COD ya kuthamo Nora Schimming-Chase mOshigongi Shopashigwana

ONGUNDU yo Congress of Democrats(COD) oya koleke kutya oya kuthamo oshilyo shayo shoParliamende mOshigongi shOpashigwana, meme Nora Schimming-Chase moompadhi oontalala.Uukwashilyo wa Schimming-Chase mEgumbo lyOpashigwana owa hulithwapo molwaashoka aniwa okwa nyengwa okupopya kutya oodola oma 600 000 okwedhi longitha ngiini.

AmushangaNdjayi gwo COD omusamane Tsudao Gurirab okwa ti okangundu kiilonga ka gongalele mehuliloshiwike lya yi okatokola ka pule Schimming-Chase opo a galule iimaliwa mbyoka.Sho Schimming-Chase a pulwa kutya ngele okwa tseyithilwa kutya okwa kuthwamo mOshigongi shOpashigwana okwa lombwele oThe Namibian kutya ina uva sha, ndele ye okwiilongekidha oku ulika kutya kenondjo.Gurirab okwa ti okangundu kiilonga okaningi etokolo konima sho ka pewa ehokololo ku Schimming-Chase. Pahokolo lyokangundu haka ye iniikala kutya iimaliwa mbika ine yi mona ndele okwa pe yalwe ombedhi melongitho lya yo kakele ye okwiikuthamo.Omolwonkalo ya tya ngeyi okangundu kiilonga hoka oka tokola okupula ompangu opo, Schimming-Chase a gandje ehokololo lyuudha nkene iimaliwa mbika ya longithwa, nelalakano opo iimaliwa mbyoka ya longithwa pwaana epitikilo lyongundu yi galuke. Gurirab okwa ti Schimming-Chase okwa kala ti ihumbata nayi kombinga yoshinima shiimaliwa, nashika osha dhigupaleke oshinakugwanithwa she okukalekapo ongundu yoCOD mEgumbo lyOpashigwana onkene okangundu kiilonga okatokola oku mu kuthamo mOshigongi shOpashigwana.Gurirab ka kwali a tseyithila Schimming-Chase kombinga yo kukuthwamo kwe mOshigongi Shopashigwana pethimbo lyomwiha Omaandaha sho a tseyithile aatoolinkundana onkundana ndjika. Schimming-Chase okwa li a kumwa oku uva onkundana ndjika , unene tuu sho oshikumungu shika shi li natango komeho gompangu, mono ye a fala omayamukulo ge kombinga nkene iimaliwa tayi pulwa ya longithwa.’Onda gandja omishangwa adhihe dhombaanga kompangu.Ndhoka itandi vulu okukalelapo ootjeke dhomwaalu omiliona yimwe noshinkwanu yimwe yakuthwa po ku(Ben) Uulenga .Oye na gandje omishangwa nkene iimaliwa mbyoka ya longo’Schimming-Chase ta ti. Okwa ti nonando okwa li e na oshinakugwanithwa shoku kutha ko ootjeke pehala lyCOD okuza kOparliamende, ngaashi shuuthwa kelelo lyokongundu ye ha ye e yi futilemo mombaanga nenge eyi kutha ko kombaanga. ‘Onda longitha nookuli omayovi 60 000 giimaliwa yandje mwene moshipotha shoCOD ngashingeyi oyiininga aapanguli, aapulakeni noshowo aatamaneki yandje.Ngame ondina okupangulwa kaantu mboka yahogolola ndje nondi shishi itandi ka monika ondjo’ Schimming-Chase ta ti. Oshikumungu shiimaliwa yoCOD osha zi mu Mai 2007 konima yomahogololo gewilikongundu lyo COD poKeetmanshoop, mpoka Ulenga taku ti wa ina hogololwa mondjila ye Schimming-Chase okwa li a kuthwapo puupresidende wopevi woCOD. Nonando Schimming-Chase okwa kala nuuthemba wo ku taamba otjeke yopaati yawo pehala lyongundu, konima yoshigongi shopoKeetmanshoop, omuleli gwo COD Ulenga nayalwe oye mu ningile etamaneko lyuufuthi.Ihe Oshigongi shOpashigwana osha ti, Schimming-Chase na nakusa Kalla Gertze oya li natango ya uthwa pampango okutaamba ootjeke pehala lyoCOD okuza kepangelo.Konima omusamane Ulenga okwa tseyithile Oshigongi shOpashigwana kutya, oye, Gurirab niilyo iikwawo iya li ya gwedhwapo yoCOD Rosa Namises nagumwe a tseyika nedhina Kapi ya li nuuthemba woku taamba ootjeke pehala lyongundu yawo. Iimaliwa mbika oha yi pewa ongundu yopolitika kehe yi na oshipundu mOshigongi shOpashigwana shiikwatelela kiipundi mbyoka ongundu yi na konima yehogololo kehe lyopaParliamende.