Dr Frans Aupa Indongo a gandja omapapa kaanangeshefa yakwawo

OMUNANGESHEFA a tseyika nawa Omundohotola rans Aupa Indongo mOsoondaha ya zi ko okwa gandja omapapa goonzapo, Okambo taka popi ondjokonona ye noyuunangeshefa, kaanangeshefa yakwawo, unene tuu mboka ya tamekele naye nenge ya tameka tango kuye okuninga oongeshefa, unene tuu mboka ya tamekele oongeshefa dhawo pokati komumvo 1962 no 1972, sha ningilwa pOngeleka ya Musimboti mOsoondaha ya zi ko.

Oshiithanene shika shaanangeshefa osha tetekelwa tango kEmisa Eyapuki lya ningwa ku Pata Omukuluntu Erastus Kapena Shimbome ta yambidhidhwa kOmudiakoni Herman Klemens Uupindi nOmudiakoni Herbert Thomas, ngoka wo a kala ta hiki okahumba nokunyenyepeka Emisa Eyapuki lyOshituthi shoka.Engathithi enenenene lyAanangeshefa noshowo lyAakwanegongalo ya Musimboti nAahiywa yalwe koshiithanene shika, olya li lya gongala pOmusimboti mpoka nokusimaneka nawa oshiithanene shoka sha li sha longekidha wo oondja odhindji noshowo niikunuwa oyindji lela.Okuza mOngeleka mEmisa Eyapuki, oshituthi shepandulo, shesimaneko noshegandjo lyomapapa, oonzapo nosho tuu, osha ka ningilwa pondje yOngeleka, molwamba lela lwOngeleka. Kaansela gwOshikandjohogololo sha Shakatiuzilo tate Loth Kuushomwa yo nOmukuluntusikola gwOsikola ya Musimboti tate Martin Amupolo ngoka ngashiingeyi e li moshipundi shevululuko, oyo ya wilike oshituthi shika noku shi kaleka nomwenyo lela. Gavena yOshitopolwa sha Shana omusamane Klemens Kashuupulwa oye a taamba aanashituthi ayehe nokulesha wo oshipopiwa shOmukokolipresidende Omundohotola Sam Shafiishuna Nujoma ngoka a li ina vula okuthika omolu omaimbo. Meme Gudrun Amuthenu ta lombwele aanashituthi kutya Omundohotola Frans Aupa Indongo oye lye naanaa, omanga Elenga enene lyUukwambi nalyo lya popi wo sha kombinga yOshituthi nokombinga yOmundohotola Indongo pehala lyElelo lyUukwambi. Omunambelewa Omukuluntupitithi gwOongeshefa dhOmundohotola Indongo omusamane Kobus van Graan, ta popi wo sha kombinga yOositola dhOmundohotola Indongo ngashi hadhi ithanwa ‘Ehwata lyOositola dha Frans Indongo.’ Okwa landula ihe nawa Oshipopiwa oshinene shEsiku shOmundohotola Frans Aupa Indongo, sha leshwa pehala lye kOmundohotola Tshapaka Kapolo, konima sho na ye ( Dr Indongo) a tumbula sha wo pauhupi nokwiindila kaanangeshefa yi imange kumwe miipindi opo ya sinde aakondjithi yawo. ‘Inatu etheni oozimbololo dhetu dhi filale, natu dhi penduleni po,’ Omundohotola Indongo ta ti ngawo. Omukalelipo gwEpangelo lya Namibia koAmerika (koWashington), omusamane Patrick Nandago naye opo a li poshituthi mpoka nokugandja omapandulo omanene kOmundohotola Indongo noshowo kaanangeshefa yakwawo omoluudhinginini wIilonga yawo yuunangeshefa. Okuza mpoka okwa tamekiwa nee negandjo lyomapapa goonzapo nosho tuu kaaanangeshefa mboka aakulu ya tamekele oongeshefa moomvula dha tumbulwa metetekelo. Ongeleka ya Musimboti nayo wo oya pewa omagano kOmundohotola Indongo gOoN$22,000, omanga meme Magdalena Nuusiku a pewa OoN$5000 omoluudhiginini we mOngeshefa. Egongalo lya Musimboti olya gandja omagano kOmundohotola Indongo gEkopi noshowo Omedalia noshowo kOmukokolipresidende Sam Nujoma. Omunangeshefa omukulu a tseyika nawa tate Malakia Lukas Nakuumba oye a eta po oshipopiwa shependulo yo na Kaansela Kuushomwa. Ngashi osho hashi ningwa piituthi iinene, tate Peter Mutumbulwa oye a ningile omatseyitho kutya etyapulo lyoshituthi otali ka enda naanaa ngiini nokuza mpoka Omundohotola Indongo naanenentu yalwe oya katula oongala kOmbila ya nakuvala Omundohotola Frans Aupa Indongo, ano kombila ya kuku Oliva Enkono momawendo gEgongalo lya Musimboti moka.Ayehe ya popi mOshiithanene shoka oya pandula noonkondo Omundohotola Frans Aupa Indongo molwiilonga ye yuudhiginini muunangeshefa nashi a dhimbulukwa yakwawo ya kondja naye mekondjelomanguluko lyEliko lyoshilongo naantu yamo muule woomvula adhihe ndhoka. Sho a tameke oshipopiwa she, Omundohotola Indongo okwa indile kengathithi lya li mpoka li thikame, li dhimbulukwe nokugandja esimaneko lya hugunina kaanangeshefa yakwawo mboka ya ka lala. Oshituthi osha li wo sha nyenyepekwa nOmaudhano gOpamuthigululwakalo, ngashi kOngundu ya Maxuilili noshowo ndjoka ya Taakambadhala yokOmusati.