ACC a pula omukuluntuwiliki guunamapya a fute oshimaliwa sholukalwa

OMUKULUNTUWILIKI gwokomisi tayi kondjitha uulingilingi moshilongo yo Anti-corruption Commission (ACC), Paulus Noa, okwa popi kutya okwa gandja elombwelo kaanambelewa yaali aakuluntu muuministili wUunamapya nUuniimuna, Omeya nEtendululo lyEvi, opo ya fute epangelo konima sho ya kala ye li momagumbo gepangelo oshali omanga taya futwa oshimaliwa shomauwanawa gomalukalwa.

Noa omwedhi gwa zi ko okwa popi kutya okwa gandja omasiku sigo opehulilo lyaNovemba opo omukuluntuwiliki gwuuministili wuunamapya Percy Misika – ngoka u uka moshipuyndi shevululuko, osho wo omupeha gwe muuministili mboka Ndeyakupi Nghituwamata, ya kale ya futa epangelo molwashoka oya kala haya zi momagumbo gepangelo omanga haya pewa oshimaliwa sholukalwa.

“Onde ya shangela ombapila yokuya lombwela ya fute oshimaliwa molwashoka oya kala taya futwa oshimaliwa shuuwanawa wolukalwa,” osho Noa a popi ngaaka.

Okomisi oya tameke tayi ningi omakonakono kombinga yoshinima shoka sha landula sho onzonkundaneki ndjika ya li ya lopota kombinga yaMasika ngoka a kala megumbo lyepangelo oshali, omanga ta mono okashona kokufuta olukalwa lwe.

Okumona omauwanawa gopaali gokukalwa oshinima lela inaa shi pitikwa, naanambelewa yalwe yepangelo mboka ya li ya kwatwa taye shi ningi okwa li ya katukilwa onkatu yopaveta.

Onzonkundaneki ndjika okwa li ya kundaneke kombinga yaMisika a li e na okulanda po egumbo moka ha zi, omanga sha adhika sha monika mo nale kutya edhiladhilo ndyoka itali vulu okupita molwashoka okwa kala ta zi megumbo lyepangelo omanga keena okuza mo oshoka oha pewa nale okashona kolukalwa lwe.

Okwa li wo sha monika mo kutya megumbo moka ha zi olyi li mongundu yomagumbo ngoka itaa ga vulu okulandithwa po kwaangoka e li mo. Noa okwa popi kutya Nghituwamata naye oku na okuyelitha nota ningilwa omakonakono.

Okwa popi kutya Nghituwamata okwa kala ngaa ha “futu sha” sho e li megumbo lyepangelo, nuuministili wuunamapya nuuniimuna owo wu na oshinakugwanithwa shokuninga omakonakono nokutala kutya ingapi mbyoka e na okufuta epangelo.

Omilandu dhomagumbo gepangelo otadhi ti omuntu ngoka ta pewa okashona kolukalwa lwe oongoka ashike ihaa zi momagumbo gepangelo, nenge ngoka e li pandondo yuuleli muuministili nenge momahangano gepangelo.

Oohandimwe inaya pitikwa paveta okukala momagumbo gepangelo, ashike otaya vulu okuthitha momagumbo (ngoka kaa ge shi gepangelo), okukala momahala gawo yoyene nenge momahala ngoka taya landa po.

Aanambelewa kaleli po yokiilongo yilwe mboka ye li moshilongo inaya pitikwa okuthitha omagumbo ya pewa kepangelo gawo kaantu yalwe omanga ya za po, ngele oya hala okutsikila okupewa okashona kolukalwa. Ngele omunambelwa okwa tokola okugandja egumbo li thithwe nena okashona kolukalwa hoka ha pewa oha ka hulithwa po.

Pampito ndjoka omunambelewa a yelwa nokuya ponkatu yopombanda, omanga a adhika e li megumbo lyepangelo, omunambelewa ngoka oha pewa oomwedhi ndatu a lande po egumbo ndyoka nenge a ze mo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.