Eehaede deemangestrata edi di li mekangha paife ngaha oda anya omapopya aminista wouyuki noipambele yoilonga Wise Immanuel kutya ekangha lavo kali li paveta, mangha eenghundafana kombinga yomauwa neenghalo doilonga tadi twikile oshilongo ashishe.
“Omhangu ashike yoveta tai dulu okupopya ngee ekangha kali li paveta,” omukalelipo wopaveta weemangestrata Florian Beukes, osho a lombwela oThe Namibian ngaho Omaandaxa.
Okwa ti eenghundafana nepangelo natango odi li metifa shaashi natango inava hanga eudafano kombinga yomauwa omaumbo noyeendifo.
“Otwe lineekela kutya eudafano otali ningwa konguloshi [onguloshi yOmaandaxa] ile nena [Etivali], ashike ngee hasho, ekangha otali twikile,” Beukes osho a ti ngaho.
Ehangano leemangestrata novapanguli laNamibia ola kalela po eemangestata di li 82 oshilongo ashishe.
Eemangestrata oshilongo ashishe oda kala tadi anye okwaalukila keehofa okudja oshivike sha dja ko mangha eenghundafana nepangelo kombinga yeendjabi neenghalo doilonga di li xwepo tadi twikile.
Vamwe ova ti ova tila okuningwa nai konima minista kwa li a talela po omhangu yamangestrata yaVenduka moKatutura Omaandaxa.
Immanuel Oshoondaxa momukanda wa nyolelwa Boas Uusiku, omunashipundi wokomisi yeemangestrata, okwa ti ekangha kali li paveta ndee ta londwele kutya ngee ovanhu ova dopa okuliufa kelombwelo eli otashi kala okuhandulika, okufaula koilonga nokuhena ko na sha mokulonga oilonga yopambelewa, nosho yo omaliumbato oo taa tula oilonga youyuki moshiponga.
Eshi kwa li a dengelwa a tye sha Omaandaxa, Immanuel okwa ti ekangha loilonga olo tali ningwa nokupula omauwa a wedelwe oinima ya yooloka inai pumbwa okuungaungwa nayo oshita.
Okwa ti omawedelo omauwa eemangestrata ohaa tambulwa ko okupitila meenghundafana naminista woshimaliwa ku talike ngee otashi dulika ngaa.
Minista okwa ti omawedelo omauwa oku li koshi yeenamanana domauwa ndee kashi fi koshi yomaufemba.
Ohaa kundafanwa, osho a ti ngaho.
“Ohatu lele oshilongo shi na ekotamhango loudemokoli, ndee nashi kale sha yela komahalo nokwaasho tashi lalakanenwa.
Keshe elalakano lokuteya po oshilongo, natu li kaleke. Ohatu ti: “Kutya nee otwa kutwa koThe Namibia, First National Bank ile kepangelo, kapu na omunhu e na oufemba oo e uye ashike koilonga ndee ta ti nena itandi longo, ohandi tyapula ashike okofi yange. Kapu na omunhu e na oufemba oo,” Immanuel osho a ti ngaho.
Okwa nukila pomutenya kutya ina kendabala nande okutilifa eemangestrata Omaandaxa.
“Omhangu onhele yoshiwana. Ngee ndi udite kutya kapu na eshi tashi ningwa komhangu, ondi na okuya ndi ke shi limonene ame mwene lwotete. Oshinima osho otashi dulu okwiifanwa omatilifo?”
Oshikondo shoikwaveta osha shiivifa oilonga yopakafimbo ya yooloka, mwa kwatelwa eemangestrata dopaitopolwahoololo, eemangestrata da shiya ko di li nhatu, eemangestrata da kula di li 15 neemangestrata di li nhatu momafiku 15 Auguste tadi pewa eendjabi diwa nomauwa.
Eemangestrata odo tadi longo nale ngee oda hala okuninga omaindilo eemhito edi odi na okufiya po oilonga mangha.
Oshilyo shopaliamente shongudu yoIndependent Patriots for Change Elvis Lizazi okwa ti ekangha leemangestrata ola holola okuhafikapamwe oko ku li moshikondo shoikwaveta.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
