Amushelelo a gandja elondodho lyokupatitha oCheetah Cement

Shoka Amushelelo okwe shi popi nonande omasiku ga zi ko sho a mangululwa mongali opamwe nomunandjungu gwoAffirmative Repositioning Dimbulukeni Nauyoma, oya komupanguli Christie Liebenberg kutya Namibia oshilongo shuudemokoli, nonkene oohandimwe inaya pitikwa okwiikuthila oveta momake gawo, molwashoka shoka otashi hwahwameke ondhino yoveta moshilongo.

Sho Liebenberg nomupanguli Dinnah Usiku, ya gandja ompito yokwiifutila mo kuAmushelelo naNauyoma nooN$5 000 mu kehe gumwe, oye ya pe oompango ndhoka ye na okwiiyutha kudho.

Aapanguli mboka yaali oya lombwele Nauyoma (30) naAmushelelo (31) ya yande okuhwahwameka nenge ya kuthe ombinga momangundumano nenge omahololomadhiladhilo gaa li paveta.

Amushelelo naNauyoma oya mangululwa mondholongo muAuguste, konima sho ya kala konima yekumba uule woomwedhi dha konda pundatu sho kwa li ya hwahwameke epatitho lyoositola dhAachina mOvenduka, shaali paveta.

Amushelelo okwa popi kutya okupatitha ehangano lyoCheetah Cement itashi yi nande pambambo omalombwelo ngoka ya pewa sho ya mangululwa mondholongo, nokwa popi kutya itashi kala nande sha pogola ngele okwa kalekitha othika iilonga yofabulika ndjoka.

Aaniilonga yofabulika ndjoka yoosamande mOtjiwarongo oya tamekele ekanka muJuli sha landula sho elelo lyehangano ndyoka lya ndopa okutsakumwe nomaindilo ngoka aaniilonga ya hala, kombinga yoondjambi.

“Nena otweya tu gandje uukwawo wanankali kaaniilonga yoCheetah Cement,” osho Amushelelo a popi ngaaka.

Okwa popi kutya omanga aaniilonga yofabulika ndjoka ye li mekanka lyuule woomwedhi dha konda pumbali ngashingeyi itaaya futwa, ofabulika ndjoka oya tokolola okulongitha ehangano lyokukuta aaniilonga lyedhina African Personnel Services olyo lyi ya kwathele okutsikila niilonga yoosamende.

“Oshiwike tashi ya [oshiwike shika] otatu ka unganeka ehololomadhiladhilo lyokupatitha iilonga yoCheetah Cement. Otatu gandja ashike oshiwike shika kuKevin Lee [omukuluntu gwoCheetah Cement] a kale a taamba omakemo gaaniilonga ngele ina hala twa patitha iilonga yokuninga oosamende,” osho Amushelelo a popi ngaaka, oshiwike sha zi ko.

Omupopiliko gwoCheetah Cement, Tabby Moyo, okwa popi kutya oshikumungu shaaniilonga mboka ye li mekanka otashi ungaungiwa kehanganokalelipo lyaaniilonga osho wo elelo lyofabulika yawo.

“Kandi wete kutya NEFF moshikumungu shoka ota gwana peni. Okuningila ofabulika omatilitho hasho ekandulopo ewanawa lyuupyakadhi mbuka,” osho a popi ngaaka.

Moyo okwa popi kutya okuya pambambo omilandu dhekanka oshe etitha ehangano lyi katuke onkatu yopaveta, shoka hashi eta ondjila onde.

Okwa popi kutya aaniilonga oya dhimbulula kutya oshe ya guma molwashoka ekanka ndyoka olya kala po uule woomwedhi.

“O-NEFF itayi vulu okulombwela ehangano lyi yamukule komaindilo gaaniilonga nenge yi patithe iilonga, molwashoka shoka kashi li paveta,” osho Moyo a popi ngaaka.

Okwa popi kutya omaindilo goondjambi ngoka aaniilonga taya kondjitha ya pewe otaga pula ondilo nonkene ofabulika itayi vulu oku ga gwanitha po.

Moyo okwa popi kutya natango ofabulika yawo onkene ya manguluka okukundatha nokwa adha etsokumwe tali mbilipalele oombinga adhihe moshikumungu shoka.

Onzonkundaneki ndjika omasiku ga piti oya kundaneke kombinga yongundu yoNEFF ya lombwele minista gwaaniilonga, iikwafabulika, netotepo lyiilonga, Utoni Nujoma, a mone ekandulopo lyomukundu kombinga yekanka lyaaniilonga yoCheetah Cement.

Ehangano ndyoka osho wo aaniilonga oya nyengwa okwa adha etsokumwe oomwedhi dha piti kombinga yaashoka aaniilonga ya hala.

Shoka okwa li sha tseyithwa komupevipresitente gwongundu yoNEFF, Longinus Iipumbu, nokwa popi kutya epangelo olye etha aaniilonga ye li uupyakadhi.

“Omolwashike inoo ya ko? Zamo mombelewa etoyi kOtjiwarongo wu ka ninge omupokati, pokati kaaniilonga mboka ye li mekanka osho wo ofabulika,” osho Iipumbu i indile Nujoma ngaaka.

OONDJINDIKILA

MuAuguste, sho ya pewa oboloha, Ompangu yoPombanda oya li ya gandja wo engambeko kuAmushelelo naNauyoma kaaya hedhe popepi nomukaakena gu li meni lyokilometa yimwe noositola dhAachina ndhoka dha tseyika nawa China Town mOvenduka, hoka Amushelelo kwa li a monika mokavidio ta kondjitha okupatitha oositola dhAachina momasiku 12 Mei.

Omaihumbato ngoka ga Amushelelo ogo kwa li ge eta a mangwe po momasiku 13 Mei.

Opolisi oya tula miipandeko Nauyoma mesiku olyo tuu ndyoka, sho a li a kwatele komeho ehololomadhiladhilo koChina Town lyi li ompinge nekwatopo lya Amushelelo.

Ayehe yaali okwa li ya patululilwa iipotha yokwe eta evundakano moshigwana osho wo okuhwahwameka oshigwana shi pogole oveta. Amushelelo oku na wo oshipotha sha gwedhwa po shedhengo okupitila momatilitho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.