Covid-19: Omwaalu gwomangundumano gwa shunithwa pevi

OMUPRESITENTE Hage Geingob uunambo okwa popitha oshigwana oshikando oshiti38 kombinga yonkalo yombuto yocorona moshilongo naashoka unene osha hwahwamekwa kekuthithi etine ndyoka tali etithwa koludhi lwombuto yocorona lwedhina Omicron.

Geingob okwa dhenge omutindo nokwi indile Aanamibia yi iyambe yo ya ye ketuntilo lyomuti gwekondjitho lyombuto yocorona, nokwa popi nokuli kutya otashi vulika monakuyiwa omahala gomangeshefelo moshilongo ga ka kale taga pitike egandjo lyomayakulo kaakwashigwana ashike mboka ye na uukalata tawu koleke kutya oya tuntilwa.

Pokati mpoka, epangelo olya tula miilonga omilandu omipe dhokuwilika oshilongo sigo omomasiku 15 Januali.

Momilandu omipe omwa kwatelwa egambeko lyomwaalu gomangundumano ndyoka ngashingeyi lyi li paantu 200.

Geingob okwa popi kutya omulandu ngoka gwomangambeko otagu dhengele wo piituthi ngaashi yomaudhano nopomafumviko.

“Ponkatu ndjika epangelo itali tula po okangendjo kuusiku opo ku gandjwe ompito ya manguluka yomainyengo kiiyenditho osho wo kaakwashigwana. Ashike nando ongaaka, otatu tsu omukumo opo uumaska wu zaliwe pamukalo kwaamboka ye li miihauto opo ashike ku keelelwe etaandelo lyombuto,” osho a popi ngaaka.

Omupresitente okwa popi kutya epangelo okupitila mUuministili wIilonga nIiyenditho otali ka gandja uumaska wu li omiliyona kaalongithi lyiihauto naafaalelwa.

Kombinga yelanditho lyomalovu, Geingob okwa popi kutya kapu na omalunduluko ga ningwa po manga ashike omilandu ndhoka otadhi vulu oku ka talululwa ngele onkalo inayi hwepopala.

Kwaamboka taye ya moshilongo, Namibia ngashingeyi ota ka pitika owala mboka ye na iizemo yombuto yocorona inaa yi konda poowili 72 okuza esiku omuntu a konakonwa.

Mboka taya thiki moshilongo ashike iizemo yawo oya konda poowili 72 omolwomatompelo gontumba ngaashi omalweendo goondhila ga tokelwa, otaya ka konakonwa pethimbo taya thiki moshilongo notaye ki ikalekelwa momahala noku shi futila yoyene.

Mboka taya ka kala ye li momahala gokwiikalekelwa nokumona iizemo tayi ulike kutya kaye na ombuto otaya ka mangululwa mo momahala ngoka.

Mboka taya thiki moshilongo noshizemo tashi ulike kutya oye na ombuto, otaya ka thiminikwa yi ikalekelwe momahala taya futu okuza moondjato dhawo yoyene.

“Aanamibia osho wo mboka ye na omikanda dhokukala moshilongo otaya vulu okuya moshilongo ye na nenge kaaye na oshizemo shomakonakono gocorona shi li meni lyoowili 72. Mboka taye ya mo noshizemo tashi ulike kutya oye na ombuto otaya ka kalekwa momahala gokwiikalekelwa ashike otaya ka futa okuza moondjato dhawo. Epangelo otali ka konakona aantu ombuto yocorona mboka taye ya moshilongo,” osho Geingob a popi ngaaka.

EIKWATO POMUTIMA

Minista guundjolowele nomayakulo gonkalonawa Kalumbi Shangula, uunambo okwa popi kutya onkalo yombuto moshilongo ngashingeyi oya nayipala.

Okwa popi kutya momasiku 13 Desemba, moshilongo omwa li mwa ndhindhilikwa nale aantu kumwe ye li 133 444 mboka ya monika ombuto okuza momwaalu gwaantu ye li 819 721 mboka ya konakonwa okuza nkene ombuto ya tamekele.

Omwaalu gwaantu ye li 126 148, oya aluka, naashoka otadhi ulike kutya oopelesenda dhaantu 94,5 mboka ya aluka.

Shoka oshu ulike kutya omwaalu gwaantu taya aluka ogwa shuna pevi noopelesenda 2,7 sha landula omwaalu gwaantu taya monika ombuto ngoka gwa tameke okuya pombanda muule wiiwike iyali ya piti.

Oopelesenda dhaantu mboka ye na ombuto odha londo nokuya pombanda noonkondo sigo opo 95,2.

Moshilongo ngashingeyi omu na aantu ya konda po4 000 mboka ye na ombuto, omanga ya konda po3 580 ya faalelwa kombuto ndjoka okuza nkene ya tukukile moshilongo.

Kalumbi okwa popi kutya muule wiiwike iyali ya piti, omwaalu gwaantu taya monika ombuto ogwa kala tagu londo esiku kehe.

Momasiku 10 Desemba okwa li nokuli mwa ndhindhilikwa omwaalu gu li pombanda gwaantu ye li 1 041 ya monika ombuto mesiku.

Okuza momasiku 16 Novemba sigo 12 Desemba 2021, muule womasiku 27, aantu ye li 47 130 okwa li ya konakonwa, moka ye li 4 023 ya monika ombuto.

ETUNTILO

Minista okwa tseyitha kutya omwaalu gwaantu taya tuntilwa ngashingeyi ogwa londo noopelesenda 10 muule womwedhi gumwe.

“Okuza mOmaandaha, aantu ye li 388 719, nenge tutye oopelesenda 25,9 dhaakwashigwana moshilongo mboka ya adha okutuntilwa, oya tuntilwa nale owenda yawo yotango, naantu ye li 327 532, nenge tutye oopelesenda 21,8 dhaakwashigwana, oya mana ko omatuntilo gawo moshilongo,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.