Aawambo otaya kutha po aniwa omahala gAahimba

OMALENGA gAahimba moshitopolwa sha Kaoko oge popi kutya oshinima shaantu (taya zi koshitopolwa sha Musati) taya kutha po evi lyaantu yawo mOkaoko shaa li paveta otashi eta iikolokosha yopaukwamuhoko.Pambapila yawo ndjoka Elenga Paulus Tjavara (gwElelo lyOpamuthigululwakalo lyAatjikaoko) lya shangele Omupresidende Hifikepunye Pohamba momasiku 10 ga Novemba – ya yambidhidhwa kOmalenga galwe gAahimba nogAaherero moshitopolwa sha Kunene, aaleli yomopamuthigululwakalo mbaka oya ti kutya oontamanana pokati kaantu yawo naamboka ye li mOkaoko shaa li paveta, oge li ga geya noonkondo.

Tjavari okwa ningi eindilo ku Pohamba kutya na ye mo moshinima shika shekondjelo lyevi, ta ti Elelo lyUukwaluudhi nolyaNgandjera oge li taga evi lyaantu yawo mOkaoko-uzilo shaa li paveta. Omalenga gAahimba nAaherero oga ti kutya oshinima shekutho lyevi lyaantu yawo (shaa li peveta) kElelo lyUukwaluudhi nolyaNgandjera osha li sha falwa kEpangelo pokati komumvo 1991 no 2002, ‘ihe osha li ashike sha tulwa kohi yemate kEpangelo lya Namibia.’ Tjavara okwa ti ngele onkalo ndjika oye ethwa yi ye komeho, ‘otayi ka eta iikolokosha, uutondwe wopaukwamuko netopoko maantu mboka ya li nale ya hangano manga oshilongo ina shi manguluka.’Paveta yi na sha nOmawi miitopolwa yaayehe Omalelo gOpamuthigululwakalo ogo ge na okukondolola evi miitopolwa mbika na kehe etopolo lyevi tali ningwa oli na okuningwa kwa landulwa oveta ndjika.
‘Aakalimo yomOkaoko oye li taya yugwa evi lyooyinakulu esiku kehe kaantu aanankondo ya za kOwambo. Moshitipolwa sha Otjerunda, aantu ya za kOwambo oya kwata ko nokutula modhalete oopolota dha konda po 55 momahala guulithilo pu Okomakura, Omateteue, Omakange No.1 no No.2,’ Tjavara ta popi ngaaka.
Okwa ti Elelo lyUukwaluudhi olya kutha ko ehala enene lyElelo lyOpamuthigululwakalo lya Otjorutenda lyElenga Mbuze Tjijeura, kali ne opelemeta yElelo ndyoka.
Tjavara okwa tsikile ko ta ti Omakange oga kuthwa mewiliko lyElenga Tjijeura ‘e taga ningi oshitopolwa shUukwaniilwa wUukwaluudhi na shika osha tameka oomvula mbali konima sho oshilongo sha manguluka.
Okwa ti ngashiingeyi yo oye li ya talwa omeho omanene kaantu yawo, ye ya pe omayamukulo kutya omolwashike evi lyawo tali kuthwa po kAawambo. Tjavara okwa ti kutya otashi ka kale shi li nawa ngele tapu tulwa oongamba dha yela pokati kOkaoko nOwambo, opo aantu kaye kuthe po we omavi gayakwawo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.