‘Efutitho lyomulongisikola molwiihulo ohoni onene’

OMUNONGOVETA, noku li wo hahende moshimpungu shegameno lyuuthemba womuntu Norman Tjombe okwa hokola kutya etokolo lyokufutitha omulongisikola sho a kwataakwata omulongwa omumvo gwa yi otali sitha ohoni notali limbilike.

Omulongisikola gwomosekundosikola Oshikoto, Moses Shingo, okwa monikile ondjo moshipotha shokwaaihumbata pawuntu, nokwa li a pulwa a fute N$3 000 komuhokololithi mopangu yamangestrata moTsumeb, David Munzo.

Shingo, omusamane gwomukuluntusikola, okwa li a galukile kosikola, konima sho a futithwa sho a lombwele omulongwa a patulule ohema ye e te mu kwataakwata koondungu dhomagundji.

Oshikondo shelongo kasha li shu ungaunga noshikumungu she.

Tjombe okwa li a lombwele onzonkundana ndjika uunambo kutya oshikondo shelongo osha li shi na okushilipalekela aalongwa ehala lya gamenwa [lyokwiilongela] moosikola.

Tjombe okwa hokolola wo kutya, molwokwaandjunguka kuuministeli mokupotokonona oshinima shika, oshikondo shelongo otashi gandja etumwalaka kutya osha fa kashi na uupyakadhi nomaihummbato gaShingo.

“Shoka tashi uvitha nayi unene osho a pitikwa a tsikile ta longo naalongwa.

Osho eyonagulo enene nodhino yuuntu womuntu negameno lyaalongwa, okupitika omulongi gwiimbuluma yopayihulo ompito yokutonatela ongulu yosikola yu udha aalongwa, mboka oyendji yomuyo aakadhona,” Tjombe ta ti.

Omuwiliki gwehangano lyedhina Women’s Solidality Namibia, Rosa Namises, okwa ti okufutitha omutamanekwa oku na okukala ku uvitha nayi oshihakanwa notaku yi moshipala oonkambadhala dhokukondjitha omahepekathano. Namises oku na epulo kutya aakadhona otaya vulu ngiini okwiinekela oveta nomilandu dhepangelo ngele aantu mboka taye ya ningilile mo otaya futithwa ashike e taya ethwa.

Okwa popi kutya oku na eyineekelo moveta, ihe oku uvite wo kutya oshikando shika omuhokololithi Munzo ina popila aakadhona yomomudhingoloko noyomoNamibia alihe koonono ngashi e na oku shi ninga.

“Otandi indile epangelo li konakone omuhokololithi nosho wo omukuluntusikola,” Namises ta popi a latha ko.

Onzonkundana ndjika oya kala tayi kambadhala ya mana mo opo yi kundathane nomukuluntusikola, omukulukadhi gwaShingo, ihe inashi za.

Oshilyo shomutumba gwopashigwana Clara //Gowases osha ti oomeme oye na okuyambidhidhathana miinima yoludhi nduka, unene oomeme ya yambidhidhe aakadhona.

“Omolwashike omukuluntusikola ina tya sha?

Naye oku na ashike ondjo ngashi omusamane gwe, onkene naye na kuthwe ashike miilonga manga.

Ongomukiintu, omolwashike wu na okweetha shi pite ashike ngaaka?

Okwa li e na okundjunguka,” //Gowases ta ti.

“Ongomukuluntusikola, oku na okupopila aamati naakadhona posikola.

Omolwashike e na okugamena omusamane gwe ngele aavali oyendji oye mu inekelela oshinakugwanithwa shokugamena omaluvalo gawo?” //Gowases ta pula ishewe.

Munzo ina vula okumonika konima sho a yi mefudho mOmaandaha, ihe otwa kundanekwa kutya okwa ti okwa pumbwa okuthuwitha omadhiladhilo ge opo a konaakone muule kutya oveta otayi ti shike kombinga yomapogolo goludhi ndoka.

Lwopokati mpoka otwa kundanekwa kutya Shingo okwa popi kutya okwa ti okwa lombwelwa i ikuthe miilonga. “Aantu yamwe oya lombwele ndje ndi ikuthe ashike miilonga.

Ondi uvite kutya osho ashike ndi na okuninga,” Shingo ta lombwele onzonkundana ndjika okupitila mofunguna.

Shingo okwa popile wo kutya ka li a tegelela iihuna yi hunuke ngashi sha ningwa, molwashoka okakadhona okwe ka kwata komagundji opo a tale ngele ota ke mu lombwele oshili, molwashoka oku uva taku ti oki ihumbata.

Uunambo, omukuluntuwiliki gwelongo mOshikoto, omusamane Lamek Kafidi okwa ti opo ta ka konga uuyelele kombinga yashoka sha ningwa po koshikondo shelongo.

Lwopokati mpoka otwa kundanekwa kutya Shingo okwi ikutha nale miilonga.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.