Diescho a indila oshigwana sha Namibia shi idhidhimikilathane

PETHIMBO ta popitha oshigwana mOshakati, unene sha li sha thikama maalongwantu, omasiku ga zi ko, Omuprofessore Joseph Diescho okwa indila koshigwana sha Namibia shi kale tashi idhidhimikilathana, tashi simanekathana nokusimaneka wo aaleli yasho mboka ya kondja nuudhiginini mekondjelomanguluko nokumangulula oshigwana kondjoko yOmukolonyeki South Africa gwonale.

Omuprofesore Diescho, ta ti kashi shi naanaa oshipu kAawiliki Aakuluntu ya Africa okupangela paudemokoli thiluthilu, molwashoka sho ya mangulula iilongo yawo, kasha li okweeta po ngeno uudemokoli, ihe oku mangulula ashike iilongo yawo, oyo ya kale tayi ipangele yoyene.’Uudemokoli nUuthemba womuntu wopashinanena, hawo naanaa ya li taya lalakanene. Onkee nee kashi shi naanaa oshipu kuyo, okwiidhidhimikila yakwawo mboka taya toto po oongundu dhOompilameno, nashoka sha pumbiwa pethimbo ndika, Dr Diescho ta ti, elongo negandjo lyomauyelele giihwapo kAawikliki yetu mbaka, kombinga yUudemokoli nUuthemba wOmuntu, unene tuu okulonga nokuuvitha ko oshigwana shoka oshigundjuka,oshileli shokomongula, opo shi uveko Ootatekulu nokutala mpoka tashi endukulula sho tashi tungile nawa komukanka gwa etwa po kAaleli yasho mbaka, Oohe yoshigwana,’ Omuprofesore Diescho, ngoka a li a popi kombinga yOongundu dhOopolotika mUudemokoli noshowo kokutya Namibia ngele tashi ya kombinga yUudemokoli, oku li tuu mondjila yuuka nenge ahawe, ta ti ngawo nokugwedha ko kutya molweendo nee ndoka, otashi ka kala oshiwanawa ngele oshigwana tashi kala nokusimaneka aaleli yasho nokwiidhidhimikilathana, unene tuu miinima yOpolotika ya yooloka, ngashi shi li nale moNamibia moka mu na Oongundu odhindji dhOpolotika.Ta ti Aaleli ya Africa mboka ye li kiipundi, kaya kalele naanaa ye hole Aaleli yOopolotika dhilwe, haye dhi ithana kutya odhOompilameno, nohapu kala nee omahilathano nokwaidhidhimikilathana. Shi li oshidhigu kwaamboka taya pangele okwiitala ko yakwawo yOongundu ndhoka haya ti odhOompilameno nohashi kala oshidhigu kuyo okwiihumbata paudemokoli nokusimaneka uuthemba womuntu. Ta ti kashi li ngashi mu Amerika moka ngoka ta kuthwa koshipundi pahogololo lyOpaudemokoli, hayi ashike nombili noku ethela mukwawo a tsikile nEpangelo nombili. Ta ti wo
kutya okwaana uuyuki mokati koshigwana, unene tuu ngele taku holoka mokati kaawiliki, ohashi yono ekwatathano ewanawa pokati kaaleli naalelwa.Omuprofesore, Diescho okwa gandja wo elimbililo lye kondjodhi ya Namibia yokwaadha komvula 2030, Namibia aputuka nawa noku li pomuthika gwiilongo ya putuka thiluthilu. Ta ti ye okuwete kutya opo shi ende nawa, Oprograma yokweenditha ondjodhi ndjoka, nayi kale yi na Ongunduwiliki yayo yene, ngashi Omuwiliki gwayo nOshikondo she sha thikama mAanambelewa yiinakugwanithwa yi ili noyi ili tayi tulitha ayihe miilonga nelalakano lyokwaadha shili elalakano lyondjodhi ndjika.Omundohotola Diescho, ota ti wo kutya Namibia oku na unene Oongundu dhOopolotika odhindji, na walye wo tuu ngele Namibia ote ke shi pondola tuu oku adha omalalakano ge gesiloshimpwiyu nawa lyoshilongo noshigwana. Ta ti wo kutya omukalo ngoka hagu longithwa kongundu mokuulika aawiliki, ogwa pumbwa okutalululwa, oshoka oshigwana kashi na mo naana ewi ngashi shi na okukala ngeno. ‘Ashihe tashi ningwa nashi ningwe kwa simanekwa ehalo lyoshigwana. Oshoka Oongundu dhOopolotika otadhi vulu okuya nokuza po, ashike Namibia noshigwana she opo ta kala mpoka.Onkee Aawiliki naya kale tayi idhidhimikilathana nokwiitaala wo omayele nomadhilaadhilo omawanawa ga yalwe, kutya nee oyOongundu dhOompilameno nosho tuu, ‘Omuprofesore ta ti ngawo, ta gandja omayele nokukumagidha oshigwana naaleli yasho. Ta ti wo kutya aawiliki yoshigwana ngashi mboka yOpamuthigululwakalo oya pumbwa lela okupewa elongo nomayelithilo giihwapo uuna tashi ya kUudemokoli nokUuthemba womuntu, opo ya vule okulela nawa nopauyuki. kOshigwana ashihe sha Namibia, Omuprofesore Diescho ta ti.Oshigongi shika osha li sha ningilwa mOhotela yedhina Oshakati Country Lodge mOshakati. Oshigwana oshindji lela, unene shaalongwantu, osha li she ya okupulakena shoka tashi popiwa kOmulongwantu gwa Namibia nguka,Joseph Diescho, a yambukile kOshitopolwa sha Kavango noku li ngashiingeyi ta longele kOuniversity ya South Africa (UNISA) moPretoria mo
South Africa, nokupula wo omapulo ngoka ga mono omayamukulo.Omuprofessore Diescho okwa li a ende pamwe na Ombudsman gwa Namibia omusamane John Walters, ngoka a kala Omuwiliki gwOshigongi she shika.