Editorial mOshiwambo … Okwiitanga Ohakuuvitha Nawa Mboka Yaa Na Ohoni

“ONKALO yokwaana uundjugo wokolela moshilongo oyi na okulala ya lethekwa mo thilu moNamibia sho taku ka thikwa ko2017,” omupresidente Hage Geingob osho a popile ngaaka nomukumo sho ta tseyitha ondungethaneko ye yoHarambee mo2015.

KuGeingob, shika, nomauvaneko ogendjigendji ngoka a ningile, osha li tashi vulu okugwanithwa po nuupo, molwashoka okwa li e shi ota longo nuupu, ongomupresidente gwoshilongo, mokweeta ombili, engungumano nokuhwepopeka oonkalelo dhaakwashigwana.

Nando ngashingeyi okwa kala ashike omvula yimwe oshikako shotango shaGeingob shi pwe, otashi holola kutya omuleli gwoshilongo ota nana nondatu mokugwanitha po omauvaneko ngoka i itulila po yemwene.

Nando ongaaka, Geingob ohi izike oombandi, nando konyala ooproyeka adhihe ndhoka u uvaneka inadhi za.

Geingob okwa tamekele nawa sho a tothele mo shoka a hala okuninga petameko.

Nando ongaaka, Geingob okwa fa u uvaneka oshindji ita vulu oku shi gwanitha po.

Poompito odhindji, oompangela dhaGeingob odhoshili notadhi vulu okutulwa miilonga, ashike okwa papata unene nokwa ninga omauvaneko ite ga vulu.

Ondungethaneko yoHarambee oya li yi na okutalululwa opo yi vule okwoopalela onkalo yopethimbo ndika, ihe shika inatu mona sha ningwa.

Otatu ipula kutya ngiika okumwena kwaGeingob pethimbo lyomutumba gwahugunina gwolaata yepangelo gwokomumvo otaku ulike kutya omupresidente okwa fa e li pokuumbila mo efanduke.

Peha lyokutaalela omashongo noku ga kondjitha, oshiwike shika, omupresidente okwa tameke okwiipandula nokwiizika oombadni, nando ina gandja iiholelwa ya yela yaashoka sha ningwa po kokabinete ke momatokolo konyala ge li 300 ngoka ka kutha.

“Otu ulika kutya otwi itula mo mokukondjitha oluhepo niilonga yuulingilingi; otwa gwanitha po iilonga yetu ngaashi shu uthwa moondokumende ndhika notu na omukumo muupondoli – eeno, muukumwe otwa pondola oshindji momumvo 2018,” Geingob osho a ti sho ti ipandula mwene nokupupula oominista dhe kombunda manga inedhi halela efudho li li nawa.

Oondokumende ndhoka ta popi sigo okeluwa ndika inatu dhi mona, nando otwa kala tatu dhi pula opo tu wape okuuvako shoka omupresidente ta popi.

Shoka AaNamibia, naayehe mboka ye na ohokwe noshilongo ye shi, osho shoka kutya, Namibia okwa kala a taalelwa kuupyakadhi uunene momukokomoko gwomimvo mbali dha piti, ihe mupya munene, kapu na oompangela dha yela dhokukandula po uupyakadhi mbuka monakuyiwa.

Uupyakadhi wenayipalo lyonkalo yeliko nuuhupilo owa yaga kegonga, nonkalo otayi ende yu uka kuuwinayi.

Endopo lyokugwanitha po euvaneko lyokutunga oondjugo otali holola kutya onkalo yomayakulo ngoka oya nayipala noonkondo, onkene oshilongo itashi vulu okukeelela etandeelo lyombuto ndjoka hayi kunu uuvu wehuli.

Aantu yomoombashu ngashingeyi ohaa ikwathelele moopulastika e taa ka ekelahi onyata momaluhwa ngele lya toko.

Mupya munene, ezimba ihali thiki ko komalukanda hoka haku zi aanapolotika.

Omathaneko gopetameko lela ngaashi okweeta po oompito dhiilonga nokukandula po oluhepo nago itaga ulika ga huma komeho.

Uuyelele kombinga yomathaneko ngaka moombelewa dhehangano lyopashigwana lyomiyalu, ndyoka tali wilikwa komuulikwa gwomupresideente yemwene, otawu ende okanamundonda.

Ookunga dhepangelo ngashingeyi odha lundalala sigo opoopelsesenda 50 dhiiyemo yoshigwana, shi ili kokule noopelesenda 30 ndhoka dha li dhu uvanekwa mondungethaneko yoHarambee.

Aantu oyendji otaa kanitha iilonga, nando otu li po tatu itangele oompito dhiilonga ndhoka dhe etwa po kofaambulika yokutsikinika iihauto, ndjoka ya totwa po koshimaliwa oshindji sha li tashi vulu okulongithwa mokugandja iilonga kAaNamibia oyendji.

Moshifo shomEtitatno omu na oolopota kutya ombaanga yuuyuuni oya guna epangelo lyaNamibia.olopota yombaanga yuuyuuni otayi holola kutya epangelo kali na oonkambadhala dhokunawapeka onkalo yuuhupilo moshilongo.

Iihuna otayi ka kala ko omvula tayi ya sho kwa taalelwa omahogololo.

Geingoba ne tu lombwele shoka ya longa po shomupondo opo ya vule okiipandula nokwiihalela efudho li li nawa.

Okwiinoma ohaku uvitha nawa yamwe, ihe naku ningwe noondunge.

Mboka ihaa si ohoni oyo ashike taa vulu okwiipupula kombunda nando oya ndopelela, shoka tashi holola kutya kaa shi shoka tashi inyenge momidhingoloko dhawo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.