2009 otali ka dhana oshituthivalo sha lyo shoomvula ethele (100) okuza sho lya totelwe po meti 1 Auguste 1909.

Pambapila yetseyitho ya shangelwa kOshifo shika kOmunashipundi gwokangundulongekidhi koshituthivalo shika Mestela Johannes Amunyela tayi ti ngeyi; ‘Egongalo lyaTsandi mOshikandjongeleki shUuninginino mOngerki ya ELCIN, lya totelwe po meti 1 Auguste 1909 otali ka gwanitha oomvula ethele (100) li li po tali uvitha Evangeli lyOshilongo sha Kalunga mUukwaluudhi auhe. Mu lyo omwa totwa nokuli Omagongalo ngashi, Elondo, Onangalo, oshilemba, Ondukuta, Etambo, Nangula nIinaagoga oyindji. Okagumbo ka kuku gwAangolo nako oka li metonatelo lyEgongalo lyaTsandi naantu oyendji oya longwa koTsandi notaya yakula oshigwana sha Kalunga mIikondo yi ili noyi ili.Mokukoneka esilohenda ndika enene lya Kalunga, Egongalo lyaTsandi otali longekidha po Oshituthihambelelo shokudhimbulukwa ekalopo lyalyo lyoomvula ethele. Oshituthihambelelo shika okwa thanekwa nee tashi ka kala ko okuza meti 31 Juli 2009 sigo ometi 2 Auguste 2009 poTsandi mpoka, Kalunga ngele e shi hala.Egongalo otali hiya nesimaneko enene Aakwanegongalo lyaTsandi moNamibia alihe ye ye kOshituthivalo shEgongalo lyawo noku shi yambidhidha wo painiwe nopaiyakulitho yilwe, opo oshituthi shi kale nawa.Aasita, Aalongi, Aapangi, Aauvithi, iitenya yEgongalo nOofamili dhAayakuli ayehe ya yakula moTsandi, otaya hiywa nesimaneko koshituthi shika notaya indilwa ya yambidhidhe wo oshituthi shika oshinene noshopandjokonona.Ileni yakwetu tu hambeleleni Kalunga pamwe molwiilonga ye iinene. Omakwatho goludhi kehe naga thikithwe kEgongalo. Omagongalo agehe ga ELCIN, unene mOshikandjongeleki shUuninginino, oga hiywa nesimaneko notaga indilwa ga yambidhidhe oshituthi shika. Ayehe mboka ya tuminwa omahangagapya gehehelo otaya indilwa ya thikithe shoka ya gongela po = kEgongalo lyaTsandi. Esiku lya hugunina lyokuthikiitha iigongelwapo eti 19 Juli 2009. Aahiywa ayehe otaya vulu okutumina iiniwe yeyambidhidho kEyalulo ndika: Tshandi Parish Centennial FundAccount: 62135909979 First National Bank Oshakati Branch.Omapulo nuuyelele wa gwedhwa po naga ukithwe kOmunashipundi gwOkangundulongekidhi Mestela Johannes Amunyela konomola ye ndjika 0812581186 nenge kOshinyangagongalo Tsandi 065/258109. ‘Ileni yakwetu tu hambeleleni Kalunga.’