Dumeni a hala oonakuninga iihakanwa yomboma yaShakati ya pewa esimaneko

KLEOPAS Dumeni, ngoka a li omumbisofi gwongeleka yaElcin, okwi indile epangelo li gandje esimaneko lyomawendo goonakuninga oshihakanwa shomboma yaShakati, oshiningwanima shoka sha ningilwe momasiku 19 Febuluali 1988.

Pethimbo lyedhimbuluko lyoshikando oshiti-34 lyoshiningwanima shoka, Dumeni okwa popi kutya epangelo olya pumbwa okudhika po emanya lyombila enene ndyoka tali kala oshuulikithi nesimaneko lyaamboka ya li ya kanithile mo oomwenyo dhawo.

Edhiladhilo lyaDumeni, olya yambidhidhwa komusita Aina Sheetheni gwegongalo lyongeleka yaNgwediva.

Oshiningwanima shoka shomboma yaShakati otaku hokololwa kwa li sha faalele oomwenyo dhaantu 27, moka oyendji yomuyo ya li aapangi naalongisikola.

Gumwe gomwaamboka ya hulithile moshiningwanima shoka, omwana gwaDumeni, Anna ngoka a li ashike nomimvo 19 pethimbo ndyoka.

“Tse mboka tu na aapambele yetu ya fumvikwa mpaka otwa pumbwa okukundathana kombinga yaashoka tu na okuninga po,” osho omumbisofi omukulu a popi ngaaka.

“Ndika limwe yomomawendo ngoka ge na aantu ya konda po20 ya hulitha moshiningwanima shesiku limwe moNamibia, pethimbo lyekondjelomanguluko. Ewendo etiyali otali adhika kOkongo, naantu ye li 18, etitatu otali adhika kOndeihaluka, omanga etine otali adhika kEtunda moshitopolwa shaMusati, moka aakwiita 18 yokakulumbwati kwa li ya dhipagwa. Ekwawo otali adhika kOutapi,” osho a popi ngaaka.

Dumeni okwa popi kutya ngele omawendo ngoka oga pewa emanya lyi li nawa, nena otashi ka hila naatalelipo, naashoka ngaaka itashi ke eta owala uuwanawa kaapambele yoonakusa mboka, ashike otashi ka kala wo muuwanawa woshilongo ashihe.

Okwa popi kutya mboka ya li ya longo oshilonga shoka tashi zitha omahwilili, aatondi ya Namibia.

Aatoolinkundana pethimbo ndyoka okwa li ya popi kutya omukwiita gwoSwapo, Leonard Sheehama, oye a li e etitha oshiponga shoka, moka mwa dhipagelwa aantu ye li 27 nayalwe 70 mboka ya lemanena mo.

Sheehama okwa li a tulwa miipandeko nokupatululilwa oshipotha sheponokelo lyombaanga ndjoka ya li hayi ithanwa Barclays Bank pethimbo ndyoka.

Okwa tulwa miipandeko sho taku hokololwa kutya oye a tege oomboma pomahala ga yooloka mOmbaye, osho wo posikola yedhina Okambebe Combined School moshitopolwa shaHangwena.

Okwa li pwa dhikwa oshilimbo shedhimbulukitho muFebuluali 2008 pehala lyoshiningwanima shoka nelalakano lyokugandja esimaneko koonakuninga oshihakanwa, ashike ombila onene yoonakuninga oshihakanwa ayehe mOngwediva, onkene yi li monkalo ombwinayi.

Omushigakano omunene omuluudhe okwa li gwa tulwa pehala mpoka, gwa shangwa: Omeehamo guuyuni wongashingeyi kage shi okuyelekwa neadhimo ndyoka tali ka holokela mutse.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.