Aasita yatatu yaElcin ye li moshipyu … ya fike po oombapila dha shangwa omaudhigu gaakwashigwana

AASITA yatatu yongeleka onkwaevangeli paLutheran – Evangelical Lutheran Church in Namibia (Elcin) oye li moshipyu sha landula okavidio hoka taka ingaana komalungula taka ulike nkene taya fike po oombapila moka taku hokololwa mwa shangwa omaupyakadhi gaakwanegongalo.

Ehokololo otali ti aakwanegongalo ye li po100 okwa li ya waimine egongalo lyongeleka yaNgwediva mOlyomakaya yomasiku 21 Mei okuza komagongalo ga yooloka, moka aakwanegonga mboka ye na omaupyakadhi noya taalelwa komashongo, ya lombwelwa ye ga shange moombapila, nolwanima oombapila ndhoka odha fikwa po miipathi yegongalo mongeleka.

Efikopo lyoombapila ndhoka olya tukukulutha oyendji moElcin moka mu na yamwe taya popi kutya oshinima sha ningwa kaasita mbyoka inashi uka noshi li ompinge nelelo lyongeleka yaElcin noyewete sha pamba iilonga yuunganga.

Aasita mboka yatatu ya kwatele komeho efikopo lyoombapila ndhoka, oyo omusita gwomopolisi Hafeni Mwaningange, Aina Sheefeni gwegongalo lyaNgwediva osho wo omusita Christof Mbongo gwegongalo Euvathano.

Nokuli aasita yamwe yaElcin oya kondema etokolo lyokufuka po ombapila nokupopya kutya oshinima shoka inashi pitikwa nande melelongeleka lyawo, noshi li oshitopolwa ‘shelongokriste epe’.

Ashike nando ongaaka aasita mboka yatatu oya popile etokolo lyawo, sho ya zi mokalungu kutya oombapila ndhoka dhomaudhigu gaakwanegongalo oye dhi fike po ongendhindhiliko noshilimbo “shehungomwenyo lyaamboka ya thindwa pevi komaudhigu”.

Otaku hokololwa kutya aakwanegongalo mboka ya li ya waimine ongeleka ndjoka yaNgwediva mesiku lya tumbulwa pombanda, oya tseyithilwa kutya kehe tuu ngoka e na omaupyakadhi monkalamwenyo ye ne ga tule pambapila ndhoka tadhi gandjwa kaasita.

Lwanima, oombapila ndhoka odha gandjwa kaasita nodha fikwa po mongeleka miipathi yegongalo.

Okavidio kuule woosekonde 22 hoka taka ulike efuko lyoombapila otamu monika nkene omusita Mwaningange ta fike po oombapila, nopopepi otapu monika omushigakano omushona.

Sho a kwatathanwa naye konzonkundaneki ndjika, Mwaningange okwa popi kutya efikopo lyoombapila kashi shi nande oshinima oshipe, ishewe kashi li kombinga yomalongo giifundja.

“Oshinima shoka onde shi ninga lwiikando oyindji mongeleka. Kashi shi nande oshinima oshipe, oshipe owala kwaamboka opo taye shi mono lwotango,” osho a popi ngaaka.

“Inatu popya nande kombinga yehupitho. Otwa fike po oombapila ndhoka opo tu dhigamenene po wo uuyelele wu li mo kaawu leshwe kaantu, molwashoka katwa li nande twa hala shoka sha shangwa mo shi leshwe komuntu,” osho a popi ngaaka.

Okwa popi kutya shoka a ningi opamwe naasita ooyakwawo, oya gandja ashike ehungomwenyo, molwashoka ongeleka yaElcin kayi na aaniilonga yaahungimwenyo.

“Katu na shoka twa ninga sha puka. Mboka taya popi kutya otwa ya pambambo eitaalo lyongeleka oyo ya puka. Oye na uuthemba wokukagandja omaiyuvo gawo, ashike inaye tu lundila nande. Tse inatu ninga nande shoka hatu ningi kombinga yehupitho,” osho a popi ngaaka.

Mbongo okwa popi kutya okwa kala nale ha fike po oombapila dholudhi ndoka nokashi na nande uudhigu wa sha.

Omusita gwaElcin Joseph Shikuma oshiwike sha zi ko okwa tongonona oshikumungu shoka kutya oshi na olunyala “naamboka ye li ompinge nuuKriste, eitaalo lyiifundja, esithahoni osho wo okwaalandula omilandu”.

“Molwashoka Elcin ke na omumbisofi gumwe, omananathano ngoka oga nika okukala po notashi vulika ga kale nokweendululwa. Onda tegelela oshikandjongeleki shokuuningino shi tye ko sha kombinga yoshinima shoka nonda tega ye shi tale ko ongoshinima shomeendelelo, nenge ye tu fatululile kutya omolwashike shi li mondjila,” osho a popi ngaaka.

“Efiko po lyoombapila nelalakano lyekandulopo nokudhima po omashongo kashi shi nande oshinima shopangeleka yetu. Omaitaalo ngoka taga ningwa mongeleka ogoonganga.”

Sheefeni ina vula okumonika opo a tye ko sha.

Ashike nando ongaaka, mokakwatwamawi hoka ka tuminwa onzonkundaneki ndjika, okwa popi tati: “oye shi ningi opo shoka sha shangwa moombapila kaashi leshwe nande okugumwe.”

Okwa londodha aasita ooyakwawo ya yande okunyana nokugandja ombedhi kombinga “yiinima mbyoka kaaye yu uvite”.

Amushangandjayi gwoElcin Alpo Enkono ina vula okumonika a tye ko sha.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.